【足球．博評】港超比賽ask for more

早前香港飛馬領隊奇雲邦特（Kevin Bond）有鑑於球隊同傑志比賽因為對手嘅賀歲盃及亞冠盃外圍賽而需要改期，令飛馬喺9個星期內只得1場比賽，而且因為其他球隊有比賽約唔到友誼賽會影響球隊狀態好煩惱。
港超賽程其實一直都有唔少批評聲音，究竟可以點改善？世界波嘅洛迪高就同大家講下唔同可能性，而且唔會淨係從數量（Quantity）方面着手，仲會從好與壞方面講埋對質素（Quality）有咩影響。

文：洛迪高@世界波

季後賽

大家首先記住，比賽多都唔一定好，最緊要有質素夠刺激。今季港超聯有11支球隊，聯賽總共有22周。如果踢完22周聯賽後，倣效美職、日職（下季已取消）、荷甲及澳職等踢季後賽，會唔會好刺激？其實港超唔係無季後賽，港超聯設有季後附加賽，由聯賽亞軍及3大盃賽（足總盃、高級銀牌及聯賽盃）冠軍共4隊參加、但呢個季後附加賽都只用作爭奪有關亞洲賽資格，如果整返個爭冠組同護級組比賽，好似，似乎可以美好地提高比賽數量及質素。

建議玩法

1. 前3名進入爭冠組，聯賽第1名直接入爭勝組決賽，第2名及第3名先踢一場，勝者同第1名踢最終決賽。
2. 升2降2：最後1名直接降班，甲組第1名直接升班，超聯第2位及甲組第2位踢1場過附加賽（如甲組第1名放棄升班，由第2名補上直接升班；如甲組第2名放棄升班附加賽，由第3名補上，如此類推）。
3. 中間4隊將踢名次賽決定最終排名及聯賽獎金。

好處

增加比賽數量：以今季聯賽隊伍數量嚟計，每隊踢完聯賽20場，都仲可以踢多幾場比賽，咁賽程安排方面就有機會密返啲。
增加刺激度：由於牽涉到爭標同護級，球隊們當然更搏命啦！
增加競爭性：打聯賽部分球隊當然未夠班霸穩定，但去到一場過比賽，就可以出現今年日職鹿島鹿角排第3打季後賽贏埋嘅情況，既然一場比賽喺足球咩都可能發生，咁有機會去爭標組嘅中小型球會更有動力去爆冷！

壞處

過往經驗未算成功：其實類似玩法喺港甲時期都試過（97/98球季），當時再複雜啲，聯賽分兩個階段進行，首循環嘅前半列球隊會被編入爭標組，而後半列則會被編入護級組，將佢地當時嘅積分、入球同失球嘅一半帶入次階段聯賽。而如果首、次階段嘅首名出現不同，則會進行一場過的聯賽總決賽定下當季冠軍誰屬。不過呢個賽制只係去到2000/01年球季，翌季就因為足總再次改革聯賽制度而被棄用了。
公平性：頭先提到日職，雖然鹿島鹿角故事夠勵志，但由於鹿島於次循環比賽大跌volt，只係憑首循環分數碌入最終決戰（兩循環總分數為59分，而第一位及第二位嘅浦和紅鑽及川崎前鋒則分別是74及72分），因此亦有人為首兩名大呼不值。

春秋季足球聯賽

以過往阿根廷聯賽及上季日職經驗，其實所謂分春秋季式聯賽，等同雙循環分開踢，因為最後每「季」只係對相同球隊1次，但由於港超聯賽隊伍唔多，不如分兩「季」之餘，每「季」踢夠次循環。

建議玩法

1. 如上述，將一季聯賽分成兩半，但每半都係雙循環聯賽。

好處

比賽數量增加：就咁睇已經知道，比賽數量以雙倍增加。
年青球員機會增加：由於比賽數字增加咁多，自然有更多年青球員有更多機會去為球會應付頻密賽程。

壞處

為加而加：雖然話比賽數量增加，但由於都係咁多隊球隊，其實咁樣只係為加比賽而加比賽，球迷都睇到厭…相信唔會好多人想睇好多次港會對富力掛…
場地問題：香港足球場地問題亦面臨場地不足問題，比賽數字突然增加，場地供應定必十分緊張，而且加上場地保養問題，以本港經驗大家可想而知場地去到最後階段會變成點…

三循環

既然比賽增加兩倍會有場地問題，咁如果變成三循環會唔會無咁激進？

建議玩法

1. 聯賽踢多個循環。

好處

比賽數量增加：由於超聯球隊少，咁加多一個循環多返少少比賽，賽程就密啲，同刺激啲，因為多啲時間畀球隊追失分。

壞處

場地問題：除咗唔夠用，要留意嘅係部分場地不時要作長時間休季保養，以香港大球場做例，年度盛事香港國際七人欖球賽舉行前後都要封場養草，加埋都起碼成1個月唔可以使用。頻密賽程亦會影響有關計劃。
主客場問題：現時港超聯實行主客制，部分球隊（尤其地區球隊）的主場威力驚人，例如南區嘅香港仔運動場就被球迷稱為地獄主場，唔少強隊都喺呢個球場失分已回，強如今季嘅傑志都曾經喺呢個球場全失3分。究竟第3循環應該用邊個嘅主場？定係用中立場？如果用中立場又會唔會令主客制失去意義？
開支增加：呢個問題其實只要增加比賽就會增加，因為多一場比賽，就多一場比賽及訓練開支，更嚴重嘅係如果球員合約係基於比賽場數或僅限於球季進行期間，咁樣比賽增加對於有啲球會嚟講就係一個負擔。

其實講到最後，真係廢話都要講句，比賽密唔密，除咗編賽程，根本仲有好多角度去改善，話簡單亦可以唔簡單嘅係，有人投資加多幾隊波，情況已經好好多。

（本文純屬作者意見，不代表香港01立場。）