【足球.博評】Football Manager球探團隊有幾準?

撰文:
最後更新日期:

講起足球game,除咗最多人熟悉嘅FIFA同Winning Eleven之外,由SEGA推出嘅「足球經理人」(Football Manager) 同樣迷倒萬千球迷。無他嘅,唔似FIFA同Winning Eleven咁個人技術勝於一切,「足球經理人」無得控制遊戲入面嘅球星,你只可以好似一個領隊咁去換人、換陣式、換戰術,之後就「企定定係到」望住電腦顯示屏。筆者開始玩嘅年代仲未有「3D」,就好似望住22個平面氣墊球喺到將個波撞嚟撞去。

「足球經理人」無得控制遊戲入面嘅球星,你只可以好似一個領隊咁去換人、換陣式、換戰術,之後就「企定定係到」望住電腦顯示屏。(網上圖片)

文:列奧C@世界波

除咗過足領隊癮之外,遊戲最令人著迷嘅其中一個地方就係發掘新星。「足球經理人」有真正球探團隊去為佢哋嘅系統收集數據,所以入面年青球員嘅數據都相當值得參考。當年仲係由莫耶斯(David Moyes)執教嘅愛華頓就曾經同佢哋合作,真係透過佢哋嘅球探數據去搜羅球員。

卡朗 (Kerlon)(Getty Images)

當年仲未成名嘅美斯(Lionel Messi),就係遊戲入面嘅「Wonder Kid」同「-10」潛力(即係有高潛質成為球星,以至球王,但因為仲後生,所以唔會固定潛力值,每次開新GAME都有機會唔同)。筆者就最鍾意儲齊全隊都25歲以下嘅新星,仲要個個都做哂自家青訓添。

當然,「聖人都有錯」,小時了了,大就真係未必佳。喺呢12年入面,同「足球經理人」嘅球探團隊預期有巨大落差嘅新星,又點會淨係得最經典嘅美國「神童」艾度(Freddy Adu)?

單單睇以下5位,可能都會發現一地都係眼鏡碎……

  1. 卡朗(Kerlon)

當年以一招「海豹盤球」(即係用腳挑起個波,再用頭一路向前頂過人) 震驚世人,而且佢罰球亦都有一手,當年被視為巴西明日之星嘅佢喺2008年就加盟意甲嘅國際米蘭。最初「海豹盤球」一出確實相當「吸睛」,亦令好多後衛不知所措。不過呢招幾挑釁性嘅過人技巧,就令好多對手都「踢波先踢人」,攔腰連人帶波炒埋一碟。

而唔知係咪俾人踢得多成日傷,定花巧嘢招式難登大雅之堂,卡朗未曾為過國米上陣,之後就接連被外借至基爾禾、阿積士、藤枝MYFC (日本第三組別球隊)等等。28歲嘅佢,由08年離開巴西之後,9次轉會只係出過44次場……

海豹盤球好睇就好睇嘅……

  2. 尼高拉斯‧米蘭 (Nicolas Millan)

曾經以14歲9個月為球隊高魯.高魯出場,打破智利足球聯賽最年輕上陣紀錄嘅尼高拉斯‧米蘭,係「足球經理人2007」嘅最強「WONDER KID」(勁成點?21歲已經可以練到finishing最高嘅數值20...)。當時有傳車路士同愛華頓都對佢有興趣,車仔更安排咗試訓,不過最後就不了了之。

但自從08年佢就俾高魯.高魯接連外借,從此就消失係主流球迷視線,而家只能為智利第三級別聯賽嘅球隊效力......

尼高拉斯‧米蘭 (Nicolas Millan)(ManuClub.com)

  3. 保贊 (Bojan Krkic)

當保贊仲係15歲嘅時候,就已經出現喺遊戲入面。當時仲未有條例禁止18歲以下球員轉會,所以遊戲一開始,好多玩家都必定用盡所有方法「免簽」15歲把握力已經有15嘅保贊返嚟。

現實中嘅佢,初出道確實不負「神童」之名,由8歲開始加入巴塞青年軍,據聞係各梯隊一共射入900球之多 (比美斯更誇張);07年9月以17歲19日之齡為球隊西甲上陣,打破咗美斯保持嘅紀錄,首季就已經攻入咗12球。

不過,巴塞競爭大,「神童」都不能避免,加上美斯如日中天,箭頭位置又接連被伊度奧、亨利同伊巴謙莫域霸佔,最後保贊選擇傳會意甲羅馬。結果,當年飛快嘅速度、敏銳嗅覺、高效把握力都逐漸消失,後來又踢過AC米蘭、阿積士、史篤城,今季又再被外借德甲緬恩斯。昔日「神童」又一個遠離大眾視線。

保贊 (Bojan Krkic)(Getty Images)

  4. 簡拿利斯 (Sergio Canales)

17歲已經為桑坦德喺西甲上陣,表現相當出色,亦都被視為西班牙未來中場接班人。但只係喺桑坦德踢咗2季,簡拿利斯就決定加盟班霸皇家馬德里。當時連告魯夫都曾經出聲反對,但唔知係相信自己有實力定其他原因,佢最後就喺皇馬展開新挑戰 ─ 坐2年板凳。

白白浪費2年,初出道充滿靈氣嘅簡拿利斯漸漸變得平凡,結果轉會華倫西亞之後先慢慢搵返狀態,更被視為大衛施華離隊後嘅繼承人。不過,傷患又偏偏喺呢個時候搵上門,曾經因為十字韌帶撕裂而休戰半年。2014年,佢轉會到皇家蘇斯達,表現再次有所上升,但喺2015年12月,佢第3次十字韌帶撕裂,結果因為1次錯誤轉會、無數次傷患,又一位遠離新星之列……

簡拿利斯 (Sergio Canales)(Getty Images)

  5. 盧連夏 (Lulinha)

曾經為巴西U-17上陣10場射入15球,協助巴西勇奪過U-17南美錦標賽,盧連夏被球探認為潛力驚人都無可厚非。

不過,唔知係咪典型巴西足球搵錢至上嘅因素,無幾耐佢已經堪稱「足球經理人」史上最經典嘅水貨「-10」。當時仲效力緊哥連泰斯嘅盧連夏,唔知球會主席係咪都有打開機,竟然為當時仲未成名,只曾經喺青年比賽中揚名嘅佢標價2400萬歐元。結果?當然唔會有買家出現,同時唔知係咪壓力太大,盧連夏表現越黎越名不副實。最後當然又變為一個球壇浪人,7年轉會9間唔同球會。而家就係南韓K-League嘅浦項製鐵為穩定出場機會而努力。

盧連夏 (Lulinha)(Getty Images)

當然,除咗以上5位,仲有無數「-10」新人表現不似預期:柏圖(Alexandre Pato)、杜斯山度士(Giovanni Dos Santos)、甘素(Paulo Henrique Ganso)、巴洛迪利(Mario Balotelli)……數之不盡。但係又有好多係「用住佢大,用住佢勁」:甘賓尼(Vincent Kompany)、美斯、沙治奧‧拉莫斯(Sergion Ramos)等等都配得起「-10」評估。

講咗以上5位當年新星,當然唔係想話「足球經理人」嘅球探團隊不外如是,反而令人感慨只要行錯一步、轉錯一次會、一次傷患,已經足夠改變將來。

打機,同樣可以參透人生,如果「挪威神童」奧迪加特(Martin Odegaard)當年轉會皇馬之前,咁啱有玩過「足球經理人」;又咁啱佢有用過簡拿利斯;再咁啱佢又有Google下佢嘅profile,成長會唔會唔一樣呢?

(文章純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。