【足球歷史．博評】真心支持足球的政治領袖
相信香港人見證過「關公災難」（即公關災難），證明水唔係亂咁抽，尤其係關於政治或選舉，因為大家做過Fact Check，所有做過嘅事都無所遁形。候任特首林鄭月娥平時甚少就體育方面發言，但就喺早前拉票期間突然探班睇香港隊練波，馬上引來一陣負評。
文：洛迪高＠世界波
不過講起呢樣嘢，其實好多世界領袖都同足球扯上關係。大家第一個記得嘅，就係不時喺德國隊比賽時都會見到佢坐喺看台上打氣同慶祝嘅總理默克爾（Angela Merkel）。呢個時候當然有人會話默克爾只係因為做咗德國領袖先做「忽然Fans」，不過佢就為自己辯解，指自己由高中時代因為去個萊比錫一個球場就鍾意足球。不論孰真孰假，默克爾夫人在位時，不時都進入球隊更衣室探班（包括14年世界盃決賽後），仲試過叫停賽球員下場比賽時坐佢隔離，就算大家話總理係「忽然Fans」，但起碼都睇得出好有心「做戲做全套」，同班球員傾計時，唔會講「就算不是做專業足球員，足球訓練是一種團隊合作精神」呢類九唔搭八兼夾有侮辱性嘅說話。
另一位女領袖球迷就係被彈劾下台嘅巴西前總統羅塞夫（Dilma Vana Rousseff）。巴西人熱愛足球，呢位前總統都唔例外，佢自己就話喺1970年政治囚禁期間，都全力支持巴西隊奪冠，仲話過如果巴西隊可以喺2014年本土奪冠時，就會好似普通民眾咁樣上街一齊慶祝，而結局大家都知喇…當時巴西大敗仲被指會影響當時尋求連任嘅羅塞夫民望。
講咗兩個近年嘅領袖，係時候講年代久遠啲嘅兩位獨裁者——意大利嘅墨索里尼（Benito Amilcare Andrea Mussolini）及佛朗哥（Francisco Franco）。
意大利曾經嘅獨裁者墨索里尼就利用足球爭取自己面子及民望，因為佢曾經想殺死成隊意大利國家隊。如果話嗰陣北韓金仔罰10年世界盃帶領北韓分組賽出局嘅領隊去做礦工好假，咁墨索里尼呢單就珍珠都無咁真…
墨索里尼為咗對外宣傳佢嘅法西斯思想同埋要畀外界睇到意大利「大國堀起」（呢句係咪好熟口面呢？），喺意大利申辦到1934年世界盃時，佢就一手包辦晒所有組織工作，意大利國家隊亦係嗰時決定以天藍色作為主場球衣顏色…大家記得06年意大利國家隊世界盃奪冠功臣，有阿根廷血統嘅甘莫蘭尼斯（Mauro Germán Serra Camoranesi）嗎？其實墨索里尼喺當時已經搵咗唔少甘莫蘭尼斯嘅同鄉踢意大利隊，而且有唔少仲係無意大利血統，只係佢夾硬將班球員改成係意大利人…
為咗贏波贏面子，意大利無所不用其極，甚至話明幫希臘足總喺雅典起樓，令希臘最後放棄比賽…最後喺對當時嘅捷克斯洛伐克踢比賽前，墨索里尼就講出名句：「一係奪冠，一係去死。」最後，雖然捷軍先開紀錄，但意大利最終反勝成功保番條命仔。墨索里尼之後又點？之後佢見希特拉（Adolf Hitler）時，就更有Face了（當屆德國於四強不敵捷克斯洛伐克）。順帶一提，墨索里尼相信都算真心鍾意足球，因為佢喺拉素球迷，仲不時帶呀仔去睇波。
講起西班牙聯賽，大家一定係講巴塞隆拿同皇家馬德里呢對國家打吡老對手。至於點解佢哋係死敵，全因西班牙獨裁者佛朗哥。作為堅定反佛朗哥兼一直想從西班牙獨立嘅加泰隆尼亞，佛朗哥一佔領當地馬上嚟場大清洗，仲打壓當地文化，而且亦禁止球會會徽出現加泰隆尼亞旗幟。其後佢搵皇馬代表政府，利用佢嚟粉飾太平，利用足球吸引民眾，等佢哋唔會上街示威。佢仲利用皇馬嚟打擊巴塞，以削弱對手地區嘅影響力，唔止多次用手段令皇馬喺對巴塞時獲利，更從對手手中搶來後來嘅皇馬名宿迪史堤芬奴（Alfredo Di Stéfano），同時培養巴塞打吡死敵，愛斯賓奴。
上面講咗幾位領袖支持足球嘅原因，雖然佢哋都會畀人質疑係假支持，只係為咗提升支持度及作宣傳效果，但至少佢哋都知道自己應該做啲咩去達成目的，而唔係對住一班職業足球員講啲九唔搭八嘅說話，明眼人都睇得出背後動機同心意。既然林鄭月娥女士已經勝出選舉，希望佢能夠以實際工作推動香港體育發展。
（文章純屬作者意見，不代表香港01立場。）