【足球．博評】港超東方與德甲RB萊比錫，如何應對公關災難？

喺呢個世代，無論你係選特首、做生意、做人或者管理球隊，經常講到嘅兩隻字就係公關。
有，就算你做得唔好，至少有人會原諒你或者畀你多一次機會；你公關差，唔止所有人都會恥笑你，處理得唔好仲會引爆更大危機，相反處理得好，就可以轉危為機。

文：洛迪高@世界波

喺足球世界，球隊嘅PR都相當緊要，我諗老細都唔想自己隊波神憎鬼厭卦…近來香港同德國都有一隊球隊頗具爭議性，而佢哋引起嘅爭議及處理嘅手法都各有不同。佢哋分別係德國嘅RB萊比錫以及港超嘅東方龍獅。

原因：

萊比錫紅牛喺德國球壇被好多球迷同球會討厭嘅原因好簡單，大家亦聽過好多次，就係因為由私人企業做大老闆，恰恰好似暴發戶咁發圍，而且又用咗唔少方法去走規則嘅灰色地帶（例如夾硬話球隊名中嘅RB唔係指紅牛，而係指RasenBallsport －意指草地上嘅球類運動）。結果令到一度惹眾德國球會及球迷反對，有啲球會仲講到明想杯葛作客萊比錫添，甚至嚟到今季多蒙特作客對萊比錫前，多蒙特主席都仲炮轟緊對方。

至於東方方面，相信最為惹火嘅，都係佢哋嘅總監梁守志。梁守志縱橫球壇多年，不時語出驚人，包括指出「香港足球冇得搞，業餘足球才是王道」。到成為東方總監後，近期最具爭議性嘅事件，先係有東方財困事件，佢召開記者會交代事件，但當之後有新投資者後，就亞冠事件「彈出彈入」，玩殘傑志及南區（因兩隊先後申請踢亞冠，而東方被揭原來一直暗地向亞洲足協申請亞冠牌）。至於喺記者會上尚算低聲下氣嘅梁守志就「回復本色」，仲指「足總用聯賽亞軍參加亞冠盃是笑話」，結果令傑志總監伍件要爆Whatsapp對話大踢爆，令東方一時之間成為唔少港超球迷公敵。

及後喺踢亞冠賽事前，先係出現作客恆大前，東方球迷要退飛被指安排失當，要向球迷賠錢，返到主場又出現疑似內地球迷照買主場飛之事，又要再行處理，令一直被覺得霸住個位踢亞冠嘅東方又再處於風口浪尖。

處理：

兩間球會面對嘅公關危機都有啲唔一樣，而處理手法亦有同有不同。

由引起爭議至今，RB萊比錫雖然一夜暴富但尚算默默耕耘，並無土豪式一味搶購明星，而係一步步有目標地引入所需球員，包括一啲新星，好似今年彈起嘅年輕前鋒迪姆華拿（Timo Werner），佢哋同時發展梯隊以及女子足球，尚算有心為德國足球貢獻。另外，萊比錫球會嘅管理層亦甚少就批評發聲，實行「沉默是金」，加上球隊喺今季表現相當驚喜，喺無咩超級明星下向霸主拜仁步步進迫，到而家（截止3月31日）排名第二，除咗上述華拿外亦打起唔少球員，所以形象都慢慢改變。

至於東方，不得不讚喺亞冠方面出現唔少風波後，及後嘅處理手法尚算得體，無引起更大風波。另外就係東方作為第一支，亦係暫時唯一一支出戰亞冠正賽嘅香港球隊，唔少球迷抱住「槍口對外」嘅態度都願意喺亞冠比賽日放下敵意支持東方，而且東方喺亞冠比賽表現唔算失禮，仲成功爭取到入球及第一分，都對東方本身形象有所改善。

香港足球經常被指為「老細足球」，當然未必係一定指「老細」，更正確喺球會嘅一位揸旗人物，而東方就係經常露面嘅梁守志。喺開季發生一輪風波後，無論係梁生及伍生係真拗，定係扮嘈交整Noise，但嗰次事件之後，梁守志的確少了惹火言行，自然有助減少唔少球迷對東方嘅敵意。

大家見親嘅公關災難，其實好多時都係「自爆」，處理失當就更「爆上加爆」。喺香港呢個比較特殊嘅環境，唔少品牌都「瀨過嘢」，證明公關呢個學問，唔係中一個就上一課。呢個時候我就醒起早前特首選戰，胡官同林鄭建議「小心講嘢」，洛迪高都有個小Tips，就係要知道自己嘅位置，先可以作適當嘅反應，如果唔係，只有弄巧反拙。

（本文純屬作者意見，不代表香港01立場。）