【足球.博評】「射波」攻略:球星千奇百趣的缺陣原因

撰文:
最後更新日期:

4、5 月係香港打工仔最開心嘅日子,因為 4 月尾、5 月頭係一年之中唯一有「密集式假期」嘅時候,好多時大家都要睇「請假攻略」決定邊幾日再攞假去達至「以最少大假放到最多連假」嘅效果。

香港地放假係一門學問,想「射波」同老細請假都要諗定原因,唔通真係好似少林足球咁話阿媽小產咩……

今時今日,仲話自己發燒已經 out,係職業球員嘅世界入面,佢地又會有啲咩千奇百趣嘅原因,去交代自己暫時無法上陣呢?

一個喺英格蘭搵食嘅比利時足球員,幫 NBA 拍攝中國市場宣傳片到底係咩玩法……(Laurence Griffiths/Getty Images)

文:列奧C@世界波

  1. 為球會服務——高圖爾斯(Thibaut Courtois)

啱啱嘅英超大戰,曼聯主場迎戰車路士,賽前諗住除咗係兩隊教練戰術上嘅一次較量,仲係兩位年輕世界級門將,迪基亞(David de Gea)同高圖爾斯一決高下嘅戰場。

不過公佈出場陣容個陣就發現車路士改由比高域(Asmir Begovic)把關,結果車路士以 2 球落敗,好多「車迷」都覺得高圖爾斯喺到嘅話點都會好啲。

咁點解佢會突然缺陣呢?賽後車路士領隊干地(Antonio Conte)就話高圖爾斯因傷缺陣,不過英國《太陽報》就爆料,高圖爾斯係同隊友比高域、馬高斯‧阿朗素(Marcos Alonso)、尼敦‧亞基(Nathan Ake)同馬迪(Nemanja Matic)應車路士要求,幫 NBA 拍短片喺中國市場宣傳季後賽嗰陣受傷。

小編諗咗好耐都諗唔到個邏輯關係,一個喺英格蘭搵食嘅比利時足球員,幫 NBA 拍攝中國市場宣傳片到底係咩玩法……就算中國人唔識「勒布朗.詹姆斯」(LeBron James)都一定識「喬丹」(Michael Jordan)啦……唔知賽後開記者會「傷心欲絕」嘅干地諗唔諗得通呢?

講起西班牙同日本嘅關係,大家一時三刻未必諗得到,不過日本外務省同首相安倍晉三就即刻諗起而家唯一一位喺西班牙踢波、效力緊伊巴嘅乾貴士。(David Ramos/Getty Images)

  2. 為國家服務——乾貴士

西班牙國王費利佩六世喺 4 月 4 號訪問日本,講起西班牙同日本嘅關係,大家一時三刻未必諗得到,不過日本外務省同首相安倍晉三就即刻諗起而家唯一一位喺西班牙踢波、效力緊伊巴嘅乾貴士,佢就「被徵召」回國出席費利佩嘅歡迎會。

今次返日本,意味住乾貴士要缺席 2 場西甲賽事,對佢本人同力爭踢歐洲賽嘅伊巴嚟講,都算係一大影響。不過作為一間小球會,伊巴本身相當重視日本市場,除咗球會網站有日文版本之外,今季又試過推出印住片假名嘅日文球員版球衣,所以對伊巴嚟講雖然無咗一位主力球員,不過就係一場 marketing 嘅公關推廣良機。

簡尼沙利斯因為喺屋企沖涼個陣,攞鬚後水甩手,結果一嘢跌咗落自己隻右腳到,導致筋腱受傷,被逼退隊。(Nadine Rupp/Getty Images)

  3. 家居意外——簡尼沙利斯(Santiago Canizares)

2002 年世界杯嘅西班牙,當時首席門將唔係日後不可動搖嘅卡斯拿斯(Iker Casillas),而係華倫西亞門神,簡尼沙利斯。不過就因為喺屋企沖涼個陣,因為想攞枝鬚後水,但就唔覺意犯下門將唔能夠犯嘅錯:甩手,結果一嘢跌咗落自己隻右腳到,導致筋腱受傷,被逼退隊。而代替佢嘅卡斯拿斯,就正式踏上「聖卡斯」嘅封聖之路。而到底枝鬚後水要點跌,先可以搞到隻腳筋腱受傷就成為當時各大報嘅研究課題……

話說有一晚尼斯達打通宵 PlayStation,結果第二日發現手指公筋腱撕裂,要即刻做手術,最後缺陣一個月先好返……(Valerio Pennicino/Getty Images)

  4. 打機惹的禍——尼斯達(Alessandro Nesta)

以中堅嚟講,佢喺球場上可以話係相當瀟灑;亦都成功封阻美斯(Lionel Messi);但亦都係相當容易受傷、有名嘅「玻璃人」,不過尼斯達最奇特嘅缺陣原因唔關對腳事,而係喺隻手到。話說有一晚佢同香港大部分男仔一樣,打通宵 PlayStation,結果第二日發現手指公唔太舒服,檢查之下更係令人「O 咀」,因為佢手指公筋腱撕裂,程到嚴重到要即刻做手術,最後更加要缺陣一個月先好返……

尼斯達可唔可以分享下佢嗰晚係打咩 game?

2010 年,保方長時間養傷,成日同當時老婆 Alena Šeredová 做「愛做的事」,搞到保方條腰頂唔順,最後要禁慾嚟加快康復進度……(Claudio Villa/Getty Images)

  5. 啪啪聲,太好聽——保方(Gianluigi Buffon)

意大利門神保方今年 30 有 8,到而家都仲係反應飛快,之前仲講笑話希望踢到 100 歲。不過咪睇佢而家咁龍精虎猛,保方有一段時間都經常同傷患搏鬥,而原因就令人「紅都面哂」。

2010 年,保方長時間養傷,有媒體就踢爆,原因係嗰段時間佢唔止養傷,仲成日同當時老婆 Alena Šeredová 做「愛做的事」,傳聞保方老婆好「渴求」,仲成日要轉姿勢,搞到保方條腰頂唔順,最後要禁慾嚟加快康復進度……

2003 年,華素爾有日發現自己腳指有個血泡,竟然用無線鑽頭去幫自己放血,最後隻腳就受到感染,要搵返真正醫生幫佢切除部分腳甲……(Ross Kinnaird/Getty Images)

  6. 「醫神」上身——華素爾(Darius Vassell)

喺阿士東維拉成名嘅英格蘭前鋒華素爾跑得快係人都知,不過原來佢仲有另一個無咩人知嘅專業銜頭——醫生,不過係「黃綠」嗰隻。

話說 2003 年,華素爾有日就發現自己腳指有個血泡腫脹咗。一個足球員理論上連剪腳甲都要格外小心,正常情況之下,有個血泡最好當然搵醫生問下點做好,不過華素爾決定「自己血泡自己搞」,佢竟然用一個無線鑽頭去幫自己放血。最後,血係放咗,不過佢隻腳就受到感染,要搵返真正醫生幫佢切除部分腳甲,算係不幸中嘅大幸……

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。