【港足．來稿】南華散班並不代表香港足球無得搞，你睇傑志！
南華散班是否證明香港足球無得搞呢？我覺得唔係。佢只係再一次證明左短視的老細足球係行唔通的。
而長遠的規劃，有耐性的一步一步向前行，慢慢凝聚球迷，先係打破困局的關鍵。
文：重望
我地比較一下南華同傑志的發展路向就會明白其實足球唔止係關於金錢投入，最緊要係有長遠的視野。當年南華在羅傑承注資之後，瞬間變強，重拾班霸色彩。踢法上簡單直接，李海強精準斬波，配合迪天奴以在香港無人能敵的霸王式巨人身型沖頂。呢種即食的踢法，戰績黎得好快好輕易，在最初幾年一次又一次打敗傑志，成為聯賽冠軍。
相反，傑志在當時剛剛嘗試用巴塞式的控球在腳，地波推進，成日被視為華而不實，好睇唔好食。如果純粹以短期的戰績論英雄，傑志一早就應該放棄呢種踢法。但呢種踢法的背後其實係一整套對足球管理的理念。第一，覺得球隊要有一套適合香港人的風格，於是選擇身型較矮小都可以踢出成績的控球在腳。第二，呢套風格，唔止要在職業隊中推行，仲可以長遠地在青訓中實施，將來可以培育出一代又一代的接班人，於是早期會有巴塞足球學校，而今日仍然有傑志足球學院的計畫黎培育年青人從小踢控球在腳的戰術。第三，要青訓與球隊都可以繼續發展落去，就要有自己的訓練設施。於是傑志會願意花幾年時間去堅持規劃籌備商討搵贊助（與政府和馬會傾呢d野可以想像有幾咁麻煩同困難……），在石門搞屬於自己的基地「賽馬會傑志中心」。
傑志的主教練朱志光最近有一篇訪問，講的都係傑志作為一間球會，與其他的香港「球隊」唔同。佢話要放低短期戰果上的得失，同怕輸的心理包袱，而要建立可以嬴的踢法：
以前足球就是抱着怕輸去踢，形勢危險而漫無目的大腳清，最多只立於不敗……足球場上只得一個波，要贏便要識得組織，踢了個波給別人便等於將機會送給對手。你教他慢慢將皮球組織上前場，他們才會成長得快，套在職業足球上亦一樣。
難得傑志管理層有視野，頂得住早期戰績欠佳的壓力，堅持一步一步推行上述的理念，先可以在頭幾年的適應期之後，慢慢漸入佳境。佢地睇的唔係一隊球隊短期的戰績，而係要長遠地建立一間球會。呢間球會有足球風格，有一套可以看門口的戰術體系長期而穩定地運作，有一個又一個梯隊的年青人接受呢套足球體系的訓練，有自己的訓練中心。咁樣的足球先會進步同有前途，而傑志近年的入場球迷亦都一年比一年增多。
南華呢？短視即食的戰術外，儘管當年有重點栽培陳偉豪，歐陽耀冲，郭建邦，陳肇麒，葉鴻輝，李志豪等等優秀的年輕球員，但當新老細張廣勇上場，就會無情地清洗異己，最後只有陳偉豪可以留到最後。老細足球在香港可能好難避免，但有錢都要好似傑志咁有視野地識得駛，先係建立球會之道。
（作者按：有人或者會話傑志今季的戰績都只係來自歸化外援與和香港人有血緣關係的海外球員。但仔細諗諗，居港滿7年的歸化資格其實好難滿足。而和香港人有血緣關係的海外球員就更買少見少。我當然希望將來傑志有青訓產品可以上場，但目前看來好似未夠班，要多等幾年再可以下定論。）
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）