【足球．博評】施丹皇馬執教路，點只靠球王光環？

要知道皇馬咁多位球星，求其搵個頂級教練都未必可以令班球員仆心仆命，仲隨時作反，搞到好似肥賓咁落台。咁施丹唔只係球王而且都喺球會以唔同身份留咗一段幾長嘅日子，就算係C朗都要畀面佢喇。

文：洛迪高@世界波

當施丹（Zinedine Zidane）取代賓尼迪斯（Rafael Benitez）任主帥時，大家都會覺得施丹只會係短期方法——用佢球王光環穩住球隊然後過渡畀新教練；或是係執教後成績未算突出，畀皇馬主席佩雷斯（Florentino Perez）炒魷。當大家覺得結局都係得呢兩個，殊不知施丹已經執教咗皇馬一隊接近年半，已經拎咗兩次歐聯及一次西甲，相信幾奄尖嘅皇迷都滿意施丹暫時成績可以收番埋條白手巾先了。

究竟施丹暫時嘅執教生涯算唔算成功﹖我會話算成功，但係咪正如好多人講「佢係球王咋嘛。」咁簡單？睇怕就唔係了。

當然我唔會否定「球王」身份帶畀佢嘅好處。要知道皇馬咁多位球星，求其搵個頂級教練都未必可以令班球員仆心仆命，仲隨時作反，搞到好似肥賓咁落台。咁施丹唔只係球王而且都喺球會以唔同身份留咗一段幾長嘅日子，就算係C朗（Cristiano Ronaldo）都要畀面佢喇，喺同施丹商量過自己歲數及上陣時間後，都願意減少自己上陣時間（要知道不嬲出名鐵人兼想場場上場嘅C朗，喺今年4月喺無踢過1場西甲作客比賽！），所以你見到莫拉達（Alvaro Morata）及高華錫（Mateo Kovacic）無咩上陣時間都唔會點出聲，球隊亦比以往更齊心去爭冠，小咗好多負面或分裂或分黨分派消息，施丹嘅球王身份都有幫助。

不過唔係撻朵話自己球王，球員就會信服，所以以上情況無發生，都要一讚施丹人事處理。當莫拉達因為被換出發脾氣時，施丹無公開責怪球員仲維護佢，至於一直傳不滿上陣時間太少想走嘅占士洛迪古斯（James Rodriguez），施丹亦多次喺公開場合表示佢會留低等等，係咪門面說話佢哋本人就最清楚，但起碼施丹言行總算得體。

可能又會有人會話佢有無限金錢同支持，連後備席都坐住占士等球星，但事實施丹係咪依仗超級球星呢？其實可能因為任教過皇馬青年軍，施丹都好肯用後生仔。其中陣中鋒將華斯基斯（Lucas Vazquez）喺施丹治下入選過西班牙大軍出戰16年歐洲國家盃，其次就係後衛拿祖費南迪斯（Nacho Fernandez），作為後防萬金油嘅佢可頂防線任何位置都表現不俗，喺球隊地位相信仲高過施丹同胞，今季狀態回落嘅華拉尼（Raphael Varane）。另外一位就係新購入嘅阿辛斯奧（Marco Asensio），今季佢表現可人。如果施丹係迷信巨星嘅，阿辛斯奧又點可能喺唔少戰役取代到巴利（Gareth Bale）同占士？同樣情況同時體現係艾斯高（Isco）身上，今季獲得更多機會嘅佢亦以表現打動主帥同球迷向佢報以支持。

講完人員處理，一位領隊要睇嘅當然仲有戰術。大家都知皇馬球迷想隊波贏未夠，仲要贏得好睇，但有時華麗足球又未必可以帶來冠軍，尤其皇馬防守以往都有為人詬病嘅時候，而曾經踢過意甲嘅施丹似乎就將意式防守帶嚟畀呢隊皇馬，令球隊更均衡。

進攻：以不變應萬變

其實皇馬前場攻擊組合咁多年都無咩點變，而打法亦一直以速度為主，輔以賓施馬（Karim Benzema）喺前線Set波，不過速度一直都喺皇馬最致命嘅武器。至於無壞嘅嘢唔好換，施丹都明白呢個道理，更喺前場增加莫拉達及華斯基斯上陣時間，令前場保持侵略性及機動性，尤其可加強前場迫搶（因為C朗都唔會點防守）。

另外，施丹利用手下進攻球員調教到能夠可中可邊。快速進攻由邊線嘅C朗以及巴利展開，而出現鐵桶陣時，施丹都會用上艾斯高、阿辛斯奧以及占士等細範圍技術較出色嘅球員，利用禁區前沿嘅配合或個人技術打開局面，例如占士就可以選擇自己埋門，破解密集防守。邊線方面由於巴利同C朗喺陣中多數負責內楔，邊線進攻就留畀閘位球員，相信唔洗提大家都會諗起巴西後衛馬些路（Marcelo Vieira），而卡華積（Daniel Carvajal）及丹尼路雷斯（Danilo Ruiz）喺右邊都可以提供支援。至於喺歐聯決賽入面，大家發現C朗不時出現喺右邊線加強進攻，除咗可以加強邊線進攻力度外，亦為中路進攻提供便利。

防守：卡斯米路總結一切

防守方面，施丹嘅皇馬唔算十全十美，不過喺卡斯米路（Carlos Casemiro）使用上，佢就真係打破近來皇馬傳統。皇馬球迷要求球隊踢得漂亮，往往都唔太鍾意好似加維臣（Thomas Gravesen）咁嘅純防中，甚至迫走埋踢得唔錯嘅基迪拉（Sami Khedira）。皇馬心目中嘅理想防中，就係昔日頭髮飄逸嘅舊將，阿根廷中場列當度（Fernando Redondo）。可惜要贏比賽，甚至要贏冠軍始終要有防守，近年中場防守為人詬病嘅毛病，因為有卡斯米路而迎刃而解。卡斯米路活動能力強，當施丹用佢時多數都唔會要求佢進攻工作，拎到波畀其餘中場發辦就算，至於佢主力就喺防守線前作掃蕩，用橫向移動幫兩閘補埋位，而且負責填補防線與中場嘅空間。

佢有幾重要？陣中皇馬陣近中乎無類似球員，而喺佢傷出期間，皇馬防線漏洞百出而且成績亦回落。由於C朗回防意識唔高，所以回防前線回防工作都係交畀右邊球員，即巴利等人。由於施丹並非非常熱衷於前場迫搶，因此喺巴利回防時，皇馬防守陣式就會變會由451變成442，卡斯米路就會因應唔同情況選擇到中場搶波，或者回後填補縱深空間，而因為佢嘅特點，令施丹點都要頂住壓力派上佢而唔係貿然使用占士呢位高價買入嘅球星犧牲球隊平衡。

因為後防擁有運動能力強嘅拉莫斯（Sergio Ramos）及華拉尼等人，所以如需要前場迫搶而需要卡斯米路站位較前時，後防亦唔會太怕對手打反擊，但值得留意嘅係，由於個別後防狀態及情緒問題，導致有時後防會失去冷靜，當對手越過卡斯米路後，對手要單對單時，皇馬往往要因此而令後防陷入危機，因此卡斯米路就成為施丹中場最不可代替嘅一位，呢個就係施丹下一季需要解決嘅問題，因為得巴西中場一個絕對唔夠用。

臨場調動/戰術彈性

施丹任助教時曾跟安察洛堤（Carlo Ancelotti）學法，相信佢其中一樣學到嘅野就係不拘一格，人員及戰術部置都具彈性。雖然皇馬多數時間使用4231，但因應自身陣容及對手，施丹都願意作改變。其中喺今季首循環作客馬德里體育會時，由於失去比比（Pepe）、拉莫斯、卻奧斯（Toni Kroos）、卡斯米路巴利及賓施馬，皇馬變陣4411，派上高華錫與同胞摩迪歷（Luka Modric）把守中場，前線用上艾斯高及C朗攻堅，最後大勝3：0令人驚艷及欣賞施丹的戰術彈性。而季中一啲比賽都證明佢唔會死抱4231，而會因應對手作出更多嘗試，除咗442外，仲有歐聯對陣歷基亞時嘅424都證明一切。

至於喺臨場指揮方面，大家可能只會記得皇馬喺逆境淨係靠拉莫斯入波救全家，但大家未必睇到施丹喺呢啲情況下作出嘅調動令對手防線一直守壓，而侵略性正正係佢要求球隊喺落後做到嘅嘢，而喺領先嘅時候，球隊亦會適時作防守，而唔會因為「皇馬」之名而迫住一直進攻導致得不償失。

可能因為踢過意甲而又跟過安察洛堤，施丹喺人事管理頗為傾向意式（更準確地講係安式管理），戰術彈性亦頗貝安氏風采。佢嘅球王光環，亦令佢喺球場內外盡得民心。不過隨住佢任教皇馬季半已經得到兩個歐聯及一次西甲，相信佢面對嘅壓力只會越嚟越大，而當中已經有唔少困難需要佢解決，包括中場三人組輪換問題，摩迪歷、卡斯米路及卻奧斯三人組固然屈機，但佢哋都試過養傷日子，呢方面需要施丹去衡量中場人員配置。

另外施丹對於年輕球員使用，喺成績壓力下仲能否保持都要時間去衡量，而當主席強行買星安插陣容下要如何處理，都有待進一步考驗。面對如此情況，不得不說施丹尚有球王光環可好好善用，更衣室問題應該問題不大，加上冠軍必能為佢賺到更多時間，但千萬唔可以忘記施丹現時起點極高，未來面對嘅期望及要求，只會更高。

（文章純屬作者意見，不代表香港01立場。）