【打機.博評】沒有最真只有更真!PES與FIFA緊貼現實足球發展

撰文:
最後更新日期:

文:洛迪高@世界波

足球貴為全球其中一個最受歡迎嘅運動,喺電子遊戲界有相關題材嘅遊戲一啲都唔出奇。如果要大家唔準諗即刻講出有咩足球遊戲,我相信無論你係咪球迷或電子遊戲愛好者,都可以講出《Pro Evolution Soccer》(即《Winning Eleven》,下稱《PES》)及《FIFA》兩大系列。呢兩個品牌,尤其是《PES》系列陪伴洛迪高成長,筆者喺咁多年打機同睇波歷程中,從呢兩款致力追求貼近現實足球嘅足球遊戲咁多集嘅演變,都可以睇得出足球世界點樣出現變化。

球員能力細節化

進攻17、防守17、加速17及速度17等等數字,係多年前《PES》入面球員可能出現嘅能力數值。當時球員數值相對簡單亦無分得咁細,直至今時今日已經唔同晒,技術、反應、力量、身體平衡與射門力量等分得好細,相同情況自然都出現喺現實足球世界。因為科技越嚟越發達,更多科學技術可以應該喺體育上面,球員嘅身體及能力更易量化作量度,球隊更可以因此就每個球員特性制訂特別訓練及飲食餐單。

《PES09》

《PES16》遊戲數值變得更仔細,亦有更多球員風格。

緊貼戰術潮流

長傳急攻係咪一定踢法陳舊?睇足球遊戲就知道佢哋同你講:係,至少同時反映現實足球戰術潮流。《PES》系列以往經常出現屈頭鎚戰法,而兩翼進攻往往令成場比賽節奏勁快亦受好多英式球隊青睞,但隨住巴塞tiki-taka成為戰術潮流,昔日獲讚夠刺激嘅《PES》節奏,成為唔少追求真實嘅玩家嘅批評對象,認為遊戲太快唔似現實,而喺呢個時候就畀標榜夠真嘅《FIFA》追上嚟。事實亦係《FIFA》喺節奏上更貼近現實足球,唔係傳兩腳就已經去到對方三閘線,而喺17年呢一集,更強調嘅都係傳送配合,而喺兩款遊戲嘅17年一集,就咁傳中已經好難入了,至少真係要掌握技巧,變相迫大家要喺中路諗辦法搵食。

個人主義不再

隨住現實足球越嚟越團結整體,球星嘅個人發揮已經唔再係球隊依賴嘅嘢。而喺兩大足球系列入面,個人技術越嚟越難出,好似《PES》系列入面好多技巧本身好易出,而家就同《FIFA》系列咁要記住出招表咁,亦唔係個個用到,算好真實...而上面提過《FIFA》喺17年呢一集就好強調傳送嘅重要性,以遊戲系統對英雄主義作出貶抑。 

球探系統

上面講過球員能力無論喺遊戲同現實都更細化更仔細,連帶球探系統都可以由遊戲中睇到現實世界嘅變化。喺遊戲入面,你可以好仔細地去搵你需要嘅球員作收購,亦可以從類型出發搵出適合你嘅球員。至於喺現實,球會搵球員都一樣,可以由細節出發(因為科技越法先進,令資料搜集更仔細及全面),亦可以由領隊發辦,好似開聲想搵個頭鎚強嘅球員,球探就可以去搵相關類型球員。點解可以咁﹖舉《FIFA》做例子,就係《FIFA》系列現時同一個有9,000人嘅資料蒐集組織合作拎球員同球隊資料,簡直十足頂級職業球會咁。

Marketing的重要性

由於兩大足球遊戲現時競爭激烈,遊戲本身發展得好成熟同市場已經幾飽和,而且分別唔算好大,算各有各特色,所以遊戲廠商已經未必令遊戲好易吸引到新玩家或留住新玩家,所以撇除質素本身,廠商都要整色整水,包括喺宣傳上下好多功夫,務求大家一講到玩咩足球遊戲都會第一時間提起自己品牌。除咗越嚟越勁嘅宣傳同巨星代言(《FIFA18》搵嚟C朗(Cristiano Ronaldo),《PES》就用巴塞隆拿同多蒙特等球會掛帥)等方法,而《PES2017》仲搵嚟伍家謙同Keyman馬啟仁初試啼聲,做廣東話旁述。呢啲方法同球會宣傳自己都有異曲同工之妙,例如搵當家球星掛帥行銷球會品牌(曼聯搵嚟普巴),喺社交媒體與球迷接觸等方法,都係球會搶fans方法。

兩隻遊戲已開始宣傳,《FIFA》系列睇圖都知用邊個做代言人,《PES》就有巴塞,仲喺trailer重演埋歐聯反勝巴黎聖日耳門。

當然有啲野係現實足球世界同足球遊戲唯一不變嘅。

年輕最好

玩單機聯賽模式,尤其是《PES》系列Master League,每個玩家都中意尋寶,尤其是要買幼齒自己養就特別有成就感,老將就早早拜拜,情況就如同而家現實足球嘅新星井噴,唔少頂級球會都有年輕化趨勢,而新星們亦好早熟,因為一早接受系統訓練而可以投身職業球壇,而且更係成名要趁早,好似盧卡東尼(Luca Toni)呢類大器晚成嘅球員只會越嚟越罕有亦好難爭贏後生仔。

反擊最好

頭先雖然講到兩大遊戲系列都刻意減慢節奏,不過喺現實同遊戲入面,最客易創造到入波都係防守反擊。

未來展望

今時今日,唔少玩家已經覺得每一年新嘅遊戲只係更新下轉會同波衫就可以出新一集。如果放落近幾年,呢個講法都可以成立,不過筆者同時認為未來一兩年就會唔同講法。而喺啱啱舉行嘅E3遊戲展入面亦開始印證有關說法。《FIFA》正式宣佈有關新一集嘅細節,而一如所料佢哋都係希望遊戲更形真實,例如動作方面會更似真人,而亦會增加更多球員個性(即球員本身習慣或動作,就好似拉莫斯鍾意放對手喺後面防守咁。)而為咗等玩家唔洗再一味玩傳控足球,《FIFA》會再次加多啲扭波動作,而喺傳中控制上亦會加入更多動作令動作更真更細緻。

另外,由於現實足球而家有更多戰術陣式變化,唔再係一味4231或451,3後衛更慢慢重新受歡迎,今集《FIFA》會加入更多戰術變化及隊伍風格畀玩家用,緊貼足球潮流發展。至於《PES》系列,可能見到好多球隊都有用非一般嘅罰球配合去入波,所以佢哋喺新作到會增加自由球戰術畀玩家發掘更多創意自由球。除此以外,因為而家好多教練都重視門將嘅腳下技術,所以《PES》都唔執輸,決定令龍門盤球動作更自然,仲加多啲傳完波畀隊友後嘅動作,等大家可以學哥迪奧拿咁好好享受龍門腳下功夫帶畀自己嘅樂趣。不過就算點變,筆者最鍾愛嘅陣式,永遠都係433,你哋呢?又會唔會喺遊戲上有一啲自己嘅堅持?

足球遊戲都開始同現實足球世界球隊一樣,戰術更細化。

講咗咁耐,有趣嘅係,足球運動員有好多都鍾意打《FIFA》或《PES》,就好似曾經沉迷其中直頭打到唔想去練波嘅「戰神」伊巴謙莫域(Zlatan Ibrahimovic)。效力英超車路士嘅巴舒亞伊(Michy Batshuayi)仲癲,曾經走去投訴《FIFA》將佢傳波數值設得太低,威脅「轉會」玩《PES》。拜仁慕尼黑後衛曉姆斯(Mats Hummels)仲講過,可能會有職業球員會將喺《FIFA》入面吸收及學到嘅野應用到球場上。雖然到目前為止呢種說法無從稽考,但既然足球遊戲越嚟越專業同貼近現實足球,咁又點會無可能呢﹖隨住電競越嚟越受大眾認同,《FIFA》同《PES》系列都已經向呢方面發展,隨時跟埋真實足球咁有個好似歐聯或世界盃咁大影響力嘅比賽㗎!

唔好以為球員唔會點打機,巴舒亞伊就認真到要投訴…(Twitter)

(本文純屬作者意見,不代表香港01立場。)


X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。