平機會主席表示「識你老細」 何式凝受「寵」若驚

撰文:
最後更新日期:

何式凝聲稱,陳章明向她表示「同你老細好熟」,到底係咪意有所指?何式凝稱,受『寵』若驚。(江智騫攝)

當有人三唔識七,突然同你講「我識你老細」,你會點反應?

港大副教授何式凝尋日喺 Facebook 出 post,表示前幾日收到平機會主席陳章明嘅 email,回覆有關性小眾平權問題同埋「博士工廠」國力書院醜聞風波。何式凝同陳章明立場不同,本來好地地切磋討論,未嘗唔係一件好事。但係陳主席喺 email 結尾加咗一句:

"I have been working closely with X (我的教授同事)Y (我的教授同事)Z (我的教授同事)and T ( T 就是我的部門主管)in your Department, I hope they take me from a different perspective."
(節錄自何式凝 Facebook)

何式凝記得,同阿陳主席只係今個月中喺一個港大研討會碰過面,當面傾過幾句,一啲都唔熟。忽然得到陳主席關顧,特登用公司 email,鉅細無遺逐點回應平權問題同醜聞風波,仲話「同你老細好熟」,心諗係咪意有所指,有弦外之音?

就係咁,陳主席又成為新聞人物喇。純計曝光率,佢紅過前主席周一嶽架。都未上任,就因為嗌錯同性戀者做「老同」(吸毒者),俾人質疑到底熟唔熟書。又支持設立閉禁式難民營,點知原來係「蠱惑的槍」,嚇吓公眾,好快手咁收回言論。到一上任,就收到傳媒大禮,揭發佢早兩年為「博士工廠」國力書院出任論文導師,幫學生唔使一年就讀完博士學位,賺到外快,但冇向嶺大申報。陳主席原本答人「唔使申報」,隨後改認「其實要申報」,唔好意思記錯咗。

學「關公」話齋,新聞冇分好醜,最緊要有嘛。之前仲有人質疑陳章明冇乜知名度,做主席好唔好,而家知名度咪唔錯囉。

講返何式凝事件,平機會之後回應話,主席嗰封 email,只係表達想法,絕無恐嚇。提起何式凝上司,係因為「佢老細同我共事過,比較了解我為人」,希望可以減少何教授對佢出任平機會主席嘅疑慮喎。

 

 延伸行動: 

打工最緊要泊個好碼頭,而且原來識人老細仲可以聯誼!以後見到新朋友,唔止要講「How do you do?」,應該講「How do you do? I know your boss.」。嗱,呢啲就係職場智慧喇。



X
X
請使用下列任何一種瀏覽器瀏覽以達至最佳的用戶體驗:Google Chrome、Mozilla Firefox、Internet Explorer、Microsoft Edge 或Safari。為避免使用網頁時發生問題,請確保你的網頁瀏覽器已更新至最新版本。