【三個傻佬學煮餸】送畀老婆：橙酒牛油果蟹餅　

馬傑偉多年來頗為自我中心，我行我素，並不懂得體貼身邊人。
煮餸亦都係自我中心，天馬行空，幾乎可以講係——亂嚟！
三傻呢個project，對馬仔而言，最大的效果，就係 stop being so self-centered！聽吓Jim & Jeffrey嘅批評，留意下身邊人的口味。

馬仔自以為關心愛妻，究竟佢鍾意食乜呢？明知 Louisa 愛吃牛油果，馬仔從未食過。今次為煮愛心菜，首先係大啖大啖食牛油果，嚐一嚐那種軟綿綿的質地和味道。

在西貢餐廳點過一道牛油果 crab cake，Louisa 超喜歡。好啦，就整呢一味。

Jim & Jeffrey 對馬仔煮餸的評價，就係味道勁複雜，可惜各走各路，複雜味道混亂而不統一。好，馬仔聽教聽話，今次要將味道統一在蟹湯之中。到超市買急凍蟹腳，拆肉，把剩下的蟹殻焗至金黃，蟹殻加洋葱煮高湯。呢個湯底，用以統一這個三層蟹餅的主調。

熱湯底用來開魚膠粉，雪凍後成啫喱狀，加點茄膏、檻欖油、日式沙律醋，就可用來作各個蟹餅層的調味。我最後加入一個 magic touch：鮮橙汁配法國君度橙酒，蟹清湯與橙酒成為匹配的主要味道。

蛋糕底層，火箭菜，微苦微甘，加入啫喱醬，做個 base，然後加牛油果泥，既可作「固定劑」，又有清甜滑嫩的味道，你可視之為蛋糕之間的奶油。第二層，是蕃茄碎，上面再加牛油果泥。第三層是蟹肉混和蟹湯啫喱。面層再放上牛油果。

上碟賣相，悉隨尊便，扮得靚靚便成。

↓↓ 三個傻佬實驗食譜 ↓↓

做 法

蟹腳拆肉後，加黑胡椒，檸汁，備用。
選熟透牛油果，去核取肉，壓拌成泥，備用。
火箭菜切碎，可加果仁碎混合，備用。
鮮茄切粒，加茄膏砂糖，備用。

蟹湯啫喱
蟹腳去肉後，蟹殻焗至微焦，亦可煎香，加水、洋葱、油鹽，水滾後慢火煮一小時。
熱湯沖魚膠粉（無味啫喱粉），加鮮橙汁及法國君度橙酒，雪凍凝固。
切碎粒，混和檻欖油、日本沙律醋，即可加入火箭菜、蟹肉，最後砌出美味crab cake。

小貼士

1.　到蛋糕專門店，買通心金屬圈，用來set好層層蛋糕的圓形。
2.　蟹湯啫喱的味道自由調校，魚膠粉多少要自己做測試，雪凍後不要太硬不要太稀。Magic touch：橙汁與橙酒。
3.　可烘麵包後切成小方塊佐食。

（本文純屬作者意見，不代表香港01立場。所有圖片由作者提供。）