【意甲.博評】盛世不再 復興路長

撰文:世界波
出版:更新:

文:洛迪高@世界波

隨住托迪(Francesco Totti)退休,以及老牌球會帕爾馬升上意乙,令洛迪高同大家一時再將目光放喺意大利足球上面。意大利以前叫「小世界盃」大家都知,近年意甲唔只因為假波醜聞成為被恥笑對象,球會成績及比賽場面都被指每況越下同好悶,但意甲被認為嘅「沒落」原因係啲咩﹖仲短期內仲有冇希望重拾昔日榮光?

比賽水準:傳統的「錯」?

意大利足球長久以來喺大眾心目中等於悶。如果淨係睇刺唔刺激同多唔多波入,可能意甲未必啱大家口味,但意甲嘅保守唔係因為功利主義,而係因為佢哋好睇重戰術嘅發揮,例如球員企位,三線之間嘅距離等等。由於佢哋對呢樣嘢嘅執著,確信完美執行到呢啲指令先贏到波,所以佢哋喺比賽入面嘅焦點係執行好企位等指示,所以如果單從數據出發,可能球迷會覺得悶,但如果係欣賞當中技戰術,相信大家就唔會覺悶了。如果堅持拎數據,咁樣意甲對比番西甲、英超同法甲三個同樣有20隊球隊嘅聯賽,意甲今季入球總數排名其實係第一,有1,123球,被認為崇尚進攻嘅西甲有1,118球,被指節奏快好睇嘅英超得1,064球。法甲就……得991球。
 
可惜講起睇波,球迷們甚少就咁受國家同聯賽吸引,更多嘅當然係撐球星同球會!不過因為新星匱乏,加上老牌球會沒落,都影響意甲嘅影響力及受歡迎程度。

老牌球會帕爾馬升上意乙(Parma Calcio 1913 Facebook Page)

傳統強隊沒落

意甲盛世,亦即係大家成日講嘅「七姊妹」時期,每隊球隊各有各魅力吸引唔少球迷,可惜因為各種原因(好多都係因為財政問題),當時有不少球迷嘅「紫百合」費倫天拿同上文提到嘅帕爾馬都試過因財政問題降班,花費數年先可以爭取重回最高舞台。缺少有底蘊嘅球隊,意甲近來發展開始獨大,來來去去前三都係果啲球隊,冠軍直情係得祖雲達斯一隊玩晒,喺米蘭雙雄無力稱雄之際,你會見到不少中遊球隊趁勢而起,好似烏甸尼斯及阿特蘭大,但礙於財政實力或球會方針,呢類型球隊往往未能繼續好表現,更連年賣走主力球員,結果你方唱罷我登場,就給予其餘球隊機會飛上枝頭。正因為意甲中遊勢力出到歐洲賽後暴露缺陷,更甚係下翌季已面目全非,如阿特蘭大已賣走今季中場主力基斯爾(Franck Kessie),令目前為止歐戰僅得祖雲達斯為意甲爭面子外,更令意甲及其他球會難以利用歐戰成績為自己球迷數字達到持續增長。成績無保證,球會又何來會有一個長期規劃去開發市場增加球迷呢?

另外因為歐戰成績唔出眾,令意甲歐聯席位減少,只得2個直接晉身分組賽席位加1個外圍賽參賽資格(不過之後會變番3+1,算係好消息。),咁樣都會影響到利益,令意甲整體經濟狀況無法變好。而因為球迷數字因為意大利球會成績唔出眾無法增長,亦會影響球會收入令其雪上加霜無力投資造成惡性循環。

「意甲七姊妹」。(Parma Calcio 1913,F.C. Internazionale Milano,A.C. Milan,AS Roma,S.S. Lazio,ACF Fiorentina,Juventus Facebook Page)

欠球星-全因廢除共有權?

講完球隊當然係講球星,意甲有個獨特文化,就係每支球隊都總有一位超級核心,就算喺中下游都總有一位球員單天保至尊,每次隊波入波,你都可以估到好大機會同佢有關,就好似布雷西亞時期嘅巴治奧(Roberto Baggio)、安玻里嘅達雲奴(Francesco Tavano)、阿特蘭大嘅當尼(Cristiano Doni)以及博洛尼亞時期嘅迪亞文迪(Alessandro Diamanti)等人。而係意甲七姊妹時期,唔少球隊除咗核心球星,都有一時才俊喺身邊輔助如卡拉斯奧路(Andrea Caracciolo)同甸奴巴治奧(Dino Baggio)等。有時仲會出現鐵三角組合,好似AC米蘭荷蘭三劍俠同國際米蘭德國三頭馬車。就連帕爾馬同費倫天拿等球隊都會有黃金拍擋,例如帕爾馬後防鐵三角保方(Gianluigi Buffon)、杜林(Lilian Thuram)及簡拿華路(Fabio Cannavaro),往後嘅阿祖安奴(Adriano)搭梅度(Adrian Mutu);紫百合嘅迪利維奧(Angelo Di Livio)與基艾沙(Enrico Chiesa)以及羅馬嘅托迪及蒙迪拿(Vincenzo Montella)連線。

講番單天保自尊,其中一個被遺忘嘅轉會特別制度-球員共有權。球員共有權雖然喺最後處理上比較麻煩而且被視為對球員有害,但咁樣令小球會可以用較少代價得到喺原本球會(多數都係豪強。)無咩上陣機會嘅球員同新星,令佢哋得到發揮機會,就會出現好似基奧雲高(Sebastian Giovinco)、恩莫比尼(Ciro Immobile)、貝拉迪(Domenico Berardi)等成功例子。可惜由於共有權對國外球會太複雜,令球員留外機會較細,並於14/15球季後終告完成歷史使命,但由於小球會已失去可用更少代價得到球員,令佢哋喺現時日借用制度下已唔願意花太多心機畀新星們。

雖然意甲新星唔算太匱乏,但比起以往好多有「球味」嘅球星,而家已經好少出現了。不過呢個唔係淨係意甲問題。現今足球趨勢傾向團隊化亦移向邊線,令唔少極有「球味」嘅十號核心如上文提到嘅巴治奧等人都極難再現,加上現今足球已經無咗9號半呢個位置,但往日意大利盛產嘅就係托迪、卡斯辛奴(Antonio Cassano)同迪比亞路(Alessandro Del Piero)等類型嘅「Fantasista」,以自己嘅創造力及靈氣創造機會,但現時足球世界重團體亦越嚟越唔依賴個人,Fantasista喺球隊嘅發揮空間越嚟越小,唔只人數極小,就算有,佢哋都要「屈就」自己成就球隊。試問大家仲會唔會見到托迪隨心又瀟灑到爆嘅後踭甚至倒掛傳波?呢種自由同隨心,就連世界球壇都更罕有,亦不鼓勵。

帕爾馬時期的保方(Gianluigi Buffon)(Juventus.com)

廉價外援湧入

由於經濟問題,不少球會老細為求成績及經濟回報,都選擇速食而非作重點培養青訓呢類未來之舉,相反就不時選購廉價外援作即戰力。此舉不但擠壓本土球員上陣時間,亦同時影響比賽觀賞性(因大部份外援均無本土球員從小培養的戰術素養。),於比賽中多見的(多數時候是中下游的賽事。),係盲無目的橫衝直撞,係毫無目標的長傳急攻,所以令唔少球迷覺得比賽好悶及好無內容,亦球迷好難坐定定睇晒全場……

未來希望

意甲隨住環球經濟變差亦因世界足球大勢而同時慢慢喪失球場內外嘅吸引力,不過係咪全無希望?咁又未算,但短期需要外資幫手。

筆者所舉之例就係好似AC米蘭新任老細咁嘅外資,雖然對於意大利國內嚟講不乏反對聲音,但短期嚟講如果外資能夠提高購買力及投資,以有助提升成績,咁樣對國內聯賽都有脾益,例如當有球隊有能力帶動意大利球壇內球員轉會,能夠回收資金嘅一啲球隊就可以有更多錢去作投資或作本身培養青訓之用,如阿特蘭大等球會喺賣咗主力球員,就可以用有關金錢作其他有益球隊嘅投資,變相即係刺激到「消費」。而且AC喺新老闆入主後一完季已火速簽下四位新兵,大家有幾耐無見AC球迷咁開心?而且以AC老牌勁旅身份,更加有利於球迷增長。

可惜上述所指為短期之法,以米蘭市另一支球隊為例,國際米蘭不乏資金,近年卻一直於動盪中渡過,證明有錢唔係大晒,有方針先為發展之道,而且外資屆入,令本身勁旅青訓上陣機會更少,當無咗球員共有權後,年輕球員更難得到高質嘅表演及培訓機會,雖然從年青球員上陣機會嚟講,意甲仍比英超優勝,但當中展示的特性,早已非難比昔日球員之風範,就連獨當一面之新星亦越見越少。尤幸與新星上位情況相比,意大利少帥表現更值期待,如干地(Antonio Conte)及迪法蘭斯高(Eusebio Di Francesco)等人,為球壇帶來新鮮元素,而戰術素養之豐富及創新,都係意國足球之傳統!

2010年里賈納對拖連奴(Getty Images)

最後同大家講一次趣事,就係洛迪高曾經喺幾年前喺香港時間凌晨時份起身睇一場意大利盃比賽,由當時仲喺意甲嘅里賈納對拖連奴,場波比數0:0,要互射12碼仲要射咗十幾輪,最緊要嘅係,成場比賽我睇唔到有任何一位觀眾(可能坐咗喺電視直播睇唔到嘅地點卦……),我有一刻認為成個世界可能得我一個睇緊呢場波…嗰陣對於咁都幾唏噓。對於筆者一直以嚟因為情意結關係一直幾留意嘅意大利足球,希望能夠盡快復甦,回復昔日「小世界盃」嘅風彩,咁先係球迷之福。

(文章純屬作者意見,不代表香港01立場。)