【打機．博評】《PES》存亡，繫於電競與3打3模式

文：洛迪高@世界波

如果講而家操作球員打機嘅足球遊戲，相信大家講得出嘅都係《Pro Evolution Soccer》（《PES》）同《FIFA》系列，不過要講兩分天下又唔太公平，因為大家有眼見嘅係，後者喺全球市場佔有率，都係佔大多數。

不過今集嘅PES增加3對3模式（對戰或組隊對電腦皆可），可見本身都有電競比賽嘅系列增添更多競賽性。筆者夠膽誇張講句，今次呢次3打模式，將會係系列能否繼續發展甚至力抗強敵不至絕種嘅關鍵！

不過對於電競方面尚未了解好深嘅筆者，對於《PES》呢個三打模式，首先吸引我嘅係回憶。筆者出此言嘅原因在於諗起昔日一大班朋友打《PES》時嘅日子，無論喺做對手定合作打電腦依嘩鬼叫。雖然而家唔洗見面都可以網上打，但對戰的話感覺始終有啲唔同。因此大家會見到《FIFA》系列Pro Club系列咁受歡迎都係其中一個原因，因為可以畀到成班人一齊玩同吹水傾計嘅樂趣，呢種樂趣係同陌生人玩畀唔到嘅。

講番今集《PES》嘅三打點解會咁吸引，原因就係互動！因為三打牽涉到合作，就算你幾陌生都好，要踢好場波都係要溝通，咁樣你會話同《FIFA》Pro Club係無分別，其實都只係部份正確，因為喺Pro Club入面，每個人係控唔同角色（有一位玩家可以控晒其他人），而《PES》入面就係三人控制全隊，所需要嘅溝通更多，而且可能出現嘅錯誤亦更多，咁如果成班朋友（遊戲入面可以設立公會集合同伴。）一齊玩，無論喺對人對電腦都一定好多笑料，而如果想踢得好，鍛鍊「球技」同時亦要鍛鍊默契。唔似Pro Club咁控一個人完成一個人嘅工作，三打就可以變成一個操作者負責用唔同球員包位，有啲去防守包波咁。進攻亦唔係一個人做一個人嘢，而係可能有一位玩家專負責用唔同球員扭波等等，每位玩家（最多三人）需要負責嘅時就更多。

呢個特性亦係筆者對於《PES》系列發展電競方面比較樂觀嘅一個特點，因為本身無論係《PES》定《FIFA》本身一直搞緊嘅比賽，都無一個可以帶出好似呢個三打模式咁嘅效果。雖然可能性唔大，但試想像台上嘅電競選手三人合作，好似普通筆者同朋友咁一路玩一路癲爆互動，都係一種趣味，而三人入面嘅合作同默契，就更值得人研究同細味，所以筆者夠膽講句，如果喺三打方面能夠打得起，可以為《PES》系列於電競作出新突破，可以令人忘記佢喺版權上面嘅缺陷，專心同朋友夾好默契！事實上喺香港，已經有官方公認嘅比賽，重心就喺2V2上面，證明有關方面都知道喺電競發展甚至往後作品中，2V2／3V3要發展順利先可以令《PES》系列繼續喺市場擁有佢獨特嘅價值！

（本文純屬作者意見，不代表香港01立場。）