【德甲.博評】安帥只是代罪羔羊 拜仁未能一勞永逸

撰文:世界波
出版:更新:

文:洛迪高@世界波

安察洛堤(Carlo Ancelotti)隨住季初成績欠佳,以及傳出與部份球員關係不佳,被球員迫宮而最終離職,洛迪高就認為亟需改革嘅拜仁請來安察洛堤其實係一個錯嘅決定,令拜仁近年只能原地踏步。不過執教拜仁成績尚算平穩嘅安帥,絕非拜仁近期動盪嘅唯一兇手,甚至係一個代罪羔羊。

漢尼斯必需離開球會?

漢尼斯(Uli Hoeneß)因為暪稅入獄,需暫時免去於拜仁嘅職位,期間言談似乎無以前咁樣得罪人多,但自從出獄重返拜仁任職,佢就強勢依然。雖然近期佢請來同佢好好朋友嘅拜仁三冠功勳教頭軒歷基斯(Jupp Heynckes)出山任過渡教練,執教球隊至季尾穩住球隊,但漢尼斯嘅存在,恰恰難以令球隊成功改革。首先在於佢地位太高,而且同陣中一啲效力已久嘅球員有深厚關係,而如果新嚟嘅教練令佢哋唔滿意,佢哋亦大有可能越過新教練搵漢尼斯扭計,而家謠傳新教練會係年輕嘅杜慈(Thomas Tuchel)或拿格斯文(Julian Nagelsmann),佢哋本身控制更衣室已經有困難,萬一球員搞事而去搵漢尼斯告狀,同樣會令球隊陷入混亂。

漢尼斯(Uli Hoeneß)因為暪稅入獄,但自從出獄重返拜仁任職,佢就強勢依然。(Getty Image)

拜仁改革何以找安帥?

安帥於球壇出名係一位老好人,長處在於與球員相處。拜仁陣容老化需要換血,本來已並非安帥強項,但考慮到拜仁陣中老臣子眾多,包括洛賓(Arjen Robben)及列貝利(Frank Ribery),喺換血過程中如果遇到球員不滿,執教以來戰績輝煌嘅安帥可以起到壓陣作用。可惜拜仁方面,似乎高估咗安帥嘅能力,加上喺今年夏天,拜仁並無進行大換血,相反主力收購只係簽入杜利素(Corentin Tolisso)、魯迪(Sebastian Rudy)以及蘇尼(Niklas Sule),不少冗員尚未清走,安帥未能換血之餘,最後又未能好好提升拜仁實力,結果需掛冠求去。

考慮到拜仁陣中老臣子眾多,包括洛賓(Arjen Robben)及列貝利(Frank Ribery),喺換血過程中如果遇到球員不滿,執教以來戰績輝煌嘅安帥可以起到壓陣作用。(Getty Image)

陣容不整

上面提到大換血,事實上拜仁陣容不少主力老化之餘,其中打算用來接班嘅球員似乎又未能成功接班或好好頂替,如法國翼鋒高文(Kingsley Coman);而本身表現唔差嘅巴西翼鋒杜格拉斯哥斯達(Douglas Costa)又遭外借祖雲達斯,結果今年於列貝利表現較低迷時,拜仁卻未能好好找出代替品,而門將紐亞(Manuel Neuer)受傷時,後備門將烏列治(Sven Ulreich)表現都算慘不忍睹。另外有不少球員受傷患所困大大影響表現,如左閘阿拉巴(David Alaba)及中堅謝路美保定(Jerome Boateng),都影響球隊默契及人腳。洛迪高亦可以見到有唔少球員似乎已經贏慣,喺鬥心上已經開始減卻,代表球員就係德國國腳曉姆斯(Mats Hummels),筆者就更加唔需要睇到一啲本身實力已經配唔上拜仁嘅球員了,就如巴西閘位球員拉芬拿(Rafinha),以及哥迪奧拿(Pep Guardiola)買落嘅西班牙左閘巴尼特(Juan Bernat),而青訓產品缺乏就更令人擔心拜仁將來。

安帥之離開,雖然佢自己都有責任,但拜仁嘅問題並非只得教練問題。喺軒歷基斯帶領下,拜仁或者平穩渡過難關重拾勝軌,但嚟緊下一季如果真係換上新教練,先係難關嘅真正開始。

(文章純屬作者意見,不代表香港01立場。)