【足球．博評】球王美斯世界盃的終極對手

文：列奧C@世界波

隨住南美洲區外圍賽完結，喺最後一場生死戰，阿根廷以3：1反勝厄瓜多爾，成功出線2018俄羅斯世界盃。對今年已經30歲嘅美斯（Lionel Messi）嚟講，出年嘅世界盃相信會係自己以球員身份去挑戰冠軍嘅最後一次機會。

2007年美洲盃決賽、2014年世界盃決賽、2015年美洲盃決賽，美斯已經多次同冠軍擦身而過，而阿根廷亦已經多年未曾染指大賽冠軍，對美斯構成嘅壓力都難以想像。

不過，睇嚟對手除咗壓力同其餘31隊參賽球隊呢啲「外患」之外，終極「對手」卻可能喺嚟自阿根廷嘅「內憂」。

內憂1：阿根廷傳媒

如果話中國傳媒熱衷於將國家隊實力無限自我膨漲，咁阿根廷傳媒就鍾情於將國家隊踢落低谷。

仍作為國家媒體，除咗會直播國家隊賽事外，阿根廷傳媒極少為國家隊起到正面宣傳作用。喺之前美洲國家盃期間，阿根廷多間媒體突然指前鋒拿維斯（Ezequiel Lavezzi）吸食大麻，雖然當事人多次否認，但仍然被傳媒窮追猛打，結果最後要由隊長美斯帶領全隊隊員喺大勝哥倫比亞3：0之後出席記者會，宣佈杯葛作出不實報導嘅傳媒。

無奈，一度強勢嘅阿根廷最後喺決賽互射十二碼不敵智利，傳媒當然唔會放過「反擊」機會，紛紛指美斯無為國家隊出盡全力、缺乏隊長應有作用；甚至有報導指美斯干預國家隊選人，務求組成「美斯朋友隊」云云；而更有趣嘅，係喺對智利決賽一戰之後，球證本身並無將美斯同自己口角嘅事寫入報告，反而係阿根廷傳媒自己大肆報導，最後令國際足協重新立案。雖然原本被罰停賽4場嘅美斯，最後上訴成功只係停咗一場對玻利維亞嘅賽事，但球隊就正正以0 : 2落敗，令日後驚險出線埋下伏線。

喺球場上已經又要啪藥又要踢到嘔，完場之後仲要對付「內敵」，嚟緊世界盃如果再有差池，唔難想像阿根廷傳媒又會「發功」。再係咁，美斯會唔會未開波之前已經要嘔多幾次？

內憂2：阿根廷足總

對美斯嚟講「內敵」唔只係指阿根廷傳媒，另外亦都唔能夠少得出名幫「倒」忙嘅阿根廷足總。

幫「倒」手嘅除咗令自己一隊粒粒皆星嘅國家隊濟留飛機上面9個鐘、決賽前兩日晚餐遲咗4個鐘先有得食之外，甚至要美斯代為解決球隊保安人工。事緣財政混亂嘅阿根廷足總自稱莫財，喺左CUT右CUT嘅情況之下，連球隊保安都唔放過，已經拖糧6個月之後就要求球員「用者自付」，結果隊長美斯就自己出錢請咗當中3名保安。

不過唔係個個都咁好彩，阿根廷國家隊入面仲有其他職員空肚都無飯食，講緊嘅係前國家隊主教練馬天奴，自從2015年10月之後已經無出過糧……

場內搏盡，連場外都要仆心仆命，出錢出力，睇嚟美斯自己管埋埋國家隊財政、Booking、過數仲穩陣。

內憂3：阿根廷隊友

就算係「球王」馬勒當拿出現前後，阿根廷從來都唔缺乏星級球員：迪史提芬奴（Alfredo Di Stéfano）、甘巴斯（Mario Kempes）、肯尼基亞（Claudio Caniggia）、巴迪斯圖達（Gabriel Batisuta）、基斯普（Herman Crespo）、列基美（Juan Riquelme），到現在美斯身邊仍然有一大群星級隊友，希古恩（Gonzalo Higuaín）、迪馬利亞（Ángel Di María）、拿維斯（Ezequiel Lavezzi）、亞古路（Sergio Agüero）、戴巴拿（Paulo Dybala）、馬斯查蘭奴（Javier Mascherano）、奧達文迪（Nicolás Otamendi）等等，位位都有實力喺所屬球會擔大旗。

但今季有部份人都面對住唔同困境，迪馬利亞因尼馬（Neymar） 加盟已失去正選、拿維斯遠走競爭力低嘅中超「吸金」、亞古路嘅球會主力前鋒位置就受捷西斯所威脅；而當紅嘅戴巴拿又因為被指踢法太似美斯，而未曾同「真‧美斯」合作上陣；喺球會狀態同入球率一向穩定嘅希古恩，唔知點解一返到國家隊就入球感覺失了蹤，成為球迷恥笑嘅「斜恩」；然後你估個個都可以用馬斯查蘭奴打中堅打到有巴塞嘅效果？更加唔好提阿根廷國家隊「頭重腳輕」攻守不均嘅陣容......

眼見外圍賽最後一場生死戰鬥厄瓜多爾，一眾後防仍然可以踢到甩甩漏漏先失一球，美斯又可以寄望佢地係決賽週點樣抵擋一眾強敵嘅進攻？

眼見長年競爭對手C‧朗拿度（Cristiano Ronaldo）已經成功贏到國家隊首個冠軍，如果話美斯對世界盃無期望應該無咩人會相信。但觀乎內憂外患之下，美斯贏到世界盃冠軍得兩個機會：就係機會渺茫同無機會......

（本文純屬作者意見，不代表香港01立場。）