【港足.博評】足球沙漠台灣 排名居然高過香港?

撰文:李聲揚
出版:更新:

日話(或者成日J)雙城記,港台命運共同體, 香港去台北係全世界最繁忙嘅航線。香港人有事都著草去台灣,大把香港撈唔掂嘅走去台灣鹹魚返生,甚至出口轉內銷反攻香港(請睇我篇舊博評:【旺角騷亂.博評】以後個個政治犯都走去台灣,點收科?)。但,早兩日一件關於兩地嘅小消息,就冇乜人理。

講嘅係最新嘅國際足協排名,台灣(「官方」叫「中華台北」,但大家明啦)上到歷史新高,唔係重點。但居然超越咗香港,簡直係我大港之恥!

要知道,台灣足球,就真係好長時間都係笑話。其實近年「本土」意識忽然石頭爆出嚟之前,香港足球都好一排係笑話。嗰個年代睇香港波係畀人笑的,正如好長時間睇港產片係冇品味嘅象徵。你同女神第一次出街去睇港產片,必死無疑,除非睇王家衞。同女神去睇本地波?諗你都唔好諗。

咁但,香港足球雖則一度都係笑話,但即使最搞笑時,都仲係冇台灣咁好笑。香港隊你仲會鬧佢恨鐵不成鋼之類。 

台灣足球?乜台灣有足球嘅咩?真喎, 台灣真係一個足球沙漠。(視覺中國)

台灣足球?乜台灣有足球嘅咩?真喎, 台灣真係一個足球沙漠。你去台灣買份報紙,版版都係籃球同棒球。(蘋果日報登台後就多咗少少)。林書豪旋風嗰時更加係日日都幾版林書豪,有波打講波,冇波打講佢啲對手。 足球呢,咩英超消息固然報紙唔會報,連世界盃都只係一段仔,細段過林書豪去邊食飯,咩歐聯世界盃,你搵地方睇都唔易(近年當然好啲),亦唔會係話題。

香港足球固然威過,大家可以講當年日本仔仲係亞洲二流之類,記得拎幾格廁紙。台灣足球都有人話威過的,係喎,拎亞運金牌,但唔睇波嘅嚇死睇波嘅笑死。睇波嘅都知,當年咩人幫台灣拎金牌?咪就係「阿叔」林尚義同姚卓然為首嘅一班香港人,因為政治理由幫台灣參賽。所以呢一部份香港人拎嚟自high絶對合理,實在唔係好關台灣事。亦即係話,台灣足球好長時間都唔係嘢,係嘢嘅時代都係因為香港人先係嘢。而家居然排名仲高過香港,真過癮。

其他畀人話足球沙漠嘅地區,中國只係踼得水皮(其實都唔係好水,入過世界盃喎),但球迷大把,睇歐洲波嘅大把,甚至中超球會而家都好多人睇(靠外援之類就後話)。印尼情況差不多,國家隊更差,球會比中國更廢——但球迷十分狂熱咁去支持外國球會。 至於美國? 唔好聽你啲網友豬噏。 美國國家隊唔算踼得好好,2018世界盃仲要冇份,但好歹2002年都入過8強,光榮出局。美國人對足球亦好熱情,世界盃美國嘅收視仲高過NBA決賽,美國絶對唔係足球沙漠。

唯一沙漠度可以同台灣比嘅,應該得印度。印度人睇唔睇英超我唔多知,但至少印度都有超級聯賽(英格蘭門將David James就去過),台灣甚至連職業聯賽都冇。本人成日台北香港兩邊飛,上次心血來潮想睇場台灣聯賽,結果冇得睇。 點解? 忽然間停辦咗,隔半年開返。 咁都得? 就係咁都得。

台灣嘅足球場,以前好多用晒黎養蚊,甚至係放假一家大細去野餐嘅。你想唔想像到一大細去奧脫福(Old Trafford)中圈食炸魚? 或者退一萬步斬半隻燒鵝入旺角場草地上面食? 在台灣就得啦!

其實,台灣足球最主要都係多得海外兵團。仲有一大堆在外國長大,雙親或單親係台灣人嘅,所以可以代表台灣。(視覺中國)

陳水扁年代嘅台灣足球,仲有單衝出國際嘅威水事件,就係當年嘅足球外交。 塞內加爾在2002世界盃一鳴驚人,台灣同佢又有邦交(因為大陸打壓,台灣向來只能用金錢等等去搵非洲及中美國家建交),就邀請班友去台北表演。當時已經有人話,台灣都有人睇波?仲要睇塞內加爾?完全係浪費金錢。喂你冇可能叫人坐華航經濟艙去住民宿嘛。 但唔緊要,照搞。 結果點? 結果成班友去到台灣,hea到不能,衫都唔換,求其落場的幾腳波就當表演咗,然後上車走人。古有關羽酒尚溫時斬華雄,今天塞內加爾國家隊表演完,汗都冇流一滴。

留返咁多力做乜?你話呢?最後仲爆出召妓醜聞。台灣報紙日日連載妓女投訴塞內加爾人點「驍勇善戰」,早知要收OT錢之類。官方畀球員嘅「零用錢」就係咁用咗,塞內加爾球員仲投訴台灣招待不周。最後台灣官方總算打圓場,話妓女係大陸嚟嘅。絶對係事隔多年向周恩來嘅「中國有妓女嗎?有。在台灣」講法報仇。

好啦,如此搞笑嘅台灣足壇,做乜大翻身?係咪足總好落力或者球迷好支持?又好似唔係,早排先仲有球員要自己畀錢坐飛機,遲一遲都未回水。其實,最主要都係多得海外兵團。最出名嘅係「土耳其火槍兵」朱恩樂。朱生雖則有個中文名,但完全就係土耳其人。做乜代表台灣?因為佢上Facebook無啦啦溝咗件台妹仲結埋婚。台灣就畀佢歸化入藉代表足球隊,史上第一個。

仲有一大堆在外國長大,雙親或單親係台灣人嘅,所以可以代表台灣。最經典嘅係陳昌源 。 佢在比利時長大。但點搵出嚟?係台灣足協有位公關,打機搵佢出嚟的! 該人打打下足球經理人遊戲,見到比利時球會赫然有個台灣人,就大膽打畀佢問,結果真有此人,就召佢嚟代表台灣,既騎呢又浪漫。

公平啲講,國際足協排名呢,就真係幾有爭議。我點鍾意台灣都會話你知,香港隊嘅水平當然在台灣之上。以前寫博評介紹過相對比較「公平」嘅Elo rating, 香港排164,台灣只係194。 

台灣會唔會有一日追上香港?唔知。 而事實台灣排名暫時過咗香港頭,亦唔係香港特別差,主要係台灣做得好(或者以往太差)。真係要「借鏡」嘅,不妨諗下大家係咪接受到台灣呢種靠海外兵團支撐嘅情況。我而家唔睇本地波亦唔睇香港隊。但聽聞球迷不停咁拗,有啲覺得要有成績,「著得起件戰衣就係香港人」 (Really?完全冇血緣關係都係?), 亦有話要保護本土(即係講廣東話嘅)球員云云。在台灣就好似冇呢啲爭拗——唔係台灣人功利主義, 而係, 其實, 都仲係冇乜人關心足球的。

「著得起件戰衣就係香港人」 Really?完全冇血緣關係都係?(香港超級聯賽 Hong Kong Premier League Facebook Page)
(文章純屬作者意見,不代表香港01立場。)