【足球．博評】由卡路士、加拿斯到山齊士 球員互換係雙贏局面？
文：洛迪高@世界波
唔少傳媒都報道指智利球星阿歷斯山齊士（Alexis Sánchez）及阿美利亞球星米希達恩（Henrikh Mkhitaryan）互換東家嘅轉會係一換一。而之後又傳出阿仙奴打算用前鋒基奧特（Olivier Giroud）作添頭，以作為交換多蒙特前鋒奧巴美揚（Pierre-Emerick Aubameyang）嘅籌碼。似乎突然之間球員互換變成一個唔錯嘅交易手段。
其實球壇不乏呢種交易，但 win-win 雙贏者甚少。
派路（Andrea Pirlo） ↹ 古利文派度（Andres Guglielminpietro）
（交易方：國際米蘭 ↹ AC 米蘭）
喺 2001 年，派路依然好努力去爭取表演機會，更唔使講入選國家隊，而古利文派度就已係阿根廷國腳。睇牌面睇嚟國米都算好着數，所以國米諗都無諗就 deal，但實情係之後古利文派度幫唔到手贏冠軍，而派路就喺同市死敵手上贏得兩個歐聯同兩個意甲，外加一個世界盃冠軍。
森莫蘭奴（Ivan Zamorano） ↹ 卡路士（Roberto Carlos）
（交易方：皇家馬德里 ↹ 國際米蘭）
今次交易再次出現藍黑軍團身影，皆因皇馬提出用當時效力球隊已四年嘅智利前鋒換巴西左閘。森莫蘭奴喺 1995 年勇奪西甲神射手，並幫皇馬奪得西甲，而卡路士喺國米就鬱鬱不得志。呢次交易其實都叫雙贏，卡路士喺皇馬擠身世界第一左閘之列，而森莫蘭奴亦幫國米於 1997 / 1998 年度贏得歐霸盃前身嘅歐洲足協盃。
簡拿華路（Fabio Cannavaro） ↹ 卡連尼（Fabian Carini）
（交易方：國際米蘭 ↹ 祖雲達斯）
今次又關國米事！而呢單就真係畀人笑到而家！不過老實講，當時大簡因傷患，令佢喺國米時間未有之後嘅頂級演出，但國米竟然用當時意大利頭號鐵衛換祖記一位後備門將，就真係令唔少人費解。卡連尼轉投國米後，繼續做後備門將，而大簡就唔使多講，拎完世界盃去皇馬再拎埋金球獎。其實點解國米唔直接叫祖記科水買呢？
施多夫（Clarence Seedorf） ↹ 高高（Francesco Coco）
（交易方：國際米蘭 ↹ AC米蘭）
國米似乎特別中意同人玩換人交易，今次又蝕咗畀人了。雖然筆者都幾中意高高呢位仲踢過巴塞隆拿嘅後衛，但筆者都估唔到國米竟然肯咁換。喺國米效力五年，高高僅上陣 26 次，施多夫喺 AC 贏過乜就應該唔使多講了……
雷耶斯（Jose Antonio Reyes） ↹ 巴迪斯達（Julio Baptista）
（交易方：阿仙奴 ↹ 皇家馬德里）
阿記喺換人交易早有經驗，今次同樣係一換一唔涉及額外金錢交易添！不過雷耶斯其實係以外借身份上銀河艦隊，不過佢都趁呢次機會幫到皇馬勇奪西甲，佢仲喺爭冠關鍵戰役下奇功。另一邊巴迪斯達都唔差，喺聯賽盃對利物浦時上演大四喜。
奧雲（Michael Owen） ↹ 紐尼斯（Antonio Nunez）
（交易方：利物浦 ↹ 皇家馬德里）
由於昔日英軍金童登艦心切，皇馬趁機以 800 萬加後衛紐尼斯換得奧雲仔。或者由於紐尼斯太想證明自己，結果喺利記第一次練波就傷膝休養三個月，而那邊廂奧雲雖然於 36 場入 13 球，但佢都唔算係絕對正選，結果最後佢都要回歸英超加盟紐卡素。
艾殊利高爾（Ashley Cole） ↹ 加拿斯（William Gallas）
（交易方：阿仙奴 ↹ 車路士）
由於當時 A 高欲離廠，因此促成呢單交易。高爾上車後，為自己榮譽櫃增添一個英超，四個足總盃，一個聯賽盃，一個社區盾，一個歐聯再加一個歐霸盃，贏盡英超同歐洲冠軍，而加拿斯留低嘅冠軍……係零。
伊巴謙莫域（Zlatan Ibrahimovic） ↹ 伊度奧（Samuel Eto'o）
（交易方：國際米蘭 ↹ 巴塞隆拿）
今次國米威番次！由於伊巴話想挑戰更高舞台，而哥迪奧拿就唔想要伊度奧，所以呢次交易似乎令兩間球會及球員都滿意。
結果呢？伊度奧喺摩帥旗下為球隊犧牲到連左閘嗰瓣都撈埋，不過都可以贏得三冠王，而伊巴雖然入球助攻唔少，仲對皇馬入過波，但佢最後同哥帥失和，嬲到出自傳都要數臭佢，結果短短一年後佢就離隊。
大衛雷斯（David Luiz） ↹ 馬迪（Nemanja Matic）
（交易方：賓菲加 ↹ 車路士）
當年車仔用馬迪加錢換得雷斯，不過幾年後又買番馬迪返嚟，又將雷斯賣走，然後過一排又回購雷斯，之後再賣馬迪畀曼聯，最大贏家應該係賓菲加，因為球會喺兩者唔同嘅交易中賺得 4,100 萬英鎊，不過車仔都唔算蝕晒，起碼馬迪同雷斯都喺車仔於 2017 年重奪英超之路上出過好多力。
其實呢類交易喺球壇都唔算罕見，尤其係再早啲年數，例如 1995 年，曼聯用基利士比（Keith Gillespie）換得黑雙煞中嘅高爾（Andy Cole），之後 1998 年時修咸頓用奇雲戴維斯（Kevin Davies）換得大胸射手比亞堤（James Beattie），然後 2004 年熱刺用森莫拉（Bobby Zamora）換得迪科爾（Jamie Defoe）。現時睇嚟呢種交易方式會喺近幾年獲得更多球會採用，全因咁樣起碼可以令賣家球會更容易得到球員做離隊球員嘅替代品。
（本文純屬作者意見，不代表香港01立場。）