【博客球評】忘掉種過的花：米蘭雙雄重新出發
意甲開鑼，近年「小世界盃」除咗畀大家睇到祖雲達斯嘅壟斷外，亦見證米蘭雙雄漸漸成為褪色勁旅；
國際米蘭今季「重返歐洲」踢歐霸盃，
AC米蘭上季更只排第7……
文：洛迪高@世界波
不過今屆米蘭都有所轉變，正如歌仔都有得唱「重新的出發，放棄理想吧」。如果夠腳踏實地，應該慢慢可以重拾勁旅本色。等世界波嘅洛迪高同大家展望一下米蘭雙雄今季發展！
AC米蘭
罩門一：財政
A米近年志比天高但命比紙薄，總係想做番大事，買人都唔少，但因為莫財，唯有用盡各種空手套白狼絕技。免簽加搵豪門棄將、過氣球星已係等閒，先借後買更係近來常見，實力自然不及當年。
罩門二：青訓
上年青訓門將基安盧基當拿隆馬成功彈起，全因教練米赫洛域的賭博心態，但青訓成材風潮就未能乘時而起。好像A米自己便依然會低價購買本土年輕球員如邦拿雲度拉，反而青訓才俊如吹捧多年嘅馬斯圖爾（Hachim Mastour）卻租借外出。無人會質疑紅黑軍隊之青訓水準，但刻下成績要求刻不容緩，無疑會更壓榨小將出場空間。
展望：
A米老細貝盧斯科尼（Silvio Berlusconi）長期糾纏於政治漩渦及個人醜聞，對球隊支持已有心無力，交畀阿囡芭芭拉都未能起死回生。此時中國投資者入主，恰可解決「罩門一」。既然對成績有要求就要用大錢，想馬上重返阿平寧之顛，實在唔慳得。不過祖記球隊磨合日深，要挑戰談何容易，預期今年目標，都係先廣積糧、緩稱王、重返熟悉歐聯戰場。如有耐性，應先效法祖記於「電話門」發生後的部署，站穩陣腳，再作圖謀。
國際米蘭
罩門：教練
執筆之時，被國米球迷集中抨擊嘅文仙尼終於離任，由前阿積士教頭法蘭迪保亞取而代之。與同市球會相反，國米一直唔愁投資，更願意聽任主帥意作收購（新近更有中國蘇寧集團加入），但新援加入後，文仙尼卻未能從戰術上令新援舊人為球隊作質嘅提升，場上比賽混亂，排陣有時出人意料，防守未見穩健（縱使有時打3防中），進攻僅靠個人能力，陣地戰甚或未能打出戰術雛型就被對手扼殺於禁區之外，令空有莫路伊卡迪及祖維迪等進攻才俊，卻未能盡情發揮，更不時迷失。
展望：
國米換上由崇尚進攻嘅法蘭迪保亞接任，雖然預期迪保亞仲要啲時間適應同交學費，但球迷應可寄望嚟緊一季，進攻戰術上應起碼見到內容及戰術雛型。前場球員單幹以致入球能力不穩嘅情況應有望解決，排陣用人應會更合理、唔會再令球迷撓晒頭。
至於收購方面，迪保亞上任前，國米已作一定收購，相信管理層亦唔會希望迪保亞將今夏轉會策略推倒重來，所以迪保亞都會用呢班由文仙尼拍板嘅新援，然後再喺個別位置添人，但相信數量亦會唔多。另外文仙尼用人較缺耐性，就算係自己買返嚟，都容易用一兩場就無故將其束之高閣，過幾場先再出，易令球員情緒波動不解，相信迪保亞會更有耐性，令球員心態更穩定、更肯賣力為教練而戰。
正如上面所述，由於換帥時間有啲尷尬，季初國米成績應該會唔太穩定，但如果搵啱目標，以國米人腳及個別位置深度，歐霸盃及本土盃賽應可行遠啲，聯賽同樣希望可以衝入歐聯區域。
（本文純屬作者意見，不代表香港01立場。）