【武術01】激戰派議員

正所謂君子動口不動手
有咩咪唔啱講到啱
不過，呢個世界又邊會咁簡單丫

香港立法會相對其他地方嘅議會，真係好和平。呢個世界，議員初時口角、繼而動武，唔係咩新鮮事。可幸嘅係香港無出現呢種情況。激烈選戰過後，不如輕鬆下，睇下國外議員格鬥。

好多時候兩個議員通常一開打，就會畀人阻止，或者兩人亂揮拳但打唔中。究竟有無好睇少少嘅議員格鬥呢？選咗兩場畀你睇！

講明先，下有打交片段，唔好學呀！

韓國人柔道真係唔錯

好多人以為係日本人，但應該係南韓議員。（話說有網友話我知係日本人，但係我又查唔到，加上做錯要留底，所以呢個問題我先存而不論，無論如何，十分多謝網友指正！）呀老人家底子好，第一下個「巴投」（Tomoe Nage），一手抓領、一手捉袖，專登背向返無枱嘅位置就即時出，可謂行雲流水，如果呢場係奧運柔道比賽，一定即時贏「一本」。人哋想起身仲要按返人哋個頭落去。

第二個人埋身，又即時攞返個領，就轉身想打個「体落」（Tai Otoshi），不過失敗咗。我估係因為打得太急，未控制好對方平衡就出，所以摔唔到。

南韓柔道其實好唔錯，有成11面奧運金牌、16面銀同16面銅，奧運柔道榜中排第三，對上係法國同日本。

烏克蘭議員的搏擊賽

呢個議事廳外搏擊發生喺2015年2月。著西裝嘅係Vadim Ivchenko（下稱西裝），另一位著外套係Yegor Sobolev（下稱外套）。西裝一開始踢咗外套一腳，但被擋開咗中唔晒。之後可以見到西裝明顯有練開，有步法有閃避，亦知貼牆唔係好事，所以走圈出返嚟，再迫外套埋牆，真係連cutting off the ring嘅技巧都有埋。

另一邊外套就差D，出刺拳會「烏」前個身，出完仲會失少少平衡，即係距離控制唔好；同時右拳亦打唔好，喺條腰到抽出去，直唔晒又勾唔晒。

結果西裝壓返外套埋牆，雖然絆咗下，但左手就按到外套條頸，同時去咗個好位，差不多perpendicular to外套，西裝右拳拉條直線，直接打中外套左側下巴，就 knock咗佢落地。

喺度講呢兩單議會格鬥，唔係想任何人學，而係想大家唔好再話香港議會多肢體暴力，因為客觀睇真係唔多。

今日係咁多！

（本文純屬作者意見，不代表香港01立場。）