世界七大奇妙球場

早前政府被揭打算收回賽馬會傑志中心用地引起軒然大波，除咗因為政府房屋政策、事件處理手法同取態備受質疑外，更牽涉到香港足球發展；
況且中心用地本可以供公眾使用，所以政府收地亦受一班「波友」炮轟，因為踢波地方而家已買少見少！

文：洛迪高@世界波

至於喺外國，因為於比例上幅員廣大，地方大過香港，所以有更多地方踢波唔出奇；不過就算有幾多地方，佢哋都想隨時隨地有波踢，亦因此出現咗唔少奇怪球場！就等世界波嘅洛迪高同大家嚟個眼睛想旅行，向世界奇妙球場出發！

（一）艾迪球場（Eidi Stadium），法羅群島 

對於香港人嚟講，屋企向海真係身分象徵兼爽到暈，不過球場呢？法羅群島呢個球場直頭有兩面喺海。呢個球場除咗景靚，更可以練到地面傳送，因為高空波會受海風影響外，仲因為只要踢咗落海，就去咗大西洋，你個波就會變成Wilson嘅足球版（湯漢斯套《Cast Away》嘅「第二男主角」）。

（二）Estádio Janguito Malucelli，巴西 

呢個球場最特別嘅賣點係環保，點環保法﹖就係成個球場完全無用水泥鋼筋起，連座位都係直接嵌入泥草度，更衣室都係木製建築！

（三）札幌巨蛋（Sapporo Dome），日本 

喺日本，棒球同足球一樣受歡迎，札幌巨蛋就將兩個運動溝埋做爆漿瀨尿牛丸！點樣做？就係利用科技將球場喺棒球同足球互相切換！點樣換？馬上去片：

（四）布拉加市政球場（Estádio Municipal de Braga），葡萄牙；Mmabatho Stadium，南非 

兩個球場最特別嘅，唔係球場草地，而係看台！首先講下葡超布拉加主場，呢個主場只係兩條邊線後有看台，另外兩邊係無得坐嘅！其中一邊可以遠眺城市景觀，另一個呢？就係一個斷崖！其實想免費睇波都可以，前提係你上到去囉，記得帶望遠鏡喎！

至於喺南非嘅呢一個，就有完整看台，不過就……

（五）烏克蘭某地及土瓜灣馬頭圍道足球場 

邊個話平地先可以踢波？烏克蘭就有一個球場係斜嘅！香港都唔執輸，土瓜灣馬頭圍道足球場亦都係斜嘅，對大家傳波同跑動嘅判斷係一大考驗！

（六）Kronenbourg Beach Soccer Cup，英國 

當大家周不時笑香港草場保養唔好，大球場仲變成大爛地仲要加沙去維護種種荒謬嘅事後，喺英國倫敦原來仲有一個沙地場，莫講話啲草唔靚，直頭連一條草都冇！咪以為係兒童樂園，呢個盃賽連（過氣）英超球星都有份踢。

（七）巴西街頭 

大家都知巴西作為足球王國，好多人因為各種原因要喺街頭踢波，仲識得自製足球添（好似汽水罐咁），所以先有唔少球星都喺街頭鍛鍊到球技。呢啲街頭，喺最唔「正式」嘅球場，亦係最美麗嘅球場。

（本文純屬作者意見，不代表香港01立場。）