【武術01】曹星如vs前川龍斗技術位 Part 2

撰文:斷水流大師兄
出版:更新:

上星期去咗深山修練,唔好意思
唔講廢話直接繼續
講埋上次無講嘅Block Counter

(資料圖片)

成場比賽曹星如都比較主動,通常會先攻,相對之下前川龍斗好似好被動。我估呢個同拳手本身嘅打法及賽前game plan有關。無錯,搏擊運動並唔係「我好打呀我上場」、「咩對手都好我都係咁打㗎啦」,然後上場打就算。20幾年前MMA可能係,但現時一定唔係,而拳擊作為全地球最搵錢嘅搏擊運動,我估好耐之前都已經唔係。

賽前拳手嘅訓練團隊會針對對手打法,去研究及制定一個戰略,然後訓練拳手。打咩距離?會唔會有特別嘢要練?對方有無嘢要特別留意?節奏要點?要迫定打反擊?等等問題都要去諗去研究,所以雖然拳擊係「個人運動」,但其實後面團隊花好多功夫。

關於成隊人會做咩搵次講,講返場比賽。

Block Counter

前川龍斗大部份時間都俾曹星如先攻,擋咗幾拳之後先反擊。Block counter通常用嚟反擊勾拳同overhand,因為呢類攻擊opening較直拳大,有更多空位去反擊。

上圖大部份曹星如嘅組合拳都打咗落對手嘅拳套同手臂上,無做成大傷害,而當曹星如一連串嘅組合拳一完,前川龍斗就睇返佢邊到無防好,就用勾拳反擊。例如下圖,前川龍斗見曹星如右手唔喺防守位置,就用左勾拳反擊,如果唔係曹星如反應快同埋有預備定對手嘅反擊,即時向下閃,呢一拳就已經中咗。

相反,曹星如就較少用block counter,而更多選擇向下duck或者向後pull之後反擊。

上圖曹星如下duck避拳後就順住搖擺打出前手勾拳,呢個組合喺拳擊好常見,只係呢次距離較遠打唔中。下圖係一次好靚嘅counter,避開右拳後即時用左直拳反擊,有角度有力度,但係前川龍斗真係好挨得,連晃都無晃真係好巴閉。

點Block?

Block counter喺中近距離係一個好好嘅反擊方法,但必須做好幾點:第一,你個guard要高,兩隻手要護住面,但唔好擋住視線;第二,你要繼續望實對手,留意佢下巴同肩膀,因為佢出勾拳同上勾拳嘅時候,肩膀會郁,你見到就可以好好預備;第三,將你嘅下巴同肘收好,用肘保護身體,如嗰飛肘出嚟,對手打身體嘅勾拳就會入。好似下面前川龍斗收唔夠埋就俾曹星如打入一拳。

MMA入面有Block Counter嗎?

有係有嘅,但愈來愈少,最起碼喺boxing入面嗰種block愈來愈少。最簡單嘅原因係,喺MMA入面用嘅拳套同拳擊嘅分別太大,拳擊嗰種拳套你放上塊面到都護咗一大半,相反用MMA嗰種露指拳套嘅話,跟本cover唔到咩,成個頭都係空位俾人入,所以,block counter喺MMA無咁普遍,相反,用手拍開,左右slip嚟避會更多。

今日係咁多!

(以上片段均來自youtube)

(本文純屬作者意見,不代表香港01立場。)