易帝棄鞋有幾奇?那些同贊助商反枱的足球大帝

撰文:世界波
出版:更新:

最近中國籃球球星「易帝」易建聯因為個人贊助商同聯賽贊助商條款有衝突,因而出現「棄鞋」事件,搞到易帝要道歉收場,遲啲仲有排搞、解釋點解唔著得贊助CBA聯賽嘅品牌波鞋(雖然因為用咗繁體字道歉又畀人鬧……)
不過同類事件其實並唔新鮮,喺商業世界,一寸長一寸強,如果旗下贊助球隊或者球星有人唔聽話,品牌都唔止即變玻璃心,嚴重嘅仲告上法庭添!
贊助爭拗其實多年前已經喺世界足球壇出現過,仲牽涉埋當時嘅一級球星!

「球聖」告魯夫。(Getty Images)

文:洛迪高@世界波

球聖扭計締造經典一幕

兄弟鬩牆,繼而分家各有各搞,唔係某大台嘅劇情專利,喺德國都發生過,呢對兄弟最後喺一條河嘅對岸,各自設一間工廠,正是Adidas同Puma。兩兄弟分別係大佬Rudolf Dassler及Adolf Dassler。兩個既然分得家自然不和到一個點,為咗等自己產品可以有更佳宣傳,緊係要搵當紅球星宣傳,結果就牽涉到大名鼎鼎嘅「球聖」告魯夫(Johan Cruyff)。

話說告魯夫喺1974年世界盃前已經同Puma簽咗個人贊助合約,偏偏當時荷蘭國家隊嘅球衣贊助商就係對頭Adidas!點知性格十足嘅告魯夫就即刻留住Puma嘅血,講到明唔會著Adidas波衫,甚至可以棄踢當屆世盃!

荷蘭國家隊都冇咁傻,特准告魯夫著兩間波衫,締造經典一幕(Adidas一般係三間)。不過Adidas唔使唔開心,因為佢贊助嘅祖國德國決賽贏荷蘭拎世盃!

搶眼嘅除咗係佢球技,仲有件兩間波衫。(Getty Images)

奧燒著無牌波Boots?

德國球星奧斯爾。(Getty Images)

進攻球員,尤其是中場指揮官、王牌球星,特別受贊助商青睞,今次主角係德國中場「奧燒」(奧斯爾,Mesut Ozil),不過今次唔係Adidas同Puma兩兄弟,而係Adidas同外國勢力,美國Nike。

事緣奧燒想轉著Adidas,點知畀Nike告上法庭,結果遭判6個月淨係可以著全黑、全白或Nike波boots,最後佢就選擇咗著淨色釘鞋,相信要搵嚟收藏都好難。

死都唔著Nike?其實全黑都幾型。(資料圖片/soccersus2015.com)

宗教理由 純屬藉口?

牌子相爭固然多數同金錢利益有關,但亦有較「崇高」嘅原因,例如前紐卡素前鋒、踢緊中超山東魯能嘅柏比斯施斯(Papiss Cisse)。效力紐卡素時,球會曾經接受財務公司Wonga贊助,由於施斯係回教徒,要遵從唔可以從借貸得益嘅戒條,所以就講明唔會著印有贊助商嘅波衫比賽,但到最後都要屈服。

不過施斯呢次行為畀人質疑動機不純,只係順便扭計想轉會,因為之前嘅紐卡素贊助商Virgin Money,業務同樣牽涉到借貸,咁點解嗰陣施斯冇抗議呢?

最後都係要屈服。(Getty Images)

超級Puma粉馬圖斯

馬圖斯絕對有資格做Puma最佳代言人。(PUMA Group)

最後一單都係同Adidas、Puma兩兄弟有關。話說德國名宿馬圖斯(Lothar Matthaus)喺1979至1984年效力由Puma贊助嘅德甲球會慕遜加柏,之後轉投由Adidas贊助嘅拜仁慕尼黑,惹來好大反對聲音,皆因馬圖斯轉會後堅持繼續著Puma波Boots,就算罰錢都在所不惜!雖然最後佢都肯乖乖地改著Adidas,不過Puma顯然已相當感激佢嘅忠誠,之後仲出返對向馬圖斯致敬嘅波Boots。

加入拜仁的馬圖斯,最後還是乖乖著返Adidas。(Getty Images)
(文章純屬作者意見,不代表香港01立場。)