長江後浪推前浪：球壇少帥成功因素與挑戰

世界波仝人首先喺呢度同大家拜個年，祝大家雞年身體健康！
又踏入新嘅農歷年，又喺時候送舊迎新。雖然球壇多數以球季做「更新」嘅單位，但其實足球已靜靜起革命！
「長江後浪推前浪。」講緊嘅係足球界出現愈嚟愈多嘅新少帥！

文：洛迪高@世界波

隨住唔少耳熟能詳嘅名帥例如安察洛堤（Carlo Ancelotti）等愈嚟愈少人關注，就連年紀唔算大嘅摩連奴（Jose Mourinho）及哥迪奧拿（Pep Guardiola）都已經算老江湖，足球界已漸成少帥嘅天下。究竟球壇少帥們嘅成功因素係咩？佢哋又面對乜嘢困難？等洛迪高同大家講下！

（一）成功因素：

更早出道，更多時間鑽研及培養戰術素養

現時球壇嘅少帥，大多早早離開職業球壇，忘清自己將來埋首教練班及研究戰術，甚至有如摩連奴於士砵亭由英格蘭名帥卜比笠臣（Bobby Robson）嘅翻譯做起接觸頂級足球戰術及球隊管理。而現時人氣最勁嘅少帥，當然不能不提德甲球隊賀芬咸嘅拿加斯文（Julian Nagelsmann）。佢年輕時嘅傷患令佢放棄職業球員夢，然後佢就開始做教練並任職慕尼黑1860及賀芬咸梯隊，然後佢嘅賀芬咸童話就發生喺上季2月，時任主帥史提芬斯（Huub Stevens）因健康問題下台之時。然後？佢先係幫助球隊於上季成功護級，然後今季前17場比賽7勝10和排名第3，係5大聯賽唯一不敗之師。既然少帥們能夠更早出道，即有更多時間接觸理論及更多時間收集比賽資料及分析，令佢哋比踢職業足球踢到接近40歲嘅名將對足球戰術了解更多更全面。

由低做起，更易培養聲望

少帥普遍欠缺彪炳嘅球員生涯，所以由低做起，好似拿格斯文咁執教梯隊，或如英超球隊般尼茅夫領隊艾迪賀維（Eddie Howe），早早已加入球隊（2008年成為球隊領隊），及後由英乙升到英超，已經為球隊注入傳控風格，亦無人會去挑戰佢係球隊嘅權威。由「低」做起，講嘅除咗係聯賽級別外，亦可以用「低潮」解釋，最近例子就係德國名將芬寧斯（Torsten Frings）剛被委任為德甲包尾大幡達斯泰特領隊。喺絕路之下，相信球員們已經唔可以掉以輕心或者同新帥玩「政治」，相信芬寧斯封教初期，由球員產生嘅阻力亦會較少。

與球員關係更好

講起少帥，大家都知道佢哋同球員年齡差距更小，更易玩得埋，對於年輕球員形象更親切，令佢哋更易於同球員溝通，球員亦更樂意向領隊坦白，如果陣中年輕球員較多，咁球隊就可以更團結。同樣，由於無咩職業球員經歷嘅少帥係執教時，會更易理解旗下球員及了解實力、潛力及深知如何運用，而唔會出現因名將變名帥而出現，建基於實力而出現嘅「唔知點解佢哋踢唔到」嘅心理落差。

（二）潛在困難：

做錯選擇

當少帥漸有名氣，通常包括大球會在內嘅邀約將紛至沓來，呢個時候佢哋嘅選擇隨時令佢哋遠離主流球壇，其中一位就係韋拿斯保亞斯（Andre Villas-Boas）。喺波圖取得成功嘅佢當時係當紅炸子雞，最後就上升車路士主帥，但由於戰積不穩，令陣中老將群起反抗最終一季未完就落台（最後車路士贏得當年歐聯冠軍）。及後執教熱刺頭一季戰績唔錯，不過去到第二季因多場大敗下台，最後要去俄羅斯執教辛尼特，而家更要去遠東執教上海上港堀金，執教生涯前發展暫時令人失望，佢當時波圖成功後馬上選擇執教英超班霸被歸咎為主要原因，因為壓力太大之餘佢亦無足夠聲望鎮住陣中老將。

不夠名氣

剛才講過唔少少帥都早早放棄職員球員生涯，佢哋係球員榮譽簿上嘅空白，會令佢哋喺執教老將較多嘅球隊時會遇上困難，隨時被人睇小，話你食鹽多過你食米唔聽話。保亞斯執教車路士後期就係一個例子。由於以球員身份踢波機會少，少帥對於球場上唔少場面只能停留理論上嘅理解，喺「戰場」上嘅心理經驗較少，係困境時就會更易出現困難，與年長球員亦更難溝通。

（三）最佳配搭：名將少帥？

既然係咁，點解唔將名將及少帥溝埋一齊？好似施丹（Zinedine Zidane）咁，成成功利用球員生涯嘅江湖地位，將由賓尼迪斯（Rafael Benitez）治下士氣及成績都低沉嘅皇家馬德里重新團結起嚟，並喺球季尾贏得第11屆歐聯。至於哥迪奧拿更係表表者，喺巴塞得到告魯夫（Johan Cruyff）及雲高爾（Louis van Gaal）點撥，職業生涯後段又曾到意大利踢波，積累唔少戰術營養，而佢執教生涯由巴塞B隊開始，然後高升執教A隊並取得驕人成績，佢起點適合，而佢其後執教選擇都做得好好，拜仁都畀到佢足夠空間發展。

不過值得一提係哥帥近來喺曼城遭遇巨大挑戰，而施丹雖未算遭到逆境，但究竟佢嘅真正功力及球皇光環可以去到幾時，都需接受時間考驗。

講咗咁多，其實就好似唔少以前球星退休讓位畀新星一樣，教練界別都係一樣。究竟會係「平民」少帥叻啲？定係「球星」少帥更標青？即管放長雙眼！

（文章純屬作者意見，不代表香港01立場。）