【NBA．來稿】勇士今年有可能重奪NBA總冠軍嗎？

日前木狼擊敗勇士，對勇士來說響起了紅色警號。究竟勇士發生左d乜問題？

文：香港籃

隊中神級射手咖哩仔居里（Stephen Curry）肯定要負上好大責任。我絕對不會懷疑咖哩仔實力，佢再打落去一定會破盡NBA 3分相關既紀錄，入名人堂亦都遲早既事。不過佢近排手風真係麻麻地，睇返佢1月、2月、3月既3分命中率分別係43%， 38%， 31% (截止3月11號)。 近7場有4場3分係 0-11， 2-11， 2-9， 1-8，射到咁唔單止MVP無佢份，搞到球隊近6場輸左4場。

唔係話top seed唔可以輸波，而且好多場打作客，但係唔好輸到咁肉酸，有2次back to back連敗，再係咁打球隊好快就跌落第2。仲要輸俾公牛木狼呢d季後賽都未必入到既球隊，對佢地重奪總冠軍既信心無疑有左個折。

再講下慘被千夫所指好識時務既KD杜蘭特（Kevin Durant），佢今年個人表現比我想像中好。睇返d個人統計，平均得分25.3，籃板8.2，助攻4.8，相比舊年28.2， 8.2， 5.0，可以話唔失禮交到功課。

但其實睇佢同咖哩仔一齊打波又唔覺有乜好大既火花，好似你有你打，我有我射咁，唔通係之前係雷霆同佢“沙煲兄弟” 韋少韋斯布克 (Russell Westbrook) 習慣左咁樣打法? 始終係無左一場25分8個籃板，對勇士一班後生仔習慣有個MVP大佬傍住影響好大，其他球隊心諗: 依家唔打瓜你勇士待何時? 

個人覺得KD加盟係一把雙刃刀，正所謂成也風雲，敗也風雲。還看卡爾教練(Steve Kerr) 點樣可以將手上4個All-Star球星發揮到極限。點樣係唔同既對手打法上變化出唔同既牌，安排邊粒星射最後1球，控唔控制到格連（Draymond Green）既情緒，真係要睇呢個前3分神射手既功力去到邊。

另外唔講大家可能無留意，其實今年勇士都換左好多血，有一半人唔同左，包括全部中鋒，其中我覺得Bogut、Ezeli、Speights、Barnes、Barbosa 都打得唔錯，各有唔同原因拜拜，真係擔心默契同信任方面可唔可以建立到。雖然勇士仲係西岸1哥，但個人覺得今年勇士NBA重奪總冠軍難度好大，機會唔高，但如果今年打好個底，下年就好大機會。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）