【NBA．來稿】今年邊個會攞到MVP？

究竟點樣可以成為NBA常規賽MVP？其實官方無公佈一個標準，不過坊間有分析指除左個人表現好之外，通常都要帶領球攞到東／西岸（Conference）或者分區（Division）第一。
回帶最近10年裏面，有8次常規賽MVP個隊要係東／西岸第一，只有2次例外。
睇返歷史雖然都曾經發生過得主兩樣都攞唔到，不過真係少之有少，其中最近個一次就係小飛俠Jordan係1988－1989年度攞個次，呢個亦都係佢第一次攞常規賽MVP。

文：香港籃

今年形勢又點呢？理論上依家排東岸第一既係騎士隊既大帝James，西岸第一既係馬刺隊尼納特Leonard係大熱人選。但係今年仲有Mr. Triple Double雷霆隊威少Westbrook加入戰團，真係未到最後都唔知邊個跑出。

講左大帝James先，佢今年平均每場得分26.1籃板8.3，助攻8.9，相比舊年25.3，7.4，6.8 各方面都有進步，而且帶領騎士隊係西岸排緊第一，但佢唔係最熱人選。早幾日看到一篇報導講騎士隊教練Lue抱怨無乜人覺關注James可以攞今年MVP。無錯James今年佢係個人表現的確幾好，有9個triple double，最深刻係2月6號個場對巫師隊臨尾0.3秒接到Kevin Love 底線長傳之後fade away轉身射入個3分波逼到加時，最後仲贏埋，真係要俾個like佢。

除左舊年奪冠主力全部留隊之外，相對地佢得到既支援相對較多，例如，3分射手史密斯J.R. Smith受傷，即刻搵射手Kyle Korver幫手，雖然依家都成36歲，但依然寶刀未老，係騎士隊上陣26場，3分命中率有48%。James開口話唔夠控球後衛，最近就簽左3次入選All-Star既Deron Williams。今季平均11個籃板既Kevin Love受傷後，搵左前死敵中鋒Andrew Bogut加盟，到Andrew Bogut 受傷，再搵前公鹿隊中鋒Larry Sanders補上。今年騎士隊班費1.3億美金，冠絕聯盟。可能係咁多支援下，反而俾人覺得騎士隊既好成績唔係完全因為James。

Leonard貴為2014年總冠軍賽MVP，幾乎每一年進攻得分方面佢都有大幅提昇。佢第一年平均得分7.9，第二年11.9，第三年12.8，第四年16.5，舊年21.2，今年26.3。今季雖然LaMarcus Aldridge同埋Pau Gasol加盟幫左球隊好多，但要喺靈魂人物鄧肯Tim Duncan退休之後既過度時期係西岸攞到第一，證明Leonard真係擔起馬刺隊呢支大旗。今年佢有24次得分超過30分，係馬刺隊自David Robinson 首次。包括其中1月21號對騎士取得41分兼贏波。至於防守方面，可能係因為手長，伸長隻手有221cm仲長過Shaquille O'Neal 身高216cm，平均有1.8個偷波，連續兩屆成為年度最佳防守球員（2015、2016），今年力爭3年霸。如果成事，將會係繼Hakeem Olajuwon （1994） 同埋 Michael Jordan （1988） 之後既第一人。

最後想講下威少Westbrook呢個惹火球員。自從唔駛再同Kevin Durant爭波打之後，坐正做大佬。今年平均每場得分31.8，籃板10.6，助攻10.3，相比舊年23.5，7.8，10.4，得分同籃板有顯著進步。分析指佢有9成可以全季保持平均trouble double，呢個紀錄目前只有Oscar Robertson係1961-62年個球季做過。佢淨係今年攞trouble double既次數，已經平左NBA歷史排第9多Bob Cousy 既33 次，而其中有5次仲要攻入40分以上交出3雙，堅係大大三元。

相對James，威少得到既支援就少得多，走左前MVP Kevin Durant，又有另一正選Serge Ibaka離隊，令佢走上單天保至尊呢條路。除左封阻之外，佢包辦隊中最高平均得分，籃板，助攻，偷波，全面性有人將佢媲美Magic Johnson。雷霆隊依家係西岸西北區排第2，仲有概20場波打，如果可以最終爬過爵士頭，MVP俾佢都應該無乜懸念。

（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）