【港足．博評】本地足球夢何價？從黃興桂惹火留言說起

老實講，港超聯嘅「鳳凰計劃」雖然有缺陷，不過總算係港超職業化嘅計劃，與其不斷地去彈，搞到吸引力法則同自我實現預言嚟打擾自己，倒不如主動做一啲有建設性嘅行動……

早前 01體育專訪理文流浪的行政總監馮嘉奇，訪探間講到要為現時職業足球員謀福祉，並提到有球員只得 4,000 元港幣薪金，令大眾再次提出喺香港踢波「搵唔到搵到食」呢個話題。

本來就上述話題有唔少說話都屬老生常談，而最具爭論性嘅係球圈老前輩黃興桂就留下惹火留言，大致上都係用時下一啲老一代說法，以前點樣辛苦，而家已好好多，追夢過程係咁，更叫人在職業足球嘅環境下，去做兼職幫補生計，甚或要放棄足球夢。唔少人對佢嘅留言都幾反感，一來牽涉到後生同老一輩對現今社會嘅睇法，二來就係覺得佢嘅說話都幾涼薄。

洛迪高見到佢咁講說話，就覺得相當不解，其一係黃興桂前輩都係球圈中人，何以而家有人出面希望為球員爭取更好福利，竟然會反對？其此舉令洛迪高要問，喺香港踢職業足球，係咪就一定係一個要辛苦追逐嘅「夢」﹖係咪就一定要「月入 4,000 蚊」先得？

喺我做任何比較前，大家要先知道港超聯係職業級聯賽，唔能夠以業餘思維去講一啲不負責任嘅言論去無視一啲數字上嘅比較。

洛迪高喺呢度用英國做例子，當然唔會拎英超級球員比較，例如曼聯隊長朗尼嘅 30 萬英鎊週薪本身係球壇都唔算常見（而家似乎愈嚟愈多，不過唔計通漲的話朗尼當時呢個數其實跑贏大市一條街……），所以筆者喺呢度用上英格蘭第四級聯賽（最低級別嘅全職業聯賽）做標準，根據英國《每日郵報》數據顯示，該組別球員於 2014/2015 球季，平均年薪為 40,350 鎊（折合約港幣 40 萬），仲未計各項獎金或出場費。

如果大家覺得拎足球大國嘅專業比賽嚟比都仲太誇張，我哋不妨用由業餘足球踢到拎英超冠軍兼做埋國腳嘅占美華迪（Jaime Vardy）嘅故事做例子。華迪喺 2011/2012 效力當時仲係第五級聯賽球隊嘅費列活特，第五級聯賽唔係全部球隊都係職業球會，亦有半職業隊伍，華迪當時週薪達 850 英鎊（折合約 8,500 港元），一個月唔好話四千，都有三萬幾港紙。你會話華迪一直以嚟喺其他球會表現唔錯所以值得高薪挖角，你會話呢啲聯賽唔係個個高人工唔係個個準時有糧出，但至少追夢嘅華 Dee，唔需要有人去同佢講你四千蚊都要受㗎啦，係咪先？

別在用業餘去看待港超聯好嗎？

老實講，港超聯嘅「鳳凰計劃」雖然有缺陷，不過總算係港超職業化嘅計劃，與其不斷地去彈，搞到吸引力法則同自我實現預言嚟打擾自己，倒不如主動做一啲有建設性嘅行動，至於所謂叫年青足球員捱唔到就放棄夢想，似乎無論港超聯有幾多缺憾，呢一種說話似乎都唔應該喺職業球壇出現吧？

洛迪高當然知道喺香港地搞波好困難，有啲班主可能出咗名畀球員人工唔高但依然好努力地搞波畀好多機會後生球員，唔少初出茅廬追夢嘅年輕球員喺衡量過機會成本後都願意放手一搏，但作為職業球會班主，球員追夢唔係一個給予低薪嘅藉口，當球員拎住份糧連獨立生活都做唔到，要「問屋企人拎錢」，或者「打多幾份兼職」之類嘅說話，只係更加突顯出業餘思維。當然，我相信唔係每一位班主都想刻薄球員，但點樣令港超聯愈嚟愈職業，甚至乎搞唔搞職業，呢個係後話，唔係呢篇文章討論範圍了。

本來有人為球員謀個福利，無論喺職業定業餘都係一個好事，唔係咩？其實以呢位前輩嘅說話，本來放入社會討論都可以掀起一陣「離地」負評（其中以當時人工直接比較 4,000 蚊薪金無視物價上漲比例已經係幾荒謬），但淨係用本地足球發展角度，都相當令人不解……而且將佢嘅留言放入任何行業其實都適用，所以洛迪高就諗起一句說話：

「人必自侮而後人侮之，人必自重而後人重之。」

如果輕易地叫人放棄，咁樣只會令行業出現惡性循環而跌入深淵難以翻身，仲點樣鼓勵年輕人投身落去？

（文章純屬作者意見，不代表香港01立場。）