【足球．博評】從簡東拿到賓艾化：法國精神，「浪漫」過人
法國球員正如佢嘅文化一樣，令外人又愛又恨。法國文化極具有性格，令人難以忍受；但佢亦有品味，可以令人神魂顛倒，令你難以拒絕。
文：洛迪高@世界波
法國總統大選完滿結束，由「中間派」候選人馬克龍（Emmanuel Jean-Michel Frédéric Macron）擊敗「極右」陣營瑪琳勒龐（Marine Le Pen）當選。喺選舉前，曾經有人指如勒龐當選，會令一直以來有多種族融和嘅法國足球代表隊產生分裂，更甚會出現「白人至上」主義。筆者一直以來覺得呢種擔憂都幾無稽，先唔講法國社會環境會唔會可以令勒龐咁易找到數，其次就係足球算係法國國家榮譽之一，而法國國家隊近來成績突出，民族多樣性正正係其中一個大因素。萬一有關政策令國家隊成績受損，隨時影響總統仕途，不過而家馬克龍贏咗就更無需要擔心有關「國家隊大清洗」一事了。
講起法國，當然會提到著名哲學家笛卡爾（René Descartes）。佢提倡嘅「理性主義」等思想影響整個世界，明明佢係提倡個人理性高於個人感官感知，但偏偏佢嘅同胞於現代卻一直令人處處感受到佢哋嘅「浪漫」性格。筆者最近聽電台節目時聽到主持人講：「法國人放個屁都香啲。」佢咁講正正係因為法國人嘅浪漫特質能夠有助於「包裝」到唔少普通事變得更「浪漫」同「有性格」。不過正正係因為呢啲特質，令法國隊經常因個人行為而導致球隊戰績受到影響，而且球員職業生涯亦可能受到影響。
性格球星
講起法國隊嘅性格球星，點少得曼聯大帝簡東拿（Eric Cantona）！大帝脾氣乖張係人都知，正正係因為佢嘅性格，令到佢就算喺曼聯表現唔差，但喺佢職業生涯較後階段，往往不受法國隊教練積基特（Aimé Jacquet）待見，結果缺席1996年喺英國舉行嘅歐洲國家盃。不過值得一提嘅係，其實簡東拿喺代表法國國家隊比賽時表現往往比唔上為曼聯比賽時嘅演出，佢亦無法帶隊法國隊晉身1994年美國世界盃。
另一方面可以突出佢性格巨星一面嘅係，正當佢喺職業及曼聯生涯如日中天之際，佢決定於31歲生日前夕退休震驚世界，點解？佢之後解釋過：「我當時已唔鍾意足球，對佢失去熱情，好耐之前已經決定如果咁就會退出。」不過佢又補一句，如果當時佢有份入選98年世界盃名單就唔會咁快退休住。好難捉摸呢係咪？好有性格先真！
另一位法國隊麻煩友就要數安歷卡（Nicolas Anelka），呢位壞孩子好早成名，佢喺17歲時已經為巴黎聖日耳門一隊上陣，並轉投阿仙奴，及後回到巴黎就開始同教練鬧不和…去到下一站利物浦，縱使當時球隊領隊侯利亞（Gérard Houllier）曾經喺法國青年隊合作過，但安歷卡都唔畀臉，仲曾經鬧過侯利亞係種送主義者。直到2010年南非世界盃，入選名單嘅安歷卡再次發作令法國成為當屆世界盃笑柄。喺法國兵敗墨西哥一戰嘅半場時間，安歷卡就辱罵當時教練杜明尼治（Raymond Domenech），到最後安歷卡被逐出隊，不過就引來整隊法國隊兵變，所有球員仲威脅要罷賽……
其實可能因為「浪漫」性格，真係導致唔少法國球星喺成名後都變得更加自我中心，將自己放於球隊之上，並且認為球隊無咗自己唔得，當正自己係救世主，最後喺自己未受重用時，或覺得自己未被尊重時就會大發雷霆。另一絕佳例子就係拿斯利（Samir Nasri），喺球會時作戰表現不時懶懶散散，但又認為自己係必然正選成日扭計，喺國家隊更曾經因為球隊輸波後辱及國家隊（2012年歐國盃兵敗西班牙賽後。），更同教頭迪甘斯（Didier Claude Deschamps）交惡，而自己再無法入選國家隊後，又用粗言穢語批評領隊及國家隊，完全無為意自己有球場內外咩問題。
新星發展之障礙
如果話巴西好似比以往少咗好多新星爆發，係因為好多新仔啱啱打起就去咗外國，法國嘅新星最後泯然眾人流於平庸，多數都係性格問題……
如果要講性格新星，表表者一定係賓艾化（Hatem Ben Arfa）。而家30歲嘅佢，其實當年好早同賓施馬（Karim Benzema）、拿斯尼、文尼斯（Jeremy Menez）早早成名。不過喺效力里昂時，已經展示麻煩友精神同隊友賓施馬及史基拉斯（Sebastien Squillaci）不和，仲同後者打交…最後要轉投馬賽，但之後佢為咗離開馬賽，又決定罷工迫球會放佢走人…去到紐卡素後，賓艾化其實狀態都唔多穩定，但都叫有時幾搶眼，不過去到效力紐記最後一年，因為態度出現問題令自己體重增加，上陣機會越嚟越少，之後搞到自己要外借侯城…如但踢咗半季又出事，當時侯城領隊布魯士（Steve Bruce）就表示搵唔到賓艾化，最後紐卡素仲同佢解約。一直以來自視甚高嘅佢喺被解約後，突然變得謙虛，喺尼斯簽佢嗰陣，佢表示當時法甲喺最適合，皇家馬德里搵佢都未必去，結果就造就佢喺尼斯返生。到今季佢因為喺尼斯表現而得到加盟巴黎聖日耳門嘅機會（今次係和平分手了。），而今季佢喺巴黎雖然不太受重用，但佢都無好似以前咁發作，唔通真係大個了？
賓艾化適時醒覺算可以挽救自己職業生涯，但有一位中場似乎就自甘墮落，佢係馬維拿（Yann M'Vila）。佢喺法甲雷恩出道並且表現出色，而且受到唔少英超球會邀約，但佢竟然選擇去咗俄羅斯嘅魯賓卡山。之後國際米蘭想斟佢，球員仲表示非國米不嫁，但喺外借國米期間又展示唔到職業精神，唔只肥咗唔少，上到場態度又差，結果國米忍唔住，借咗半季就要彈票……之後佢又外借新特蘭，喺期間表現出色深受球迷喜愛，不過到最後又因為喺社交網站留言指責球會而要回歸魯賓卡山。未成名已好有性格嘅佢，就算喺法國隊都無視紀律，試過因為違法隊規外出而被禁賽接近兩年。
從唔少球星同新星嘅遭遇所見，再證明法國人浪漫得來恃才傲物，致使唔少球員視自我得益及思想為最大，凌駕於球會甚至國家隊之上（皮耶於今年冬季轉會窗嘅風波就係一例。）。佢哋亦熱衷於嘗試新嘅事，致使唔少球員都不顧一切做出一啲完全估佢唔到嘅行為。你問點解，有好多原因，但好多人都會歸因於法國歷史造成嘅自我認同。
法國球員正如佢嘅文化一樣，令外人又愛又恨。法國文化極具有性格，令人難以忍受；但佢亦有品味，可以令人神魂顛倒，令你難以拒絕。法國球員難以管教及控制，但佢嘅才華同靈感令你難以拒絕。或者從頭到尾錯嘅唔係佢哋，而係我哋唔理解。又或者，睇法國文化同球員，唔應該由實物角度出發，而係視之為一個概念。
（文章純屬作者意見，不代表香港01立場。）