【德國生活誌】日本人愛食魚生　德國人啪生豬肉！？

早前喺超級市場排隊等買鮮肉嘅時候，已經見到超市員工直接從鮮肉櫃拎條腸仔出嚟，畀前面位陪老母嚟買餸嘅小朋友玩，小朋友接過後一口咬落去。當時小菲內心除咗 OMG 以外，已經冇第二種反應。

喂，就算腸仔喺製作過程已經有所加工，但腸仔本身正正放喺一堆生豬肉隔離喎……小菲自少就被教育未熟到 100% 嘅豬肉食完可能會生蟲，小朋友一啖就將咁多年嚟小菲對豬肉所建立的價值觀完全毀滅。生牛肉就食過，生豬肉都砌過，但就咁啪生豬肉，好似有啲太 hardcore 喎，點解老母冇反應？

目擊呢次進食生豬肉事件之後嘅小菲已經有咗輕微嘅心理準備，面對呢種 raw 已經有少少理所當然；只係勢估唔到，有一日小菲一起身變身德國人帶住德國魂將生豬肉食埋落肚。小菲周末去間比較傳統嘅德國酒吧食早餐，喺漢堡唔似得布魯塞爾， 12 點開得門唔會剩係得酒冇嘢食，早餐仲有幾款選擇，揀到心花怒放。小菲靠初階德語亂點咗款早餐，已經有驚喜。裏面出現呢一盤仔比牛肉他他淺色一啲肉碎，睇落似係豬肉，仲要疑似係生嘅；上次超市的震撼湧返晒出嚟。唔通德國真係食豬食得咁隨便？

但入鄉隨俗嘛，一邊安慰自己呢啲豬肉至少係煙薰過嘅（自己幻想），一邊同自己講同三文魚冇差，拎起舊麵包自己抹一撻肉碎醬，大啖大啖食。呢款豬肉碎碎食落口其實幾好味，雖然當時完全食唔出到底係生肉，微熟，係咁兒煮過下，定係根本係熟肉。

而到底呢堆係唔係真係生豬肉呢個問題，留到喺靚女侍應行埋嚟問「is everything okay?」嘅時候先敢開口。靚女侍應話呢個真係生豬肉，係—真—係—raw—pork—mince，調味過，我哋德國人好鍾意食㗎。人地推薦得咁開心，唔食晒都唔好意思。牛肉他他都食啦，豬肉又有何差？刺生都係港女首選，食埋生豬肉又有咩所謂。食多幾啖，其實又幾好食。同小菲人生第一次喺日本試生雞蛋撈飯一樣，一係唔試，試咗就鍾意埋。不過亦同生雞蛋撈飯一樣，你喺日本（德國）就敢食生雞蛋（生豬肉）姐，要你自己喺屋企整就真係拎唔出膽量。身為香港人，好明顯知道自己食到嘅雞蛋（豬肉）喺邊度嚟真係唔敢想像。

唔多唔少受英國殖民影響，香港人對於生豬肉真係會 hesitate。小菲有諗過到底食生豬肉呢件事係咪只係小菲井底式發現新大陸，但講真問到英國人時佢地又真係怕怕。但倒返轉頭，小菲喺牛津混的幾年都真係完全唔敢食兔仔，如果要比較，生豬肉似乎 easy job 喎。將生豬肉食抹喺麵包上面其實同吞拿魚唔差好多，不過 hardcore 到加埋濃味嘅洋蔥作為早餐亦係德國北方的傳統習慣，a little too much？德國人又唔覺喎。

嚟得德國之前，小菲對於德國的幻想只係 schnitzel 同黑森蛋糕，再數落去可能會係血腸同豬手。小菲終於知道到德國人俾人 stereotype 咗性格豪邁直接又爽快係真係有原因㗎，因為佢地連嘢食都鍾意直接啪。喺呢個無肉不歡的國家，到底一頭豬喺食材上有咩玩法？除咗血腸，小菲更食埋生豬肉，真係有今生冇來世！如果你都想試，認住「mett」呢個字就可以。靚女侍應話呢啲生豬肉一定係用最新鮮的豬肉嚟整，唔可以隔過夜。德國人出名做咩都鍾意有規有矩，生豬肉規範嗰度小菲都相當有信心，所以食嘅時候大膽一刀抹落個麵包埋就啱㗎喇。

（文章純屬作者意見，不代表香港01立場。）