第一次自己一個女仔去長旅行，仲要去巴基斯坦！
當初同屋企人、朋友講我決定去巴基斯坦嘅時候，大家的第一個反應都係呆咗，覺得我肯定係傻咗、搵命搏，一去去個最危險、亂、落後嘅地方……而去過你就會知，巴基斯坦同大家想像嘅好不同，除咗一個恐怖分子都見不到，好安全之外，仲有好嘢係大家估都估不到嘅！
Aslamalegum. Mel Ho Siu Yu.
啱啱係用咗巴基斯坦的烏都語同大家打招呼。
無錯！你無睇錯，我去咗在一般人眼中好危險嘅巴基斯坦返嚟，無死到之餘，仲玩得好開心，哈哈。
出發之前 波折之中 心情極之興奮
那次去巴基斯坦其實完全是意料之外嘅事。一開始是不知道有巴基斯坦呢個地方揀，是有一日上 portal 嘅時候，無意中 search 到，再睇到 Pakistan, You are the one 的計劃內容，透過遊覽巴基斯坦不同地方，體驗當地嘅歷史、文化同生活，再用文字和社交媒體紀錄所見所聞所想，從而打破大眾對巴基斯坦嘅刻版印象或誤解，覺得同傻的媽的理念很相近，而文字、媒體工作也是自己平時擅長嘅嘢，加上自己一直都好想去受戰火影響嘅國家旅行，覺得很吸引，所以無諗太多就報咗。
原本打算留兩個月，可惜最後巴基斯坦駐香港總領事館只批咗個半月嘅Visa，但總比原先批嘅15日強。
記得最初拿到巴基斯坦 Visa 嗰陣好開心，有夢想成真嘅感覺，但睇睇下發覺唔對路，咦～得15日嘅？！於是即刻行返去領事館同佢地講。一開始佢地話總領事批15日已經好罕見，因為通常是不會批一個女仔自己去，擔心安全問題，不過我真是由頭到尾都未驚過，所以堅持要佢哋批耐啲，最後佢哋就用筆，將1變4，就是咁，我為期 45日嘅巴基斯坦之旅正式展開。但由於佢哋用手改，搞到好似是我改咁，所以走嗰時遇到小小麻煩，當地海關要打去移民局check，咁當然最後咩事都無，如果唔係你都睇唔到我篇文！
未去之前，我對巴基斯坦真係無咩固有嘅印象，亦無刻意去做功課，因為交流也好，旅行也罷，每一次都是令自己有所成長、經歷嘅機會，靠自己行，才會見到屬於自己嘅那道動人風景，才會擁有難忘回憶，所以不想俾其他人嘅經歷，先入為主咁影响咗屬於自己嘅巴基斯坦之旅。
朋友個個以為我傻咗
但當初同屋企人、朋友講我決定去巴基斯坦嘅時候，大家的第一個反應都係呆咗，覺得我肯定係傻咗、搵命搏，一去去個最危險、亂、落後嘅地方，不停share啲當地發生恐襲嘅新聞我睇，很多都問可唔可以遲啲去，又話普通去交流都有好多嘢要適應，更何況我之前未試過一個人去旅行，有個甚至擔心到幫我去問啲有豐富經驗嘅旅行人，但旅行人都答唔到，因為真係無咩人會去。不過我真係無點驚過，又或者唔識驚，反而好興奮，因為正正無咩人去、認識，更值得我去揭開呢個地方嘅神秘面紗！
而去過你就會知，巴基斯坦同大家想像嘅好不同，除咗一個恐怖分子都見不到，好安全之外，仲有好嘢係大家估都估不到嘅！
遊歷個半月 發現自己的巴基斯坦
第一樣，巴基斯坦令我覺得意外嘅，是巴基斯坦人真是好鍾意中國人，應該是全球唯一啦！
記得入境的時候，海關很緊張，不停走來問接待的男生們，我是不是中國人，後來他們說我是香港人才冷靜下來走了。後來問起、同去到邊都有人撩傾偈、影合照，甚至請食嘢等等，才知道，除了因為有很多中國人來投資，更因為Pak Chin friendship，他們甚至有首歌專歌頌兩國的友誼，而很多巴基斯坦人嘅其中一個夢想，都是有朝一日可以去中國旅行。
第二樣，巴基斯坦的女性地位，比想像中高同自由很多！
除了不是一定要戴頭巾、打扮很西方化之外，自己同朋友出街約會是絕對無問題的，完全無話要家中的阿哥、細路陪先可以去呢回事，很多亦有很高的教育水平和很好的工作。至於婚後雖然大多選擇做家庭主婦，亦有繼續工作的，而現在愈來愈多丈夫甚至會鼓勵太太工作！
第三樣，巴基斯坦雖然是一個穆斯林國家，但一啲都不嚴。
有啲似佛教喺中國咁，比較在心中，例如 Islam 的教義是禁酒，但大家都有相熟嘅 dealer，可以私底下買酒飲，而如果被警察發現，你請佢飲幾啖通常就會放你走。
最後亦是最重要的，巴基斯坦真喺一個好正、好熱情、有好愛的國家！
我在呢次嘅實習遇到好多困難，但每次都可以化險為夷，甚至咁享受今次嘅旅程，都是因為每次都有不同的巴基斯坦朋友、實習生幫我。例如第一日搬去 intern house，無自來水、無電、無基本傢具，然後嘗試溝通但無效，嚇到我喊咗。幸好那時有另一位已來了幾個月的 intern Warda 在，她自己都換了幾次 host family、搬了幾次intern house，加上她識 Urdu，所以他們不敢不顧而去。除了安慰我，她亦開了 Wifi 俾我聯絡 host family，也幸好我有很好的 host family，除了讓我搬回來、安慰我，也幫我向他們投訴。
之後當 Aiesecer 成日諸多藉口不按日程帶我出去遊覧，又會有很多不是 Aiesecer 的朋友、佢地嘅家人主動關心同邀請我去佢地屋企作客、過夜、帶我出去，令我可以真正咁享受當地嘅文化生活，同毫不猶豫地愛上呢個國家！
所以只要你可以鼓起勇氣出發，保證巴基斯坦不會令你失望，仲會有好多意想不到嘅驚喜同收穫！
【編按：相片由作者提供。】
（本文純屬作者意見，不代表香港01立場。）