【中國上的舌尖】好後悔娶左個台灣婆

撰文:賈耀武
出版:更新:

班台妹的確天生尤物,嬌滴滴嘅語調迫哂大家潛在體內嘅男性荷爾蒙出哂黎,要保護佢地!
「大佬!教教我點樣管好我呢個台灣婆?」小張懊惱困惑咁望向我,眼中滿是哀憐...
台妹,兩個字,一橫一豎;未追,以為過癮;追到,好快無癮。你地話係咪?

本欄目逢每月1、11及21號出刊。

2017年2月,剛過了春節,北京城又熱鬧起來,春節回鄉的各路人馬重聚這座哪吒城,眾聲喧嘩,整個城市又張燈結彩,人山人海。
 

北京愚戈移山Club(網上圖片)

身在北京工幹嘅我,與同樣黎自香港而依家長駐北京嘅老友阿B同小張,一如以往於Happy Hour係東城區打躉,係我地愛蒲嘅「愚公移山Bar」歎返杯。唔好講笑,係北京市真係乜酒都有得飲,芬蘭、立陶宛、冰島等,好多你係香港聽過地名,知度係山卡啦嘅地方,但從來係香港呢個被稱為「國際都會」嘅大城市,偏偏好難係酒吧搵到呢啲國家出產嘅酒;但係北京,真係邊度嘅酒都好易係酒吧搵到黎飲。不過,我地一班麻甩佬唔玩另類野,個個圍埋都係歎Hoegaarden。
 

台灣人闖北京
席上,小張一臉愁容(小張當然係假名,係內地後生仔興用姓氏叫小乜小物,所以暫且叫佢小張),嗟歎剛剛個春節,佢同新婚台妹老婆過節的悲慘景況。

小張係香港仔,佢老豆文革個陣由北京黎香港,記得聽佢講佢老豆當年用九蚊由北京搭飛機去廣州,再踩單車到深圳,再游水去香港,係九龍城寨打工。四十年後今日,小張老豆就返返去北京,係商業區藍色港灣開左間港式茶餐廳,小張就長係北京幫佢老豆睇住盤生意。係北京娶台妹好稀奇?一啲都唔稀奇!若果你思維仲停留係八十年代改革開放初期,台商去中國開廠發展大陸,娶好多沿海農村姑娘,我可以話你知呢個狀況已有點Out! 依家珠三角東莞一帶,工廠同啲夜場一樣,已經執得七七八八,只不過夜場萎縮係中央主動打黑,而製造產業萎縮係改革開放經濟轉型所致。依家台灣經濟唔好,撞正大陸產業轉型,滿佈機會嘅北京,正係台灣呢一代年青人過江打拼新天地嘅寶地。正所謂搏一搏,單車變摩托!由其設計、電訊呢類新型第三產業,北京係遍地商機,係度嘅月薪多數超過佢地係台灣搵到,所以,好多台灣後生仔女黎北京打拼,係北京娶台灣妹,依家係北京未算普及,亦遠比大陸女人嫁去台灣少,但已經唔係乜野奇聞。
 

台灣藝員林志玲。(網上圖片)

娶台妹,我諗係香港好多麻甩佬夢美以求嘅擇偶對象,大家會咁諗,或多或少受十幾年前林志玲、侯佩岑同伊能靜呢班過江搵食,紅遍中港台嘅台妹所建立形象所賜。無錯,我諗各位讀者好多點都識到一個半個台妹,依家香港多左人去台灣留學,接觸台妹機會都多左(依家聽講香港龍友影圈都興影台妹多過港妹),應該都有共同感受,班台妹的確天生尤物,嬌滴滴嘅語調迫哂大家潛在體內嘅男性荷爾蒙出哂黎,要保護佢地!

好多台妹話鍾意香港仔醒目,但偏偏小張個性目訥,講白啲就蠢蠢地,個款成個黃寶強咁!個台妹老婆係佢係北京唔知參加乜野興趣班識。小張話,追佢拍拖個陣,個台妹愛笑愛玩愛黏人,個性好熱情,成日俾高帽佢帶,小小事都讚佢「你好厲害喔」,台腔語調酥酥柔柔der,又溫柔,攪到平時呆九九嘅小張成日暗爽!以為自己係最叻個個。
 

剛結左婚一年唔夠,由台妹變台灣婆,個種結構轉型幅度大過同快過小張面對嘅產業轉型!差啲以為娶左另一個女人返屋企 (其實佢話傾擺酒時已覺唔對路,但返唔到轉頭)。台灣老婆未致於愛錢,但生活要有品質,咁問題都不大。兩公婆都係上班族,但小張份糧唔少要過俾老婆,但老婆搵返黎個份就自己洗。結婚唔夠一年,台妹話跟婆婆(大陸對「奶奶」的叫法)相處唔到,成日鵝佢要搬出去住。小張呻話拍拖個陣都會見佢做下家務,但婚後就成日鵝小張做。日日夜夜老婆都鬧小張蠢,唔夠風趣無格調,係個土財主!

其實我地都好耐無見小張,佢結婚後基本上衣食住行跟哂老婆標準,外家都成日對佢地兩夫妻生活指指點點。佢咁好彩係度陪得我地飲酒,係因為佢老婆好鍾意得閒無事羅假飛返外家。春節剛完,佢過多兩日就會由台灣返黎。
 

台灣藝員侯佩岑。(網上圖片)

由台妹到台灣婆嘅產業轉型
小張抑壓住滿肚不快咁大大啖隊左一杯,吐苦呻左句,「結婚前佢唔係話我"好厲害喔(普通話發聲)"?」

聽罷小張欲哭無淚咁吐苦水,我苦笑將叨係嘴邊嘅草煙擱係煙灰缸,吐一口悶煙,拍拍佢膊頭,大啖咁跟住飲左一杯。

「大佬!教教我點樣管好我呢個台灣婆?」小張懊惱困惑咁望向我,眼中滿是哀憐...

由台妹產業轉型至台灣婆,由女人依賴型體系變為被老婆指指點點呢個「計劃經濟模式」,快到四張嘅我其實都聽過好幾次。聽罷小張呢番哀求,我不期然翻檢手機內嘅舊照片,一幅幅二人合照,張數佔最多嘅,係我同佟佟嘅合照,其中一張係facebook我同佟佟合照嘅cap圖,附注一段我呢一世都記得嘅留言。呢批相我咁多年留到依家,好似臥薪嚐膽咁提醒自己呢段往事。我苦笑咁遞向小張,俾佢睇睇。兄弟,其實我好你唔係好多!
 

台妹,兩個字,一橫一豎;未追,以為過癮;追到,好快無癮。你地話係咪?

我都追過台妹,佢個名叫佟佟,佢係台灣嘅「地瓜芋頭」(呢個名係乜黎下集話你知)。唔好意思,我呢個版唔係好想表述政治話題,但呢個專欄叫得《中國上的舌尖》,既然《九二共識》都話「一個中國、各自表述」,唔好話我政治正確,我好覺得我好合理係呢個專欄分享我同台妹拍拖嘅經驗。

若果話同祁壹段感情先係文藝劇,後係悲劇;咁我同佟佟段感情就先係悲劇,後係鬧劇!

下期再續!

(PS.可能之前咁多篇都講情情搭搭,我Tag「中國教育」俾部分讀者炸我型喎!既然係咁,今後起我會講多少少係內地及台灣生活嘅經驗,希望真係做到教育。)
 

(本文純屬作者意見,不代表香港01立場。)