【余文樂結婚了.博評】唔好咁多幻想 台妹點睇都唔會好過港女

撰文:李聲揚
出版:更新:

余文樂結婚了!是真的!可惜唔係阮小儀,係台妹王棠云,港女又痛失一件筍盤。

近年娛樂圈男星,似乎都唔娶港女?四大天王,郭生被稱為「國貨城」,前任黎太亦非港女,劉生係「大馬女婿」。就只有張生娶港女,亦畀人話佢娶「港女」,仲成為菲律賓領事館名人。

演員呢?雙周一成入面,發哥老婆,應係坡妹。成龍老婆,係台妹。星爺就未結婚。男神梁朝偉老婆劉嘉玲,最多當半個港女。一樣做葉問嘅宇宙最強甄子丹,又畀你計半個。

余文樂結婚了!新娘係台妹王棠云,港女又痛失一件筍盤。(資料圖片)
+8

新啲嘅,古天樂未結婚,吳彥祖老婆中文名都冇。閃卡事件就快十周年,陳冠希都未結婚,但同佢生仔嘅亦係國產佳麗。同期死敵余文樂老婆係台妹,雙手快過摩打嘅Chef Le mon離咗婚,現任女友王菲,北京出世,睇你當唔當港女。

要數,娶百份百港女嘅,都仲有李克勤,陳奕迅,張家輝,加埋劉青雲都仲得。但首先,真係唔係咁多。二來,都講緊至少十年之前嘅事。而咁啱,其實「港女」呢種現象,正係咁上下時間先在網上流行。

要數,娶百份百港女嘅,都仲有李克勤,陳奕迅,張家輝,加埋劉青雲都仲得(視覺中國)
+1

本人寫過唔少批評港女嘅文,但今次篇文反而要為港女抱不平。知無不言,唔會老作,但始終係個人主觀感受,唔好當科學研究或統計報告,你絶對可以話「我識嘅印度(舉例)女仔唔係咁」「作者識過幾多孟加拉女仔?憑乜妄下結論?」,咁就唔駛再睇落去的,我投降。你寫篇孟加拉Robert仔見聞錄我一定share。

本人年少時愛情大過天,留學英國但唔鍾意西餐,都係愛群東亞女性,後來回港工作,中港台坡馬資都做齊,出trip旅遊都唔少,當然亦有不同經歷。

粗淺但直接嘅結論:

港女固然冇乜好,但台妹?真係咁好?我好懷疑。
無意質疑余文樂嘅口味,相信余太王棠云定必有過人之處,亦相信大把好出色嘅台灣女仔。(余文樂IG)
+4

無意質疑余文樂嘅口味,相信余太定必有過人之處,亦相信大把好出色嘅台灣女仔(例如我上司及同事,希望佢哋唔會睇到呢篇文)。但整體嚟講,本人來來回回台灣一百幾十次,台妹台婆認識不少。愚見認為,港男未免太神化台妹了。

先講外表。其實見到靚台妹嘅地方,相當有限,基本上只有三個:一,華航或長榮嘅飛機(復興遠東之類冇坐過,你坐過話我知)。二,夜場(而我好少去)。三,戲院或電視機。

外表固然好主觀,但天地良心,就當坐地鐵,或求其在鬧市捉一個出嚟,或者計去餐廳之類,我相信在香港上海東京首爾吉隆坡新加坡「求其搵件」出嚟嘅質素,應該都會好過台北。離開台北,更加不用講。

港男對港女百般批評,但不少鬧嘅人,都至少認為,港女係OK識打扮嘅。東京更不用講,日本女仔出街必然化妝打扮。首爾亦差不多(況且仲有後天加工)。台北呢?你真係見到好多冇乜點打扮嘅女仔。OK,鍾意原汁原味,鄉土情懷嘅,可能啱你。但我就話「與其貧乏的真實,我更愛華麗的虛偽」,2047年諾貝爾文學奬得主村上春樹講的。

台北呢?你真係見到好多冇乜點打扮嘅女仔。OK,鍾意原汁原味,鄉土情懷嘅,可能啱你。(《流星花園》劇照)

台妹,基本上難逃土氣,離開台北更加係災難。當然在台北夜場,你會見到好多好識打扮嘅台妺,但,即管鬧我「化又話唔化又話」,但台妹啲大眼仔加假眼睫毛,實在非我杯茶。我唔介意師傅落味精,我甚至唔介意女仔整容,而高手就係落咗整咗你都唔多覺。台妹呢?八十後香港作家天航話齋,外國人去到台灣最常問嘅就係:點解台妹眼睫毛咁長?(順帶一提,天航正係娶咗個台灣老婆)

好啦,唔好講樣咁膚淺——身材都好重要的。講笑,係內在美都好重要的。講起台妹,最令港男幻想亦最令港女討厭嘅,就係台妹嘅嬌嗔。可能因為港女嘅「獨立」,更令港男追求台妹呢啲小鳥依人嘅溫柔。代表作係乜?就係彭浩翔執導《撒嬌女人最好命》入面嘅陏棠。建議你搵「怎麼可以吃兔兔」呢段嚟睇下。一物治一物,《春嬌與志明》入面港女余春嬌力抗年青主動嘅北方佳麗尚優優,去到《撒嬌》就係國貨周迅大戰台妹陏棠。

的確,台妹講親嘢都有尾音,國語硬係聽落比普通話溫柔,幫你執枱都要「先幫你做整理呦」,仔都啤幾件都仲可以講「不要欺負我們幾個女生」,呢啲真係令情竇初開嘅少年暈得一陣陣。但,唔好講咩「結咗婚就變大媽」咁長遠。事實係,相處耐咗,你會發現唔易同台灣人溝通,男女都係。好多事佢地唔會明確拒絶你,但不了了之,等你知難而退。大佬我哋香港人慣咗一就一二就二,呢方面極難適應。大陸人可能粗魯無禮,但冇咁扭擰,唔會浪費你時間。

可能因為港女嘅「獨立」,更令港男追求台妹呢啲小鳥依人嘅溫柔。代表作係乜?就係彭浩翔執導《撒嬌女人最好命》入面嘅陏棠。(《撒嬌女人最好命》劇照)

而其實最令我難以忍受嘅,係台妹普遍冇乜常識。咁講真係得罪好多人,但台灣人冇乜國際視野,都係舉世皆知。

真人真事一則:數年前我在出名猛鬼嘅台北君悅飲野,真係比我見到鬼,係外國鬼,仲有外表出眾打扮性感夠晒嬌嗔嘅台妹乙件。我在側邊literally食花生。

鬼佬解釋自己做咩工作,問台妹Do you know Tesla?台妹當然 Sorry I don't know,英文發音文法都冇問題。然後鬼佬唯有簡單啲,問佢Do you know Steve Jobs?答案一樣。鬼佬投降,唯有問Do you know Apple?對,你估中了,台妹答佢Yes,I love apple, and banana——可能係調情說話,我等港仔識條鐵。到鬼佬指住部iPhone台妹總算明白,唔使拎banana。

後半截鬼佬問佢Do you know Robuchon? 我估佢已經醉醉地,正所謂不知有漢無論魏晉,不知Tesla Apple何來會Robuchon。後來鬼佬話返房叫Room Service,台妹一樣問佢甚麼是Room Service。我實在好想搭嘴You are the room service,但當然講就無敵。

對,好單一嘅例子,但我在香港上海東京首爾吉隆坡新加坡都冇遇過咁嘅例子。你買份台灣報紙打開台灣電視睇下,就知佢地睇乜新聞,PTT亦不見得好好多。

世界上有好多好台妹,斷估余文樂天航成龍都唔係盲嘅。不過港男呢,最好就唔好咁多不必要嘅幻想。點睇,台妹都唔會好過港女——除非你想移民台灣。

台妹講親嘢都有尾音,國語硬係聽落比普通話溫柔。(雞排妹ili鄭家純Facebook Page)
世界上有好多好台妹,斷估余文樂天航成龍都唔係盲嘅。(《那些年》劇照)
+5
(文章純屬作者意見,不代表香港01立場。)