我美麗　就是罪？

本來呢，呢種地下法則就好似毒品交易咁，暗地進行詐唔知，不過唔知係咪近年「收兵」風氣太勁，啲男神女神又太自覺自己嘅脫俗，然後又有一班蛇精V煞喺魔界走上凡間肆虐，以貌攞著數或吸人氣，件事變咗70年代差佬收片咁明目張膽，有人就開始諗，要點樣「懲罰」呢班「美人」。

呢個社會有好多大家唔講，但係心裏面默默信守嘅潛規則。正如賭界名言話齋：「若要身體好，勿買利物浦」，我哋生活中一條地下法則係：若要生活好，個樣最好生得似吳彥祖。

「最憎你啲人以貌取人！」

係係係，我膚淺我卑劣我愧疚，講出聲就畀位你企喺道德高地，咁你覺得孔子個高地夠高未？佢有位徒弟叫子羽，又無身型又無樣，得個本名夠霸氣叫澹臺滅明，阿先師一見佢個樣就話人係「薄才」唔多理佢，結果反而係其貌不揚嘅佢成為大賢人，收咗 300 位弟子，搞到孔子留低咗句至理名言：

「以貌取人，失之子羽。」

唔靚無罪嘅　靚就有Bonus咁囉

返嚟實際環境，絕大部分人口裏說不身體卻誠實，無論係買斤豬肉會被人呃砰定反過嚟多三兩、追巴士個司機苦等埋你定早早絕塵遠去，以至食飯搭枱人哋會幫你執埋位定全程歧視；你嘅「顏值」，或多或少左右一部分人嘅做法同決定，令你無啦啦有咗優勢或劣勢。

上述事件太雞毛蒜皮？聚沙可成塔呀，一係講個更加實際事例：見工。唔少工種例如公關主播空姐，雖則唔係個個都列明要「美麗」，不過你見啲人力資源顧問都係會出嚟講，話有志者最好都係要「儀容端莊」、「四正」、「順眼」之類。你望住堆字，其實都心裏有數知佢暗示緊啲咩。

「講到尾就係唔醜」。某業界高層直接了當：「烏wet可以改衣裝，樣喇喎，就算有得整都唔係個個會搞。」喂，唔醜呢個基準，真係人言人殊喎？你鍾意平胸我鍾意巨乳，你歡喜韓系野性我歡喜日系文青，條線喺邊？「無架，人人基準唔同架喎，世界係唔公平架啦。」

光環效應　人靚你又跟

係囉，就係因為個「基準」唔同，所以咪有人以為「代言」兼日夜用LANCOME，以游蕙禎做模組嚟個PS裝甲，諗住咁樣就可以艷壓群芳，其實只係不誠實使用電腦同影響市容，搞到人哋以為提早宣傳盂蘭節派米呀陰公。

咁點解大家習慣以貌取人？心理學有種講法係「光環效應」，即係對一個人嘅印象就好似一個光環，有一樣嘢好正，就會無理據自動咁覺得呢個人其他嘢都係好。生得靚仔靚女，外表分係S級，就會不自覺咁將同樣S級嘅好嘢扣落呢個人身上，例如「聰明」呀、「溫柔」呀咁。

個光環會唔會好似欣宜首歌咁跌下來？會，所謂日久見人心嘛，當彼此夠熟悉，美貌嘅影響力就會減少，即係好似你朋友圈中，有啲其貎不揚嘅人你覺得好似順眼咗，原來同呢種效應都有啲關係。

所以你阿媽覺得鄭子誠一定係奸人無本心，唔係無原因。

唔夠人靚咩？聲討人囉

本來呢，呢種地下法則就好似毒品交易咁，暗地進行詐唔知，不過唔知係咪近年「收兵」風氣太勁，啲男神女神又太自覺自己嘅脫俗，然後又有一班蛇精V煞喺魔界走上凡間肆虐，以貌攞著數或吸人氣，件事變咗 70 年代差佬收片咁明目張膽，有人就開始諗，要點樣「懲罰」呢班「美人」。

日本有位評論家森永卓郎，可能睇完新一輯《世間奇妙物語》裏面嗰個《美人稅》就立即抄橋，上個月公開提出要係日本行「美男稅」，佢嘅道理係：美男子畀重稅，醜男就減稅，於是，以前專揀靚仔嘅女性會開始諗，計下生活開支，嫁個醜男可能仲著數，有錢淨買包包喎，於是就改善咗戀愛不平等問題，多咗醜男可以結婚，長遠甚至可以解決少子化同STALKER之類問題……咁當然，呢啲超展開都係靠估嘅啫。

咁一個人係咪美麗有罪，唔少人心裏面把尺其實係咁嘅：

1　佢係咪完全好自覺自己好靚先？
2　如是，佢係咪只係用呢個「項目」去上位／收兵／攞著數／發姣先？
3　如是，佢嘅成就／分數／情人條件／職位／手袋名車數目，係咪多過我高過我先？
4　如是，你就有罪。

咦，好似有陣酸味。

「唔係妒唔妒忌，係件事唔公平！我努力發奮跑數都唔及個姣屎凳篤咁快升職！」

明白明白，大家都係質疑同討厭一啲人「只有」美麗無其他實力啫，唔通你對住麥明詩夠膽話佢只係靠個樣咩？不過，一個人如果努力花時間用資源去KEEP住美麗呢個優先條件，甚至後天加工再進化，從而確立自己嘅生存方法，咁又唔知算唔算係一種付出呢？

算啦都係諗唔明，學高層話齋，「世界係唔公平架啦。」趙飛燕如果生喺楊玉環個時代，邊有資格恃靚行兇啫？
 

（本文純屬作者意見，不代表香港01立場。）