搵工中伏唔出奇，中無聊伏就最唔抵
上市公司我做過，蚊型到全公司得三個人我都做過。當你仲係學生時，應該都聽過啲人話做大企業好，起碼準時出糧，而且穩陣唔會隨時執笠，仲有既定晉升階梯等等。但其實除咗呢啲嘢，做大公司仲有一大好處，就係減少「中無聊伏」嘅機會。
「中伏」意指誤踩陷阱、中圈套，或者係遇到一啲喺你意料之外嘅騎呢事。出黎打工唔多唔少都中過伏，一般辦公室中伏事件包括：
老闆叫你用A方法完成個project，你照做之後，佢失憶咁問你點解咁多方法唔用，偏偏用A方法咁蠢？
新入職，發現上手留低好多做到亂七八糟嘅嘢要你執返好，個Server仲好亂，好多File唔知Save咗去邊。
受人錢財，替人消災，呢啲「正常伏」，通常一邊內心碎碎唸一邊完成就無事，最少你知道你份糧係包嘅。
而「無聊伏」，就係遇到一啲同你個Position完全無關嘅麻煩，招聘廣告無寫、見工又無講，甚至係你同朋友呻，佢哋都覺得你誇大。
「無聊伏」真係千奇百趣，又睇吓你嗰啲趣啲，定以下呢啲趣啲：
大公司出糧係「阿公數」，即係成個集團出畀你，你老闆都只係打工仔，相對地好多嘢會鬆手啲；而細公司出糧係「老闆數」，啲錢真係從你老闆個戶口出，自然一分一毫都好肉緊。除咗平時搵Vendor佢要求你格到盡之外，仲會要求你完全配合任何要求，咁佢先會覺得你份糧抵畀。所以喺細公司比喺大公司，要出更多無聊力去配合無聊要求。
估你唔到咁伏 賺埋啲人工都唔夠買防曬
我做過一份工，靚Office落地玻璃，全公司除咗門口就無牆，位同位之間用玻璃相隔，我見工嗰陣覺得個Office好光猛好靚。點知第一日返工，同事帶我埋去一個窗口位，一坐低我就知中伏，曬到我坐咗五分鐘就成頭汗，膽粗粗問個經理可唔可以畀我調位（Office內明明有十個無人坐嘅空位），經理答得好快：「唔得！」我問點解，佢支吾以對話枱頭電話號碼已經set好哂，亦安排咗幫我印卡片，無得改。（明明我先第一日返工，印咩卡片）
隔咗5分鐘我又忍唔住再問：「咁請問可唔可以落窗簾？個太陽照到mon都反哂光，我睇得好辛苦。」幾個同事圍埋一堆細聲商討後，經理同我講：「其實呢…老闆係好信風水嘅，你之所以要坐呢個位係因為佢睇完你CV，計過時辰八字，覺得你適合坐呢個位，而窗簾呢，就風水師傅話一定要有陽光入嚟，所以唔準落。不過咁，你呢個位又的確係全公司最曬，以後老闆喺度你就曬吓，佢唔喺度你先落簾啦。」
除此之外，仲有好多無聊伏位，例如佢認為每個人身上都存在唔同能量，呢啲能量會影響公司業績，即係如果畀佢見到你無表情，就即係你唔開心，你唔開心會令佢生意唔好，所以一見到佢就要係又笑唔係又笑；枱頭電話響唔可以即刻接，要響三下，第四下先可以接……
【當office係屋企】 遇上潔癖友 員工無鞋挽屐走
大公司Office租金由account經理睇，同樣地，佢都只係打工，佢簽完張租金票之後唔會特別愛錫個Office的。而細公司呢？阿老闆真金白銀自己畀租，當然一磚一瓦都緊張啲。我有個朋友話佢老闆唔準同事着鞋入公司，門口有個玄關位，唔該你除咗鞋先好開工。當然，喺Office食嘢係絕對被禁止的，有同事想慳錢帶飯，結果幾個同事要喺後樓梯開餐。
【當office係屋企】 志明與春嬌辦公室版
老闆無潔癖，但當正公司係自己屋企一樣煩，佢一邊度橋一邊食煙，你就吸哂佢啲二手煙，又無得投訴。中小企慳得就慳，又無錢請姐姐清潔，Office又亂又多塵仲有煙味，試過有同事身子弱，返咗3個月工就入醫院，醫生話佢腸敏感，可能係日日吸大量二手煙令佢經常肚痛，一出院佢就辭咗職，轉工後佢真係無哂事。
【當員工係家人】榮升補習天皇
當老細將公司當成自己屋企，你收佢人工佢就當你「屋企人」喇。咦你英文幾好喎，我個女要交份Essay，但佢又唔係好識做，你知啦，而家小朋友讀書壓力好大。反正呢排公司無乜生意，你就幫手寫份Essay啦。
【側側膊唔多覺】漏報／遲遲唔報MPF
大公司點衰都好，都會跟足法律行事。MPF呢啲嘢，HR唔做會被Legal team捽，所以一定喺新員工入職內幾日就幫你搞掂。細公司？老闆心諗，頭一個月僱主供、僱員唔使供，而家啲後生仔都唔知做唔做到一個月又走，遲啲先報啦……哎呀！阿Peter一個唔覺意過到一個月？「唔好意思喎，上個月忙得濟唔記得搞，MPF到退休先拎得返，嗰少少錢到時都無乜用啦，我哋由今個月開始計你唔介意呀嘛？」
所以，未有機會入大公司但又想避開無聊伏，就要把握見工時嘅少少時間觀察多啲。除咗問清楚Job Duties同人工，更加要注意辦公室環境，例如會唔會好多佛像、風水擺設？有無煙味？如果好鐘意帶飯，就要望吓有無雪櫃同微波爐，細公司通常一眼睇哂。同事啲枱會唔會過份乾淨？門口有無放定幾對拖鞋畀人換？
你可能話，咁樣搵工係咪太挑剔？但辦公室你每日最少坐8個鐘喎，你受到咪得囉，正如子華神所講：「世上無難事，只要肯屈服。」
（本文純屬作者意見，不代表香港01立場。）