別浪費青春，一生人最少試一次「辦公室戀情」
除咗為份糧，能令打工仔每日提早起身Gel頭、化妝，朝氣勃勃充滿動力咁返工嘅原因，大概是辦公室戀情。
我所講嘅辦公室戀情唔只係同同事拍拖／結婚，Flirt（調情）都計，而且我認為一生人最少試一次，因為呢類戀情剛開始嗰陣通常都要懶神秘，那偷偷摸摸的刺激感，讓情感更熾熱升溫、浪漫倍增。
當然，論偷、論刺激，「辦公室姦情」（意指和同事搞婚外情）一定在「戀情」之上，姦情的男主角，通常都是有權有勢的，不過本文集中討論「戀情」。
企業應該樂於見到辦公室戀情，因為公司可從中得益，員工們會：自動早到遲走、積極爭取表現、精神奕奕甚至變得健康，少咗請病假、同事間和睦起來。
以下有親身經歷，也有其他人的故事，因此所有主角都用Jennifer代入吧。
Jennifer，是她也是你和我。
1. 見耐啲 見耐啲 早早返工 唔願放工
Jennifer曾經喺某政黨做秘書，跟老闆周圍見人是常識吧。老闆同其中一個黨友M係好兄弟，平日開會、工餘時間都成日見，咁老闆同M見得多，自然Jennifer同M都見得多。而M其實十分掌握Jennifer老闆的日程，話哂同一個黨又差唔多Post，基本上黨內幾時有會開、幾時有活動，M個日程就等同Jennifer老闆個日程。
M藉住呢個「優勢」，明知Jennifer老闆去咗中環開會，就專登去office扮搵佢老闆，實際係想見Jennifer：有時買外賣上去、有時幫手處理工作上困難、有時仲會教Jennifer點應付老闆嘅無理要求添。同大部份情侶一樣，Jennifer同M出街、睇戲、食飯，然後就拍拖喇。戀情未穩定，M唔想公開，佢都唔知點同好兄弟講：「喂，我同咗你秘書一齊。」所以每次M同Jennifer要見面，就多數係「開工前」同「放工後」。
|| 開工前 ||
明明平時塞塊餅落口就當早餐，「有路」之後唔知點解特別注重飲食均衡，要約埋一齊食早餐，一邊食又一邊好驚被同事撞到，愈驚就愈甜蜜。或者會買定早餐／小禮物，晨咁早喺全公司都未返工之前放喺佢個位玩驚喜，一定唔會遲到之餘仲會早到好多添，益埋公司。
|| 放工後 ||
M接Jennifer放工，架車唔可以泊office門口，因為好兄弟（Jennifer老闆）一定認得M架車，最安全當然係等老闆走左Jennifer先走，包唔會撞到，所以就變相OT 喇。Jennifer留喺公司時間長咗，唔多唔少都會做多咗嘢。
2. 積極爭取表現
呢個唔使多講，無人想喺自己鍾意嘅人面前犯低能錯，自然用心工作。
Jennifer喺鞋店做Sales，全舖都知佢計數差，688元一對鞋，第二對有八折，無論有幾多客人問佢，佢都答唔到第二對即係幾錢，試過唔少次因為要行開去搵計數機，令客人黑面不滿。但當公司請咗個新男同事，而Jennifer又同新男同事開始flirt之後，一切不可能都變成可能──Jennier可以好快答出550.4元！仲哄到客人好開心，識教客人買四對，享兩次八折。Jennifer自此遇到無理客人都笑口常開，因為唔想畀意中人見到自己發脾氣，仲做咗幾個月top sales。
3. 精神奕奕甚至變得健康，少咗請病假
有對象之後，返工從此不再沉悶，假都請少咗。Jennifer有次做做吓嘢，收到「對象」send email嚟問佢肚唔肚餓，話買咗啲嘢畀佢，叫佢去雪櫃拎（因為未正式拍拖，唔可以公開交收）。於是Jennifer就鬼鬼祟祟走去雪櫃睇吓有咩食，見到有盒嘢寫住自己個名，噢，打開原來係之前一齊行街話過鍾意嘅絲巾！小驚喜令Jennifer咪咪笑咗幾日。當然，Jennifer之後帶條絲巾返工，有其他女同事話靚，送禮同收禮人聽到都感覺良好，兩個人之間有小秘密，快樂延續多幾日。同同事flirt吓，返工返得開心，日日放工就諗定聽日返工着咩衫，自然少左詐病「射波」，出勤率上升。
而正式拍咗拖或公開咗嘅同事，就更加會整吓愛心飯盒。Jennifer和同事T拍拖之後，大家先知Jennifer係臥虎藏龍嘅廚神！日日都好花心思煮唔同款飯盒畀T：無骨海南雞、無殼脆蝦球、可愛嘅公仔飯糰，仲有剝咗皮嘅提子！為嘅就係打開飯盒果陣，身邊啲同事會「嘩！好靚呀！好好食咁喎！」喂，普通lunch喎，食得咁招積真係引起幾大迴響，同事拍拖後少咗出街食味精，自然愈來愈健康，打份proposal都精神啲。
4. 同事間和睦起來
呢個喺大公司會較顯而易見，假設你係電腦部，全公司幾百人，呢個叫你換mouse，果個話email收得慢，幫邊個先？當然會大細超。自從人事部經理Jennifer嫁咗畀電腦部經理Brian之後，兩個部門的同事就變咗「一家人」，特別friend，中秋會約埋一齊去BBQ ，大家兄弟姊妹咁，做起事自然易話為啲，人事部啲mouse會換得快啲 ，電腦部嘅招聘廣告登得早啲 ，總之兩個部門變得和睦起來，我相信高層是樂意見到的。
搞得辦公室戀情，無論你自以為幾低調都好，一兩個眼神、經常前後腳，都總會畀其他同事察覺的，身處甜蜜中，比人傳來傳去果陣，口裏說不，心裏更加甜蜜。如果你結婚前無試過辦公室戀情，同中學無拍過拖一樣，白白浪費青春了。
（本文純屬作者意見，不代表香港01立場。）