【求職面試攻略．來稿】HR有4種，應對技巧大不同
上次篇文用咗「蠢嘅 HR」呢幾隻字，雖說咁寫主要係搞吓氣氛，但其實個人嚟講並唔太認同，所以今次想講多少少。
個人嚟講，我覺得呢個世界只有「蠢／醒嘅人」而冇「蠢／醒嘅 HR」。因為醒唔醒睇人，你的本質如何，你的表現也必如何，所以我反而會分 HR 做「有心／冇心嘅 HR」。
不過既然講開 HR（此文針對面試員），認識吓唔同種類、唔同風格嘅面試員，等各位兄弟姐妹可以預先有定個心理準備，可能都幫到吓手。
以下我會將常見嘅面試員極廣義及空泛地分做 4 種，同大家分享吓。
文：拾陸
→1. 有心有力型←
特點：
閱人無數，但仲係好鍾意見人，未麻木；
會認真審閱履歷表、申請表同埋個人資料，做好事前準備；
識問問題，會引導作答，控場能力高；
細心小心，圓滑謹慎，對行業有認知；
太有主見，較易為應徵者定型；
有時「氣場」太強或者太執着，會嚇親人。
其實面對「有心有力型」絕對係好事，因為佢哋有經驗，控場力高，又對你嘅行業同埋工作有深刻認知，所以知道點樣帶住你傾偈，無論係氣氛或者出題都有助你表現。有時甚至知道點樣出題令你答得更多去幫你加分，令一啲冇咁好面試技巧嘅應徵者都可以正常發揮。
但係佢哋有時亦好似把雙面刃，會因為太熟導致太主觀，當面對一啲細眉細眼位，或者當應徵者講錯少少嘢，佢哋就可能會扣分或者建立壞印象。更甚係先入為主（例如履歷表寫得唔好），未見就先打八十大板。
應對建議：
問問題外表有套路，但變化大而且會根據答案而即時作出調整，所以要有定心理準備問題次序或者方向唔會太死板；
盡可能真誠，知幾多講幾多，有時誇大些少無傷大雅，但無謂吹水；
嘗試消化佢嘅問題，估吓佢實際想知啲乜，對症下藥；
表現自信，唔好俾佢「拋」到。
→2. 有心無力型←
特點：
有準備，面談認真；
未必能捉緊重點發問；
未必敏銳到能夠從答題中抓住蛛絲馬跡；
問問題冇套路，冇焦點；
唔算太多經驗（少見人，或者未熟行業）。
面對「有心無力型」嘅你，可能需要比平時更專心。因為佢哋可能未習慣見人，或者唔熟悉你嘅行業、工作或崗位，而呢啲時候最常出現遊花園或者言不及義嘅情況。為咗令面試順利進行，你需要專心留意面試走向，搵位「攝」，自行揪出重點推銷自己。
雖然呢種面試員冇咁「自動波」，但唔代表佢哋做唔到嘢。當有合適資料（呢個係一個中性詞，代表好亦代表壞嘅資訊）佢哋一樣會留心留神。所以即使佢未能夠幫你製造優良嘅客觀環境，你都可以嘗試自己講多少少，推銷吓自己，俾佢知道你有幾把炮幾有誠意，佢就有機會幫你做傳聲筒，將呢啲資訊轉告 line manager。
應對建議：
耐性、專心、留心。留意話題同焦點，由於對方都未必好有方向肯定之後想問啲咩，有需要／有機會就引佢去你想講嘅範疇；
借題發揮，提供多啲資訊俾佢考慮；
如果佢唔太熟路，合適時候不妨加油添醋推銷吓自己。
→3. 冇心有力型←
特點：
老手，但對面試麻木；
問問題會有一定套路，多數係啲「行」嘢（經典例子：「5 年內想做到咩位」、「有咩優點缺點」之類）；
對行業有認知，對基本嘢有一定理解；
簡單直接、目標為本，對於問題範圍外嘅額外資訊冇太大興趣；
過分自信，覺得世事都俾佢看透。
同上面兩種人相比，「無心有力型」可以話係比較麻煩嘅對手，因為佢哋熟悉行業，亦見得人多，經驗能力俱備。但係佢哋冇咁有心去了解應徵者，好多時採用偏向形式化嘅答問，再加上你講少少嘢，佢就覺得模透你底嘅習慣，往往令你喺面試過程覺得對方冇心傾、令你講嘢「疾住疾住」、無奈，甚至灰咗，直接影響發揮。
如果話同「有心有力型」面試係輕鬆舒服嘅「談情」，咁同「無心有力型」面試就係拳拳到肉嘅「搏鬥」。因為你要喺最短時間、最少機會下，出招直取對方心臟。而且對手唔係省油嘅燈，你十八銅人咁喺佢周圍遊走，基本上作用不大，最好就好似葉問咁直接攻佢中路。
應對建議：
忍耐，唔好俾佢影響心情，更加唔好俾佢牽住個鼻行；
記住你唔係同佢做人世，但過到佢呢關先可以見 line manager（除非你係應徵緊人事部……）；
針對佢目標為本嘅特質，先答到佢要嘅答案，再衡量講多幾多嘢；
提供額外資訊嘅時候要小心，唔好拉到太遠，佢會覺得離題；
吹水可以，但要靈活，記住佢表面唔深究唔感興趣，唔代表佢係烏瀡瀡嗰種人。
→4. 冇心無力型←
特點：
特點就係冇特點；
少見人，冇技巧，又唔熟行情；
冇面試能力之餘，亦唔諗點樣做好啲，揸流攤交行貨。
如果你對住呢類 interviewer，恭喜你！因為佢哋真係冇路捉。你嘅面試表現基本上影響力有限，最後成唔成功，可以話運氣因素居多。不過既然你人都過咗去面試，冇理由唔盡做嘅，所以不妨放手一搏，嘗試自己安插多啲位引發佢嘅興趣。
應對建議：
自我介紹講詳細啲；
畀多啲例子，講吓故仔引發佢興趣／加深印象;
回憶吓招聘廣告，估吓佢哋搵緊啲咩人，再硬銷自己；
由於佢哋冇能力冇心力去分析應徵者，所以你要填鴨式將自己植入佢印象之中（其實呢啲嘢，你面對樓上各種面試員都應該做／可以做，只係程度同埋方式上會有好大分別）。
面試員實際表現其實會俾好多因素影響，例如佢本人係咪近期先轉行？佢會唔會已經辭咗工處於通知期狀態？空缺係咪已經搵到心儀人選？佢哋個位有幾急要人用？甚至尋晚西甲踢幾點？通通都可能有影響。但係作為參考，下次撞到個類似上述嘅面試員嗰時，不妨用吓呢啲方法去應對，可能會收到唔錯嘅效果。
正所謂十隻手指有長短，即使有心有力之人，道行亦有高低之分。所以如果我話我講嘅嘢係必勝攻略，你真係唔好信。再者，面試嘅嘢七分實力，三分運氣，排喺你之前個對手係超人定係傻人，對你嘅影響已經大不同。所以唯一嘅金科玉律，就係做好充分嘅準備。做好咗自己嘅話，結果如何都無謂太在意了。
希望有機會再分享！
【編按：作者從事人力資源及培訓多年，最愛與人面試交流。】
（本文為投稿，稿件可電郵至iwanttovoice@hk01.com；文章純屬作者意見，不代表香港01立場。）