【廢青求職攻略】點先知句「等消息」係請定唔請？

估唔到之前幾篇講見工嘅文章都幾受歡迎，連帶我Facebook page都多咗好多likes同inbox訊息。應承過部份讀者會回答佢地問題，所以今篇分享吓最多人問嘅問題。

上回教路：如何「請假見工」不被老細發現？ 
　　　　　最差的見工技巧：「只被問而不發問」

「今日interview完㗎喇，如果有消息我哋會大約兩星期左右打畀你。」

  點樣分佢講呢句嘢係　1. 打發你／2. 都有啲機會／3.已經十足把握請硬你？

首先，如果間公司喺成個interview過程都無問你期望薪酬係幾多，你都可以死咗條心，佢地對你完全無興趣。雖然你份申請表有個位填「期望薪酬」，但如果佢對你有啲意思，多數都會再親口問，因為佢都要循例壓吓你價（題外話，我遇過一次唔係壓價，係主動加我，surprise！）假設你答期望係「兩萬」，佢會話：「有無得減啲？」/「係底線？」

如果HR 問完你，出一出去，team head再返嚟你問你價，當然你機會又再大啲。因為team head要控制自己組嘅budget，所以想請嘅都會親自問一問，睇吓有無得慳盡啲。

留意表情、語氣，同一句說話，唔同態度會有唔同意思。如果佢叫你等消息時係冷冰冰，甚至低頭一邊執紙一邊講，咁你返屋企就繼續send CV啦。我試過幾次，interview過程中已感覺到係想請我，對方通常都好親切、好熱情好好笑容，咁講真，你估你老闆好鐘意浪費時間不停in人咩，搵到啱，佢都真係開心㗎。而嗰句等消息，幾次對方都係握住手同我講，甚至加句：「都好快會call㗎喇。」

  點樣先唔使被HR壓價？

呢個純粹係睇你有幾自信，你企硬就無人恰到你。你send CV嗰陣，佢地就睇到你「期望薪酬」係幾多啦，如果價錢同佢地budget差太遠，都未必會叫你去見，叫得你去，其實個價都同佢地心水差唔多。

如果interview過程中，你都感受到佢地對你有意思，最後關頭不妨企硬，一蚊都唔減。講真，你減，唔通會減幾千蚊咩？都係減一千幾百，我又唔係好信一間公司會因為五百蚊而放棄一個合適人選。既然嗰幾百蚊都唔係關鍵，點解唔企硬？以免返工之後條氣唔順，同埋，減你一千好容易，到你想公司加薪加返比你，就唔知等幾耐。除非你獅子開大口，如果都係市價嘅話，緊記對自己多啲信心，要相信你係值呢個價！

如果你都有見工秘技／疑問，歡迎去我facebook留言分享。

（文章純屬作者意見，不代表香港01立場。）