【職場性騷擾】保障員工 其實公司都有責任

撰文:詩寧
出版:更新:

好像很少聽到人提及「職場性騷擾」這話題,部份原因又是那些家醜不出外傳之類的思想,你向公司投訴,公司都會叫你息事寧人,最多以後唔使你同個人渣合作,甚至炒咗佢。(但炒完佢,佢又可以去另一間公司害人)

喺「向公司投訴」之前,受害者先要經過自己的心理掙扎、同事竊竊私語如「佢以為自己好靚/小鮮肉呀?」一間公司咁多人,總有人口臭,無形就加深受害者心理負擔。好啦,到你勇敢向公司反映,又要自己去「搵證據」!「性騷擾」,由言語到肢體觸碰都係好難有證據……無啦啦俾人「撩」/俾人摸已經好委屈,仲要被不信任:「你有無證據吖?」。所以,大部份受害者都選擇吞咗佢、返屋企喊、下次自己小心啲…… 

有勞工團體曾經喺2015年公布過一個針對服務業嘅性騷擾調查,發現有六成受訪女性受過性騷擾,「人渣」分別為客戶、上司及同事。即係每個層面都有!小心啲?點樣可以小心啲?

有空姐在網上申訴被性騷擾。(Facebook截圖)

人渣真係無處不在

當中,兩成半人選擇啞忍……唉,我知啞忍係好懦弱,但當你身受其害,真係會徬徨無助。初出社會,有次去annual dinner,就親眼睇住個高層,飲多兩杯屎水落肚,突然從後抱起一個女同事(小薯),係咁轉轉轉……個受害女同事嘅樣明顯係無奈同無助。我同另一個女同事見到呆咗,好嬲話「搞錯呀!」點知隔離就有男同事冷冷的:「出嚟撈係咁架啦。」出嚟撈?我地正正經經入一間正當公司,叫做「出嚟撈」?食餐annual dinner原來要預咗比人非禮?

又曾經,我要同公司五六個董事一齊外出工作,喺一間酒店開記者招待會,宣布業績之類吧。日光日白是辦公時間來的,所以一齊坐公司車出發,佢地(其中四個吧)喺車上面就已經係咁講黃色笑話撩我,頭兩句我未識反應,但好快我已經木口木面甚至黑面。當然,黑面對人渣嚟講,係毫無攻擊或阻嚇力的,就係咁,被言語性騷擾到落車。咁多人迫喺架車度,轉彎時亦唔知有心定無意挨落我度,到記招完咗,人渣一號失驚無神喺後面出現,懶熟咁用力搭我膊頭,攬我埋佢個身度問完咗活動一唔一齊食飯。其實已經好抆,拿拿林求其答啲嘢走開,擺脫到一個,諗住行去第二度執埋物資走人,人渣二號行過又無啦啦掃吓你背問你攰唔攰! 

最後點?嗰班係公司董事,我可以點?向邊個投訴先適合?經理?HR?報警?well……「你有無證據吖?」香港有幾多公司係有完善投訴機制去處理性騷擾個案?平機會有指引教僱主處理職場性騷擾事件,但並唔係法定責任!等立法?立法會選舉我都無見到有議員用呢樣嘢做政綱啦。

好多人以為「摸下啫,又唔會少忽肉」。就係呢啲閒言閒語,令啲人渣睇死你唔敢投訴佢!(GettyImages)

你有無證據吖?

早前有單新聞話有人渣偷飲女同事放喺雪櫃的人奶,仲要變態到控制唔到理智,send訊息同圖比受害人話自己飲咗,要去到咁樣,受害人先有證據去告發個人渣。如果無訊息,受害者日日返工唔知要擔驚受怕幾耐。

「你有無證據吖?」呢句說話當然好重要,如果無證據都可以定一個人罪,又會引發其他問題,但「搵證據」除咗係受害人嘅「責任」,公司亦應該積極回應、處理,而唔係求其打發個受害者就算。  

喺政府立法之前,其實各間公司可以自行拎啲人性出嚟,照顧員工多少少,以台灣為例,佢地有「性別工作平等法」,規定所有請多過30人嘅公司,就要訂定性騷擾防治措施、申訴及懲戒辦法,並喺工作場所公開揭示,即係一系列清楚明確嘅投訴渠道。

而僱主收到投訴後,亦應採取立即有效嘅糾正及補救措施。查完事件屬實,要罰條人渣,相反如果係誣告,亦都有規定要懲戒屈人嗰個。

我曾經做過一間外資公司,入職第一日HR就畀咗張卡仔我,講笑話係「報串」時用的,如果在工作上不幸遇到性騷擾/有人貪污/犯法之類,就可以致電卡仔上的熱線,會有神秘人接聽,之後就有特定團隊去查。我喺嗰間公司無遇過上述不幸,所以無打過去。而公司都時有講座、海報提醒做呢啲衰嘢會有咩後果,唔多唔少有啲啲警剔作用吧,有時男同事口花吹水撩幾句:「今日好靚喎,放工去邊呀?」都會有人喺隔離話:「你咁樣望佢,因住佢打去報串熱線」。我唔敢肯定講特定機制一定有用,但最少出事時唔會無助、唔會覺得零機會申訴,最少最少,有個方法可循。

(文章純屬作者意見,不代表香港01立場。)