【除咗彈琴我仲鍾意做乜】必睇英美劇清單（上）
既然有咁多人覺得古典音樂手就淨係識得離地玩音樂同埋練琴，咁我就試吓開一個系列講下音樂以外嘅我仲鍾意做乜嘢，還有「甚麼人生」。
其實都幾普通：我超鍾意睇劇。有內容嘅故事配上一流製作同有深度嘅演出，可以完全吸住我嘅注意力同埋興趣。
最簡單嚟講，一套劇好唔好睇就係佢可唔可以令你橫跨好多年都要追到個結尾，呢個係第一層次。有好多劇可能頭幾集做得唔錯，或者個題材背景幾吸引，但係跟住慢慢質素下降，而且更多時候係唔知講緊乜嘢。不斷製造同一款懸疑去到下一集，但係一季一季加埋就沒有什麼角色發展和主題連繫。結果就有啲似一個寫得唔係幾好嘅交響樂咁樣，第一樂章可能幾好聽，但係234樂章就好難發展落去。自然地，觀眾亦可能一兩季後就覺得唔對路，中伏，慳返時間搵過第二齣戲睇仲好。
第二層次係令你有衝動翻睇。翻睇啲乜？當然除咗睇吓宋仲基點樣可以喺第一集就知道鍾意宋慧喬，聽下歌詞講I love you廿幾次俾我哋再深深感受下箇中極度濫情嘅濃郁感覺之外……No, No, No，翻睇嘅重點係要睇細節。睇吓導演點樣講故仔、點樣埋下伏線、有什麼隱喻、演員點樣從細微嘅反應表達內心世界、角色點樣發展、甚至聽佢點樣運用配樂。講還講，我哋幾個世紀後仲聽緊古典音樂的原因咪係一樣？貝多芬嘅樂曲已經聽咗幾千百萬次，仲會有啲乜嘢新鮮感？（先唔好同我講演繹。）其實我哋重聽重演，其實就係去聽佢箇中嘅細節同埋內容，再加上唔同演奏者嘅個人風格同埋觀點，呢個係另一種欣賞嘅角度同埋層次。Yay！咁都比我link到音樂，果然係離地。
但最終層次，就係一套好嘅劇要令你變成劇痴。令你不能自拔research晒啲來龍去脈，再狂loop精彩片段，直到永遠。（Literally，永遠。）小弟唔多唔少睇咗30套英美劇，冇阿媽阿妹咁叻我唔係好識聽韓文，所以miss左好多好嘢，但點都好，等我分上下集介紹十齣「邁飛佛」先！
10. Orange is the new black
一齣讓人哭笑不得、不知所措，拍得又唔係好特別或好出色，但卻可令男人女人都好想睇落去嘅劇集。點解？原因好簡單，因為女人實在太有趣啦。
美國一個小監獄中有唔同背景、膚色、身世嘅女人，佢哋未必係大惡人犯下彌天大罪，但無奈地一定要喺一個地方入面同大家相處。劇集慢慢講佢哋嘅故事，有趣的看到這些女性們如何在生活的無奈選擇中活着自己。她們有萬惡的、善良的，更多是無奈的，因為生命如何，監獄裏的日子總要過。
好多時候我們以為是自己選擇了道路，決定了個性，不知道原來相比下，我們只是社會的一角，眾生裏的其中一個故事，更可能全部也是受害者，無分彼此。監獄中各個女子們也可能只想尋找一個價值——她們還活着的尊嚴。
9. House of Cards (U.S./U.K.)
很多人心中的政治神劇。第一季固然出色，但相信不少人也對之後三季失望。整體上也是一套頗為依靠政治角力情節和主角的謀略手段之進階劇情片。Kevin Spacey和Robin Wright演出當然出色，但尤其第二三季可惜劇情有點兒轉得太多個彎，有時missed the point。而且劇情以外並不太說到一些更深層的社會階層矛盾和政治哲理（也可能是我道行未夠不太看到）。
其實劇句上美國版比不上英國版原著，睇完兩個版本之後亦可見到兩國文化應用英語的不同風格和方向。所以其實睇劇係真係可以學到英文㗎！點都好，紙牌屋絕對是一個必看同埋超現代甚至現實化嘅政治劇。It is one of the greats, but not the greatest.
8. Lost
我覺得Lost係美劇21世紀後嘅一個重要轉捩點。從題材和規模開始，Lost一開始就吸引到咁多觀眾唔係淨係因為佢令到人哋想知道佢哋點解撞飛機咁簡單，而係你感覺到佢有一個世界觀想講。所以Lost某程度上inspirer咗好多之後嘅劇集，令佢哋想超出一般劇情片嘅框框，探討電視劇集可以講到幾遠，帶出什麼價值。但當然，大部份都收晒檔。例如Heroes, Flashforward等……一開始令你想睇，但講唔到point，最後甚至要腰斬收科。
Lost最後都完得OK啦……我接受到佢用抽象概念形化咗嗰科幻故事，從而帶出生命觀。但整體畀人感覺個Scale有啲太大，有小小「無咁大個頭唔好戴咁大頂帽」的感覺，細節變得鬆散。哈哈，not unlike some classical music work, too.
7. WestWorld
跳跳跳！ 10年後嘅Westworld，好明顯係一個創作潮成熟到一個位而出現嘅超級劇作。世界觀、哲理、存在主義、人工智能全部連在一起，而且第一季嘅execution接近完美。絕對係HBO在Game of Thrones之後最好嘅並行接班人。
完美編劇配上Anthony Hopkins, Ed Harris大師級嘅演出，用瘋狂顛倒時序手法講出一個關於存在和A.I. consciousness嘅故事過程。Westworld係一個超值得翻睇但係我唔敢翻睇嘅劇集。因為每一個細節同對白都可以係一個哲學題，冇答案，諗爆腦。唯一佢未喺我心目中佔再高啲名次嘅原因係因為仲係喺第一季，等到2018年再睇睇啦！
6. Mr. Robot
香港人應該仲係對這齣新劇有少少陌生，相比下WestWorld somehow一季就已經做到好大noise。不過Mr. Robot都好勁，舊年出咗一季就已經得到金球奬最佳電視劇集奬。不過其實understandable，因為Mr. Robot題材吸引，講一個駭客點樣反社會同埋反抗政權制度，但係其實背後的人來人往，心理暗示好深，節奏偏慢，係一套非常含蓄而藏了好多細節嘅隱世神作。
除咗劇中主角Mr. Robot「兩角一色」嘅伏筆精彩之外，各位配角嘅潛伏動機，心理矛盾，社會映射亦令到觀眾可以多重代入故事時代感。而且導演將鏡頭搬弄主角嘅雙重性格同幻想，攝影師視覺比例嘅運用更是別樹一格，用對比法反射出角色心理。My god, what a show. 勁想重睇。
（文章純屬作者意見，不代表香港01立場。）