【轉載】擺酒派帖絕對係一個反思自己做人處世嘅好機會

細細個娘親教落，世界上無人有必要對你好。好多時無事無幹，人對身邊嘅事物都可以唔睇唔理唔志在 — whatsapp可以唔覆，飛機可以任放，返工可以黑臉，一句忙就話唔能夠理你。
但人愈大，體會就愈深。若然你開始談婚論嫁，你就會發現做過嘅所有嘢總有一日無所遁形，咭數一筆清。

文：逆行@電視汁撈飯

當你決定擺酒，要諗請邊個唔請邊個開始，就會驚覺呢件事難搞過關愛座。

連兄弟姊妹都唔夠腳

正常嚟講，無論小學中學大學定做嘢，點都有幾堆舊同學、舊同事，佢哋每個喺你心目中都有唔同位置，最怕唔係唔鐘意無嘢傾甚至好憎佢果堆，反而係果炸識識地又唔算熟嘅朋友，「派or not to派，that is the question」。你會即時回想同每個人嘅過去種種，做過乜講過乜，擔心當天的有負於他會換來「咁都好意思請我？！唔係呱！」；然而你小心翼翼，將賓客名單縮到精雕細琢，又可能會忘掉了那些自作多情、滿心期待的某君，黯然神傷，從此心有芥蒂。

呢個時候，如果你無乜朋友，或者可以免卻不少煩惱。然而你屈指一算，發現連兄弟姊妹伴郎伴娘都唔夠腳，你嘗試用一句老生常談安慰自己，「朋友唔使多，最緊要真心有幾個」，但如果最後只能夠搵失散多年嘅part time同事阿強、讀過一個course已經唔係好認得嘅pro mate Christine，或者喺街場打過幾場波嘅波友Peter，你能否壓下那份霎時的唏噓？

伴郎伴娘變普通賓客

「我好多朋友㗎！」咁我真係恭喜你呀！簽咗個洪欣咁蠢…（Sorry打錯） ，但即使你好多老友其實都暗藏殺機。除非你姓梁或者姓張，唔係如果有廿幾三十個兄弟或者姊妹團，啲人好容易以為中共高層落區探訪。實情兄弟姊妹每邊頂盡十個八個，當你真係有咁多結義金蘭或者沙煲兄弟，你又如何是好？眼見佢地全部一早滿心期待，連你男朋友都未有，就諗定伴娘裙嘅顏色，玩新郎有咩變態game，夜晚感動到要攬住你喊，但最後發現自己竟然只係一個普通賓客，輕則心有不甘，重則醉倒爆喊「我真係以為…你會搵我做伴娘㗎…嗚嗚嗚…」唔講，以為佢係你個ex…

當然你可以話「我旅行結婚喎」、「我唔擺酒呀」、「我唔請朋友架」甚至「我唔會受世俗眼光束縛，唔諗住結婚囉」，咁以上嘅事好似都與你何干。奈何結婚擺酒同特首選舉一樣，主角唔係你，但都可以關你事——去到咁上下年紀，就算你唔結，都無可避免要去飲、幫手做兄弟／姊妹甚至伴郎伴娘，問題就出現啦。

連友情都有得做兵

如果結婚係你老死，你就有機會成為上文嗰個 「我以為…」，希望身負重任，結果卻是「做兄弟無我份！？」鐘意嘅女仔唔約你都可以主動約佢，人地無叫你去唔通你去問人「點解唔搵我做兄弟呀？」當意識到人揀我、我揀人，突然全部都不揀我，你先體會到原來除咗愛情，連友情都有得做兵。

除咗身分角色，邊個請你都好重要。例行公事嚟講，「嗌唔出名嘅親戚」實在當之無愧。你哋或者見過，但你永遠唔知同你有咩關係，不過你無得揀。親戚同例湯一樣，整定嘅，你果晚唔出現，你阿媽唔會再畀你喺屋企出現；但如果係你好L憎嘅HR阿姐，畢業後都無乜兩句嘅舊同學，甚至一啲淨係叫得出英文名嘅Facebook朋友，你對他們的邀請，簡直受寵若驚，唔到派帖你都唔發現你對他們如斯重要。

而若然婚宴上有唔想見到嘅人，又或者全場淨係識新郎／新娘，而酒店路程猶如新界東去新界西咁遠，基本上就會變成你同新人嘅友誼考驗。

【編按：本文獲作者授權轉載，原文刊於作者Facebook專頁。】

（文章純屬作者意見，不代表香港01立場。）