【辦公室政治】「發老闆爛渣」前要預備的事
早排睇咗另一位博客游大東的一篇影評，講從一套電影中學習職場求生術，包括打破辦公室內一啲不公平潛規則、應對忌才上司同埋喺適當時候向上司「發難」等等，當中最令人「諗到都high」就應該係「發老闆爛渣」！
而現實生活中，又係咪真係可以咁做？我知你一定有幻想過，但要成真同成功，就要有足夠人脈、能力、智慧、膽識。
除非位下屬本身係好唔成熟或者EQ差，否則會令到下屬發難，都多數係已經忍咗好耐，股怨氣愈碌愈大終於要爆。但各位打工仔要記住，發難背後要有原因、目的，絕對唔係純粹發洩情緒或者型一下，或者再坦白啲，發難，其實係辦公室政治中其中一種手段，如果你想用呢種方法去達到某個目的，有啲嘢你要預早準備好。
廣結人脈，唔好得你老闆知你表現
大家無謂呃自己，除非你公司得幾個人，否則個架構一分team分部門就點都有山頭，一時呢個大佬得勢啲，一時嗰個阿姐係紅人。雖則你唔一定要加入某特定勢力，但最緊要係畀每個勢力都見到你嘅存在、有機會就喺唔同勢力前展示才幹。呢個係包括對公司以外的客戶、生意夥伴，唔止要比人睇到你能力，仲要睇到你係思想成熟、可靠，他日佢哋需要人，會諗起可以搵你。
最傻豬就係只得直屬上司知道你能力，萬一佢忌才，你就一世唔使升，仲分分鐘要幫佢揹鑊。直到一日，上司以外其他有say嘅人都睇到你嘅能力，而且都同你熟，到你發難嗰陣，就無咁易畀上司「郁走」，而且大家都會知道你發個難係合理定無理。
Jennifer一向叻女得人心，有同唔同經理食lunch，放工亦一齊做Gym，當然大前提係佢有能力處理公務。但佢偏偏就同自己直屬上司夾唔埋，Jennifer覺得佢老闆廢，老闆又覺得Jennifer頂心頂肺，有次終於為一個presentation嘈起嚟。話說公司要報條數畀香港交易所，當中有個數據係41萬7千，Jennifer照寫，點知佢老闆話寫大啲好睇啲，寫「近50萬」，Jennifer明知寫「近50萬」係會好麻煩，所以同老闆解釋唔可以咁寫……因為雙方平時都積落唔少恩怨，結果就小事化大，愈嘈愈大。
事後，Jennifer宣告頂唔順，決定搵工，佢Send咗自己CV畀獵頭公司，好快就有僱主想請佢，原來係現公司嘅合作夥伴，仲出高9千蚊挖佢過檔，一輪見面之後，Jennifer決定辭職。點知未辭職，公司就有其他經理收到風，話做生不如做熟，同而家個上司唔啱，可以調部門跟第二個之類……發一發難變搶手貨，全靠Jennifer平時識同人保持良好關係，又識適當地展現才能。
棒打出頭鳥，用智慧分幾時進幾時退
想同其他阿頭熟、畀人知你能力，絕對唔係一朝一夕嘅事，喺你展現才華之前，好可能已經畀忌才的直屬上司按實你個頭唔畀抬高，總之千方百計阻你上位，呢啲時候你要學識收歛，唔好畀佢覺得你鋒芒太露，否則未發難就已經畀人掉咗唔知去邊。
純發洩的發難，叫衝動；有目的的發難，叫膽識
唔係人人發爛渣都有效果的，首先你平時要係一個情緒平和、講道理的人，如果你日日都發脾氣，咁發幾日就無人會再理你，無人會嘗試理解你脾氣背後嘅原因，只會當傻人發現案處理。
唔好話我唔提你，無論準備得幾好，發難始終有機會係要承受執包袱／被報復嘅後果，因為你永遠唔知對方背後又準備咗啲咩，例如佢係CEO個私生女之類，咁你就點都輸。所以遇到理直氣壯要爆seed嘅時候，都要夠膽先得，要事前衡量過自己承唔承受得起風險，無咗份工，女朋友會唔會走佬？供緊層樓會唔會畀銀行收返？父母會唔會嬲到逐你出家門？
最重要係，除咗發難，有無其他方法可以幫你達到目的？如果諗過度過都係別無他法，就鼓起勇氣、振振有詞吧！係呀，發爛渣都有好多嘢要配合架，鬼叫你已經唔係小學生咩。如果你有怨氣又未敢向老闆發難，嚟我Facebook Page呻吓先囉。
（文章純屬作者意見，不代表香港01立場。）