走得快好世界　大陸國安交手實錄

老友 Ross 心知肚明，有咩事美國領事館唔會救佢，所以先成日問，香港點呀。對呢班鬼嚟講，香港係指標。香港有咩風吹草動，走人。呢種咁 uncivilized 嘅環境造成嘅恐懼感，喺古巴同南非都見識過，但香港喎。

香港人的恐懼，似乎全世界的人都感覺到了。

一堆洋人朋友問：香港點呀？

言下之意係，你地香港仲捱到幾耐呀？

Ross 是200磅美國工程師，30年前第一次去大陸，無時無刻把美國 passport 掛在心口保命，以為可以擋公安子彈。 30年後，同老婆仔女一齊住喺上海既洋人小區，食物同水都由美國運嚟。中文零進步，但 Ross 成日問我，香港係咪好快要轉埋用簡體字。

大陸打貪，Ross 效力嘅美國工程公司被揭發賄賂地方幹部，自此公司來了面善心不善的留美海歸派，同時也是優秀的共產黨員，Ross 笑說是最光明正大嘅線眼。  

第一次見識到大陸同大陸國安的粗暴和難纏，是十幾年前的事。

一大堆國企倒台，幹了一輩子的工人被逼下崗， 我和 crew 跑到東北，透過中間人，找到了一個下崗工人聚居的地方，中間人聰明地沒有出現。十月的時間，風和日麗，卻安靜得讓人害怕。

我們拿著不怎麼清楚的地址，爬了 5 層樓梯，找到了中間人介紹的工人家庭，在 200 呎屋裡，連 90 歲阿嫲同兩個月阿孫，喊苦喊忽的道出了如何被國企剝削。兩個小時後，我們很不好意思的急急和工人家庭道別。

離開前，我們把當時還算高端科技的小型錄影帶左塞右塞，又將另一盒冇料錄影帶放回攝影機。要明白，被國安捉到，交出影帶是必要之事。但你精國安都唔笨，吉帶佢地唔會收貨，喺間屋兩個鐘，咩都冇影到，淨係飲茶，講到冇人信啦，於是我們要預先準備好影咗幾個街景 shot 同無關痛癢 shot 的錄影帶，以供沒收及交差。跑過大陸嘅記者都識。

一出門口，見到頭先坐喺度扇涼嘅大媽望咗我一眼，已經知出事，跟住，3 個國安已經唔知喺邊度飛咗出黎。唯一辦法，就係跑。

幾驚幾腳軟都要跑，我地愈跑愈大鑊；中間有條 4 線行車嘅大馬路，當時年近 40 嘅 cameraman 大嗌：「過！」冇選擇，我就衝咗過去，如是者擺脫咗兩個國安。最後一個，就喺我地兩個瘋狂香港記者跟貨車上highway 之後撇甩埋。

好似拍寒戰2咁，但我梗係冇郭富城咁勁，跳上中間人為我地預備嘅麵包車之後，即離開嗰個城市，之後抖咗 4 日。

咁樣嘅經歷，好多行家都試過。下崗工人啫，冇錯，下崗工人啫。就係咁弱小嘅反對聲音都唔得。喺大陸做野，一日要俾人捉幾多次？

有一次跑得唔夠快，被國安捉到，困咗 4 個鐘，放番；冇嚴刑逼供，冇精神虐待，冇逼我喺電視度讀悔過書。但，真係有同行被禁箇半年。

攞咗外國 passport 會唔會好啲？仲衰。死都用回鄉卡，話自己係香港人，勾結外國勢力仲大罪，信我。

冇諗過有一天，會全香港都對呢種恐懼身同感受。咁樣嘅手段，唔應該係常態。

老友 Ross 心知肚明，有咩事美國領事館唔會救佢，所以先成日問，香港點呀。對呢班鬼嚟講，香港係指標。香港有咩風吹草動，走人。呢種咁 uncivilized 嘅環境造成嘅恐懼感，喺古巴同南非都見識過，但香港喎。

係呀，香港喎。

香港又點，而家咁嘅環境，「香港喎」一詞似乎唔太適用，五星旗下，走得快好世界，依然係黃金定律。

（本文純屬作者意見，不代表香港01立場。）