職場文化睇真啲：日資企業篇

上一篇講咗中資企業某D特色，心水清嘅讀者應該留意到，全篇我多數都係講好處，壞處我只係提咗要有吸二手煙的心理準備。點解要提咁多優點？無他，話哂而家都係一年之始，想散播多啲正能量，唔想各打工仔又年頭就開始怨囉，打工會有咩壞處，唔通我唔講，你真係唔知咩。

今篇講日資，繼續集中向好方面著眼。先講下另類福利。日資公司當然有日本人，日本人真係非常講究外表，無論佢係咩職位、無論佢嗰日幾點返工，都會gel到個髮型一絲不苟、化個妝全日都唔溶、套衫永遠襯過，返工有靚人睇，絕對係起勁啲。

不過咁，日本老闆對自己有要求之餘都對員工服飾有要求，夏天女同事唔可以着背心、短裙、涼鞋，男同事365日都要着恤衫，香港夏天又熱又濕，食完lunch真係成身汗，仲要焗住都唔惹少。唔可以着波鞋，仲有唔可以戴多一對耳環，就算戴都只可以戴一粒而唔可以係吊落嚟嘅款……真係回到中學時。正面啲睇，著好啲都係尊重人尊重自己，係專業表現。

放香港假，都放日本假

唔知你記唔記得，2015年多咗一日假期叫「紀念抗日戰爭勝利70周年」，坦白說呢個假期就令在港日資企業有啲尷尬，政府立法話要放，都無得唔畀，部份日資做法就係低調處理，HR唔好特別出email提大家多咗日假期，就算提，都唔提個名。

呢個假就70年先放一次，但有啲荀嘢就年年有，例如2月11日係日本建國紀念日，部份日資打工仔就多日假了。香港假期又有得放，日本假期又有得放，有時放假真係荀過加人工。

哈日族必去日資

熱愛日本文化嘅打工仔真係努力搵吓日資公司嘅工，你一定會好開心，因為日日返工都有日本同事，可以畀你練習日文，同時公司亦會資助大家去學日文，方便工作。除咗咁，同事亦唔難得到去日本培訓、考核的機會，甚至喺日本總公司有職位空缺時，都會由內部送適合人選過去長駐。

再講，日本人講禮貌講禮儀唔洗我解釋，佢地都帶住呢個文化嚟到香港，就算佢係你上司，叫你做嘢都係唔該前唔該後，加15度鞠躬，你條氣真係會順好多。

但我認為香港打工仔比較唔習慣就應該係呢兩點：要有傷肝準備、日本同事職位同人工永遠高啲。

先講你個肝，如果你有睇過日劇或者去過日本旅行，應該都有個畫面係放工時間好多日本人去居酒屋食嘢，而飲酒，先係佢地嘅重點！的確，佢地係唔會收埋自己嗜酒這回事，如果你想埋堆／上位，Happy Friday飲飲飲是必須的，而且公司annual dinner之類，同老闆飲到佢行唔到直線係基本。

日本民族性強，有好嘢係會益自己友先，如果你唔識日文，叻到一打七十都好難升上高位，就算有位，都會先預留比日本人，香港人唔係無機會，但唔係first priority。好多經理，做咗十年都仲係經理，佢地好講年資、好講效忠，你要做返咁上下耐，佢先會覺得你係忠心可信，但就算你同另一個日本同事同grade，唔好意思，你人工福利都係差過對方。

想搵岩「職場The One」，晉升文化絕對重要，如果你都有日資公司奇聞，歡迎到我Facebook留言分享，幫吓人又搵吓知音。

（文章純屬作者意見，不代表香港01立場。）