【廢青求職攻略】跟人力資源專家意見，搵工一定掂？

早排01熱話登咗篇文，係哈佛學生Jessica Pointing教大家寫神級CV。雖然我都唔覺得佢份CV有幾神級，不過我幾認同佢啲point，諗住share去我Facebook page之際，點知見到篇文下半部份，訪問咗個人力資源顧問，提醒我要寫今篇呢個想寫好耐嘅題目！

【求職攻略】哈佛生教寫Resume技巧　港人力資源顧問：要有針對性

有時睇到啲顧問教大學生要點樣準備畢業後條路、要點樣打造一份令人過目不忘印象深刻嘅CV，真係覺得好好笑。而家咩年代？顧問們究竟知唔知「網絡」改變咗幾多行業？仲用廿年前嗰套方法嚟吸引僱主？唔係唔得，最後咪吸引到「仍然好buy廿年前嗰套」嘅僱主囉，如果你想跟呢班僱主工作，顧問嗰啲方法不妨一試。

我呢篇文唔係針對回應Jessica Pointing嗰一位顧問，因為佢講嘅嘢，亦係大家由高中開始去求職講座所聽到嘅嘢，即係大部份人力資源專家們都相信的道理，所以我係想一次過講出對呢啲耳熟能詳道理的看法，並唔係特別反對一位人士意見。

  參加課外活動幫到你搵工？

首先，專家們總係話你做學生嗰陣就要諗定將來條路，喂，真係諗到？我想問返佢係唔係讀緊大學就希望畢業後負責教人／幫人搵工？有幾多人真係做緊／做過細個「我的志願」所寫嘅工作？（利申：我係，不過我身邊好多人都唔係）除咗專業人士，乜師物師真係要好早決定去向，因為要讀好多年書。否則，路，好多時都係一步步行出嚟，越行越知自己想點。

成日同啲學生講要諗定第時返咩工而決定你今日參加乜課外活動，因為你參加嘅課外活動可以將來喺見工時候講。好啦，各位已經喺社會工作緊嘅讀者，大家心裡明白，公開試成績都唔係成日有僱主睇啦，何況課外活動？你拎過話劇團最佳女主角又如何呀？

坦白啲啦，參加課外活動對求職嘅用處嚟講，最重要係識多啲師兄師姐，同佢地熟啲，畀更多人見到你嘅性格同才能，希望畢業之後佢地會介紹工比你，識人好過識字呀，特別係fresh grad。當然，選活動個前題係，你真係鐘意、投入，先會識到真朋友，咁人地先會幫你。再者，當大學生參加課外活動只係為份工而唔係為興趣，香港真係好悲哀。

  Cover letter真係重要？

Cover letter重唔重要真係可圈可點，但我覺得隨住互聯網發達到連幼稚園學生都上網做功課嘅年代，僱主真係唔知封信係喺網上集百家大全？當中分別就係懶嘅求職者，搵一篇參考；勤力嘅求職者，搵十篇參考。想睇你學業、職場經驗，睇resume就得，想認識你個人，直接叫你上嚟講啦，cover letter係要寫，不過簡單一兩段就夠了。

  神級CV 點寫好？

至於點樣先係一份好CV？邊有得一概而論，要睇你申請嗰份係咩工作、咩行業，我有朋友本身做開創作，申請份工就係marketing – account manager，請人返去度橋湊客，呢啲工就應該喺CV顯示你的創意，而非用傳統方式申請，所以佢張CV就只得大半頁A4，直接將自己做過嘅project寫出嚟，加幾幅圖，再寫埋自己期望薪酬同可到職日期，搞掂。

我做過傳媒，份工需要人寫嘢之外，仲要識用排版軟件，結果我份CV就排版排咗個雜誌封面出嚟，封面內容係一Ｄ簡單嘅自我介紹，然後就send得。

而家一街都係youtuber，假設youtuber想申請一份拍片剪片工作，咁佢send自己其中一條片比僱主就解釋哂一切技能啦，仲寫乜鬼resume吖。要成功得到一份工，最緊要係仔細閱讀個招聘廣告，諗吓人地想要一個咩人，如果諗完真係覺得適合自己，就將自己合適的特質放大，用適當形式呈現出嚟。

自己想試咩、用咩方式試，信吓自己啦，衰咗又無後果；溝咩女、溝邊條女，都唔會問專家啦？如果你有奇招搵工經驗，歡迎喺我facebook page分享。

（文章純屬作者意見，不代表香港01立場。）