【TVB．博評】離地唔好扮貼地　「毛記化」先有出路！

已經好耐，無坐定定睇TVB。不過三星期前，阿媽為咗維持家庭和諧，食飯前下令人人收埋iPad，迫大家陪佢睇大台，以為又要面臨《食平DD》系列折磨時，意外地被新節目《Big Big 小明星》吸引到……

睇住參賽者周浩筠明明只得5歲，跳舞竟然Chok過陳偉霆，令我事後翻睇20次……

喺一台獨大、無任何競爭對手追擊下，基本上TVB只要保持節目質素，以往毋須擔心師奶觀眾流失。不過今時唔同往日，當師奶們識用YouTube或其他Apps睇片時，如果大台一年只得一兩套有質素嘅黃金劇，實在難以收復失地。

N年前非常收得嘅綜藝節目一樣仆值，TVB不思進取，一味狂推以食為題材嘅節目，令觀眾墮入肥媽＋黃淑儀組成嘅「阿婆食平D」地獄輪迴，莫講話後生仔睇到「縮一簫」，師奶都熄機啦！

典堂級節目《超級無敵獎門人》上年以《我愛香港》借屍回魂都無法挽回收視時，係一大警號。被網民嘲諷為CCTVB嘅大台面臨廣告收入及股價一落千丈嘅難關（股價近幾年由高位50幾蚊跌至現時29蚊左右、2016年廣告收入大跌62%至5億元），加上100毛異軍突起，迫到大台決心改革。

100毛早於2015年5月喺網上以《毛記電視》嘅名義「開台」，一早搶佔網上市場，每條廣告片收費企硬由六位數起，更煲起不少喺傳統市場未必會爆出嘅KOL。由於每條廣告片Hit Rate由30萬人次至過百萬人次，吸引務求飛甩老土形象嘅銀行、藥品公司、食品公司等，爭相喺毛記落廣告。

未推出《毛記電視》前，100毛喺2015年嘅生意額已經達到2,100萬，盈利為800萬，呢兩年喺《毛記電視》落廣告嘅商戶一直平步上升。或者千零萬「生意仔」對TVB唔算係大數目，不過繼續坐以待斃死守傳統市場，相信難以擺脫「嚴峻經營環境」。

如果你曾經同TVB工作人員接觸過，你會發現佢地係極其認真嘅工作人員，盡力喺既定框框下，提供最佳質素嘅節目畀觀眾。只可惜無論點努力，難以改變觀眾對大台三大印象—劇情犯駁位極多、抄襲鬼佬劇、藝員青黃不接。

為吸納年輕觀眾，TVB終於肯投放資源。6月18號播放、為「Big Big TV」app造勢嘅《Big Big 小明星》，表面上係要發掘童星KOL，實際上係主攻為子女儲reference嘅家長們。只要TVB唔好再播出低成本、毫無誠意嘅作品，要20歲至30幾歲、具一定消費力嘅年輕家長回心轉意並唔困難。改革關鍵唔係一味靠維穩，而係喺薪酬福利厚待員工，同時畀空間佢地放手一搏，全力發展網上平台搶返廣告商。

上年TVB喺facebook推出《See See TVB》粉絲專頁，自嘲呢招立即收到成效，成立一年瞬即吸納十萬個粉絲。《See See TVB》最大功用係「網上洗底」，除咗以輕鬆手法報導後台工作人員嘅辛酸史外，亦緊貼網上潮流，推出惡搞配音幽自己一默。

好似大陸版《射鵰英雄傳》喺本港劣評如潮，《See See TVB》依然善用資源，推出《玩簫高手黃藥師》，怒吸2.5萬人 Likes，Hit Rate超過140萬人次，希望唔係曇花一現啦！

（文章純屬作者意見，不代表香港01立場。）