【權力遊戲7．博評】第六集劇評：Gendry跑得快過小明

《權力遊戲》繼續超越物理。不是說 Night King 擲鏢槍屠龍，既然不屬人類，你講到 Night King 跑得快過保持，我也不能夠質疑。但 Jon Snow 差遣 Gendry 班救兵一段，真係離晒大譜。

情況好兇險：Jon Snow 與一群團友，連日趕路之後，於冰天雪地之中，正被成千上萬的 White Walkers 圍剿，被讚賞為全場跑得最快的 Gendry，授命跑返東海望（Eastwatch by the Sea）城牆，飛鴉傳書，找 Daenerys 救命。非常同情地理解，就當 Jon Snow 等人，之前一直遊山玩水，行得好慢，戰場跟城牆的距離原來極近，Gendry 可以一口氣跑回去找飛鴉。你都要提供時間給隻飛鴉飛去搵 Daenerys，又要 Daenerys 坐龍飛返戰場救人，來來回回，就算 White Walkers 怕溶冰，未敢進攻，凍都凍死班企定定的人類啦！除非 Daenerys 有隨意門或者識瞬間移動囉。

何況，講到 Night King 原來懂得擲鏢槍遠距離攻擊，又有大鐵鍊，咁點解眼白白看着 The Hound 掟嘢解悶，情願一直等運到，也不出手？再再何況，講到 White Walkers 行行重行行，行足幾季，都未行到黑城堡（Castle Black），Gendry 跑兩跑，又話到達目的地，這是《鄧寇克大行動》的不同時間線敍事手法嗎？

千辛萬苦扭轉常態，只為留低條龍，同埋令 Jon Snow 跟 Daenerys 醞釀亂倫。後生靚仔果然大晒，我真替 Jorah 難過，一樣有份為主子上戰場，一樣有份被主子拯救，但存在感接近零。

姑姐與姪仔成功結盟，兩姊妹則疑似反目。但我覺得今集最重要的部份在Daenerys 跟 Tyrion 的對話。今季由開播至今，Tyrion 簡直被廢了武功，負責諗橋的，但條條橋唔係被 ban，就係失敗，搞到集集都畀老闆寸。

今集又寸過，怪 Tryion 主張避戰，連累大軍損失兩支盟友；Tyrion 勸 Daenerys 無謂有失身份隨便出動做救傷員，Daenerys 亦睬佢都傻。Tryion 又唔高大又唔靚仔又唔打得，係贏在個腦，如果，連計謀都無料到，就只會浪費米飯。

來到第六集，Tryion 有機會重申一次理念：靠恐懼統治人民的，讓人民日日夜夜也想個統治者落台的，叫暴君，歷史上的暴君，都不得好死。Tyrion 的目標不只統一天下，他更要創造一個真真正正美好的新世界，甚至已經顧慮接任人的問題，他腦海中的藍圖，不是建立國家，是建立制度。要達致這個理想，不可能憑武力做到，也不可能沒有犧牲便做到。過程是很漫長，是很容易會灰心甚至絕望，但別無他法。

好膠？但能夠團結人手的，多數也是一班俗世眼中很蠢很天真的膠人。

（文章純屬作者意見，不代表香港01立場。）