【瑪嘉烈與大衛-前度.劇評】東施效顰 複製「淡然」變「無味」

撰文:方以文
出版:更新:

由ViuTV創作總監「南方舞廳」原著小說改篇,佢自己做埋監製嘅《瑪嘉烈與大衛系列 前度》,乘住開台劇同一系列《綠豆》嘅氣勢,開播前萬眾期待。ViuTV喺沉寂咗一排之後都唔敢怠慢,播之前喺電視做足五集半個小時嘅宣傳,網上亦都拍咗幾段片去推,為求一舖翻身。結果喺各大傳媒都畀足面推之下,聲勢唔好話同《綠豆》冇得比,就連對台嘅《超時空男臣》都唔夠力對抗。我就頂足全套劇,真係失望。

年輕演員力有不逮

演員方面,早就有心理建設。用入行幾年嘅袁澧林、劉俊謙、馬志威,同周家怡、林保怡、潘燦良去相比係好唔公平,已經盡力叫自己唔好咁做。袁澧林唔係做得好出色,但係都可以令人恨下去,就算佢嘅感情表達有幾單一都好,起碼我都叫感受到佢嘅(唔豐富)嘅感情。不過身為男主角嘅劉俊謙真係好大鑊,好似同觀眾有層隔膜咁,啲情感完全傳達唔到(佢同ViuTV繼續拍緊另一套劇,希望佢有進步)。馬志威亦都完全跌watt,電影明明好好地,但今次真係唔知發生咩事。尤其係佢做電台DJ嘅角色但就滿口懶音,集集都chok住聲去演去講嘢。當佢每次好深情咁講「幸福」,我都聽唔到真正嘅「幸」福,好痛苦。唯一有驚喜嘅係杜小喬,由煩膠變成得到觀眾嘅同情、企埋喺佢嗰邊。不過公平啲講,佢嘅角色係四個年輕演員裡面最立體而又有變化,最容易演。

至於一班資深「托劇」演員,其實就只由有南方舞廳鍾情嘅廖碧兒由中段帶到尾,成為救劇奇葩。許志安同一班年輕演員對比之下當然比較出色,始終爛船都有三斤釘。至於大家宣傳時好期待嘅黃秋生,根本冇乜戲畀佢做,影帝如同茄喱啡。夏文汐嘅戲份多過黃秋生,不過好多地方甚至係講對白都有問題。

袁澧林唔係做得好出色,但係都可以令人恨下去,就算佢嘅感情表達有幾單一都好,起碼我都叫感受到佢嘅(唔豐富)嘅感情。(袁澧林Facebook Page)
+9

模仿標誌性畫面 有心冇力

演員唔掂,咁《綠豆》最受人稱讚嘅「淡然劇本」同埋「MV式拍攝」,喺今輯又可唔可以成功呢?答案係否定。本來我都做好心理準備將《前度》同《綠豆》割開,畢竟台前幕後差唔多換晒人,得返南方舞廳同埋廖碧兒留低。不過《前度》無論係後期調色、畫面比例、林海峰嘅旁白、黃劍文同歌異詞嘅主題曲,都係想引渡觀眾去連結《前度》。呢件事冇話啱唔啱,但要做嘅話,就要有信心《前度》至少要同《綠豆》打個和,依家兩套劇連結,但新不如舊,同搬石頭砸自己冇分別。畫面嘅美感同埋用意,好差,好多時都為咗做而做,同上一輯好多時鏡頭幫手講故事真係冇得比較。

劇本方面,30集嘅故事,重複拖拉,《綠豆》嘅「淡然」劇本,變成《前度》嘅「無味」。上一輯由導演同編劇憑原著當中感覺主導嘅文章,寫出有劇情嘅故事,每集平平淡淡但係言之有物。到今集,導演同編劇轉咗人就出事。有睇過兩本原著嘅讀者話《前度》原著嘅故事性比起《綠豆》強得多,但估唔到電視劇《前度》會搞成咁。

亂用金曲金句 雜亂無章

當中令到個劇情更加雜亂嘅,係啲金曲同曲句。《綠豆》每集林海峰嘅金句被瘋傳,係因為每一集嘅內容淡如水,要每集最尾嘅金句撈返起佢,畫龍點睛。《前度》嘅林海峰讀白唔係集集出現,但差唔多每次出現都同個劇情唔多關事,更加顯現到劇情有幾薄弱。再者,啲角色對白全部都係金句,聽足半個鐘好頭痕。好多時文縐縐之餘,又冇劇情推動配合,淪為齋噏。

金曲方面,《綠豆》成功將陳奕迅嘅《黑洞》配合劇情,首歌同埋劇情都有升級。但到《前度》就好似撞咗邪咁亂咁嚟。廖碧兒飾演嘅維珍嗰首《忽然之間》,到最後大結局變咗做《償還》極度九唔搭八。而許志安cover經典樂隊Queen唱嘅《Love of My Life》正唔正見仁見智,但成為許志安個角色嘅心情就好啱,偏偏就未被重用。

拒非讀者於門外

好多有睇《前度》原著嘅觀眾都喺我Facebook嗰邊留言,話睇埋原著就會明個電視劇做咩。呢個就係問題,電視劇唔能夠成為一個獨立作品,已經係唔妥。好多改篇文本嘅電影電視劇都會比原著差,但佢哋都可以獨立成為作品,要講得通,感情要承接到。《前度》喺呢方面就失敗咗。依家成部《前度》電視劇就好似只係為咗畀作者自己同埋佢嘅讀者去睇咁,拒我呢啲冇睇原著嘅觀眾於門外,情何以堪?

依家成部《前度》電視劇就好似只係為咗畀作者自己同埋佢嘅讀者去睇咁(袁澧林Facebook Page)
(文章純屬作者意見,不代表香港01立場。)