【港姐2017．博評】只見Big Big Channel　再見香港小姐

今屆《香港小姐》真係睇到我心都痛。

我冇誇張，《香港小姐》曾幾何時（十年前都應該仲係）唔少香港甚至係華人社會女孩子羡慕嘅尊貴名銜，「美貌與智慧並重」係唔少女孩子嘅目標，位位香港小姐都為唔少女孩子同埋男孩子定咗標準，完美女人應當如此。「靚過香港小姐」、「咁靚女，去選香港小姐啦」係一代甚至係幾代人嘅口頭襌，但睇完今屆《香港小姐》，真係嘆句此情只待成追憶。

冇得睇內涵　只能靠外表

喺今年決賽之前，候選佳麗嘅芳蹤近乎絕跡翡翠台，只得一個食住「撒嬌 Mall 姐」餘威嘅台灣特輯，其他所有宣傳都迫晒落去 Big Big Channel。對今屆《香港小姐》節目打咗個折扣，觀眾接觸唔到各位佳麗，自然唔了解佢哋嘅性格同內涵，到兩個鐘頭嘅決賽之時，就只可以單憑佢哋嘅外表去評分。

老實講，我覺得歷屆港姐冠軍好多時都唔係最靚嗰個，如果唔係使乜有「最上鏡小姐」？大家又點會用「大方得體」嚟形容港姐冠軍？係因為以前喺「總決賽」之前，會有「半總決賽」甚至係「準決賽」，再加上頻頻現身喺唔同嘅節目，觀眾可以睇清楚各位佳麗嘅外表同內涵，而唔係好似呢幾年咁，只係用兩個鐘，膚淺咁去睇吓一班佳麗外表。

剛剛出爐嘅冠軍雷莊𠒇俾人批評到體無完膚，全部都係攻擊佢嘅外表。唔係為佢講說話，亦都為佢講唔到好說話，因為除咗外表，我真係睇唔到佢份人係點。佢內涵可能好勁呢？但冇法，個節目都冇畀佢發揮。

珊姐，唔好管咁多瓣啦

兩個小時嘅節目，有成一半時間都係為咗推廣 Big Big Channel。綜藝節目同埋 Big Big Channel 兩邊都係珊姐話事，自己幫自己天經地義，但真係做得好肉酸，管唔掂咁多瓣就放手畀人啦。

首先係嗰個「Big Big Channel 最受歡迎香港小姐大獎」，本身係唔會出事嘅，因為佢都只係才藝表演環節。不過轉咗個全民投票形式，以前用「TVB fun」，依家就喺 Big Big Channel 畀心心投票。慘就慘在嗰個佈景實在太 cheap，為求表達到 Big Big Channel 係直播平台，就真係照住直播平台啲佈景嚟抄，冇理過襯唔襯港姐嘅格調。網上直播時不停擺 pose 同埋食嘢呃反應嘅橋段，居然可以照擺上港姐節目，我真係為呢班佳麗尷尬。其實可以繼續 sell Big Big Channel 直播，但係換個高貴啲嘅布景已經唔同晒。

仲有港姐競選必備嘅大型歌舞環節，今年嘅主角好明顯係 Big Big Channel 嘅各位小朋友 KOL 同埋吉祥物「大明猩」。兩小時嘅節目時間根本唔多，仲要喺呢個環節分畀 Big Big Channel，佳麗們喺自己嘅節目居然淪為配角，鵲巢鳩佔，情何以堪？

評審機制出事　Do姐成箭靶

另外一個令到今屆香港小姐進一步崩壞嘅地方，係個評審機制。由全民公投選三甲，縮到去由評審自己投明票去話事，已經係大倒退。唔係話民唔民主，因為香港小姐民主其實唔係好影響我，但觀眾嘅投入度就大大減退，香港小姐嘅認受性亦都大大降低。今屆仲冇咗會計師去核實 Big Big Channel 啲心心數量，公信力更加低。

其實評審投票選出三甲冇話唔得，但問題係個機制太多講唔通嘅地方。首先係各位評審各自都有自己嘅「學生」，咁佢一定幫自己學生，到投決定一票時，就算自己學生唔太好，都可能會因為「師徒關係」而投佢一票。雖然一早就堵塞咗呢個漏洞，唔可以投自己嘅徒弟，但「感情因素」都可以繼續影響賽果，你睇最後草蜢因為支持好兄弟綑綁投票就知幾咁兒戲（而佢哋都唔掩飾）。

另外，Do 姐身為「校長」可以喺打和時投決定性嘅一票，佢就更加唔應該有學生，但佢有喎仲要有兩個。另外，校長要投關鍵一票，之前普通投票時就最好冇得投，保持中立，依家有兩票，仲要係同一班候選人度投，就連立法會功能組別都唔係咁玩啦，諗呢個機制嘅人真係要打。依家真係應驗咗梅菲定律，最後真係要 Do 姐用埋校長額外嗰一票去投冠軍出嚟，有網民揶揄今屆係「Do 姐小姐選舉」，矛頭直指 Do 姐。我希望大家睇晒成件事，Do 姐今次擺明畀人擺上枱，慘！

三大騷徹底崩壞

不過點都唔夠《香港小姐》呢個昔日金漆招牌慘。有觀眾話好耐冇睇大台，但《香港小姐競選》就一定睇，因為係情意結。呢幾年咁搞法，同觀眾嘅關係愈來愈疏離、香港小姐嘅認受性愈來愈低，呢個招牌冇晒金漆都不突止，我直頭聽到佢撕裂緊嘅聲音。三大自家製節目《香港小姐競選》、《勁歌金曲總選》、《萬千星輝賀台慶》係唔少電視迷心目中嘅經典節目，近年做得幾差有眼睇。連大台鐵粉都含淚叫佢收檔、「不如唔好再搞」，希望保住個招牌，真係慘絕人寰。

（文章純屬作者意見，不代表香港01立場。）