【TVB台慶50周年．博評】無綫想華麗轉身，必須重建與觀眾的關係

今日就係無綫50歲生日，正如無綫《萬千星輝賀台慶》嘅宣傳片咁講，TVB的確係香港人嘅老朋友，見佢踏入金禧日子，係開心嘅，但亦都好感慨。當年大部分人愛護嘅無綫，到近年畀人叫熄機，又或者有人靜雞雞睇咗都唔夠膽話畀人知，講到底都係無綫自己做得唔好，冇得怪人。我身為一位撈電視汁送飯嘅觀眾，想喺TVB 50歲生日時，將呢篇文送畀佢，希望佢可以睇得到。

觀眾關係愈趨薄弱

由邵逸夫、利孝和、祈德尊等人創辦嘅無綫電視，係香港第一間免費電視台。經歷過要踎喺人哋屋企門口或者坐喺涼茶舖睇收費電視麗的映聲嘅觀眾，都應該記得無綫開台時嗰一份雀躍。50年前免費娛樂唔多，有聲有畫面嘅免費電視台，好快就成為咗流行文化嘅領軍人物，無綫同埋觀眾之間嘅感情，亦透過旗下節目同藝人慢慢建立。呢段關係直至今時今日都係一班「鐵粉」嘅依歸。可惜由千禧年左右開始，呢份同觀眾嘅關係愈來愈薄弱，同新一代觀眾嘅感情亦都建立唔到，收視愈來愈低係必然嘅事。

輿論主導力減　擁抱負資產

無綫幾十年嚟都掌握住香港、甚至係全球講廣東話華人嘅輿論方向，電視範圍幾乎係佢玩晒。無綫播啲乜、講啲乜、捧邊個，全港嘅觀眾都普遍接受或者冇渠道反對，以往邊個掌握住大眾傳媒就係造王者，甚至自己就係王者。不過呢個情況，已經被互聯網嘅出現同普及改變。

千禧後，網絡發達、普及，個個都有自己發放訊息同意見嘅渠道，輿論嘅構成已經唔係由電視台等傳媒由上而下去畀觀眾，而係慢慢達至平衡，個個都可以製造輿論。電視台捧邊個，觀眾唔再需要硬食；電視台唔捧邊個，觀眾可以自己去捧。加上近年「反大台」嘅情緒高企，愈高高在上擺架子就愈乞人憎。偏偏無綫喺近十幾年就愈來愈自大，同唱片公司反面、封殺其他傳媒、擁抱負資產藝員，完全同社會發展背道而馳。

大台冇風範冇氣度

大台若然要扭轉局面，無可避免要順應社會形勢。唔係話樣樣嘢都要順住觀眾意願，但大台就要有大台嘅風範，不卑不亢有氣度。依家嘅無綫，有時睇得自己太大，有時又睇得自己太細。自大就正如前文所講，只會招人討厭。但係睇得自己個電視台太細、地位太低，一樣出事。呢部分喺宣傳節目嘅時候就愈來愈明顯：為求有人講、有新聞版位，好多時都會犧牲TVB品牌嘅信譽度。香港小姐選得愈來愈兒嬉、節目無預警腰斬疑似為咗宣傳大台網、同大粒藝員簽約搞到一鑊泡、邀請視帝級藝員返嚟賀壽搞到「有誤會」。如果呢啲係「逆向宣傳」就明顯唔收效，只會愈搞愈衰。如果唔係「逆向宣傳」而真係失手，就係領導無方。大台之所以係大台，係因為個招牌值錢、有地位。搖風擺柳、舉棋不定、有錯唔認，一步步蠶食個金漆招牌。我相信一班愛護大台嘅觀眾睇見都覺得心酸。

節目華麗轉身 與觀眾邁步同行

TVB 50周年，想喺度同無綫講句生日快樂，亦都希望無綫真係可以做到今年嘅台慶口號「華麗轉身，邁步同行」：節目創作走出以往框框之餘，亦要重新建立同觀眾嘅關係，一齊同行，咁先係長遠之計。

（文章純屬作者意見，不代表香港01立場。）