【TVB.博評】 賴盜版係死撐定真心?《溏心風暴3》可否摑醒大台

撰文:方以文
出版:更新:

無綫金禧台慶劇《溏心風暴3》收視屢試低位,第三周平均收視只係得21.4點,仲低過同星期播出嘅處境劇《開心速遞》嘅21.7點。觀眾嘅反應覺得套劇同十年前嘅《溏心1、2》劇情差唔多,都係互相指罵、爭權爭錢,再加上啲「金句」同埋啲已經out晒嘅「潮語」,仲有無時無刻都可以開口唱歌跳舞嘅橋段、演員過份用力嘅表現,成個感覺就係脫節。由網上輿論以至收視,甚至大台成日拎出嚟講但其實好低嘅國內平台點擊率,全方位反映咗《溏心3》到現時為止係失敗嘅。

觀眾嘅反應覺得套劇同十年前嘅《溏心1、2》劇情差唔多,都係互相指罵、爭權爭錢。(《溏心風暴3》劇照)
+17

捉唔緊觀眾口味

監製劉家豪喺訪問當中提到《溏心3》係將第1、2輯觀眾愛戴嘅元素保留,即係將「吵鬧嘅屋企到最後一家和好如初」嘅橋段炒冷飯。好可惜喺《溏心2》播完嘅呢9年之間,觀眾已經進步咗好多,將十年前嘅嘢照辦煮碗拍多次,觀眾已經唔buy。不過劉監製對於自己嘅品味似乎信心十足,拍嗰時就算係一班老資格嘅演員想改對白都唔可以。佢仲喺訪問度話「做製作唔好拗氣,要知道觀眾鍾意睇咩嘢」。呢句真係金料玉律,不過照依家嘅情況嚟睇,捉唔緊觀眾喜好嘅係劉監製本人。

監製劉家豪喺訪問當中提到《溏心3》係將第1、2輯觀眾愛戴嘅元素保留,即係將「吵鬧嘅屋企到最後一家和好如初」嘅橋段炒冷飯。(《溏心風暴3》劇照)

低收視賴觀眾睇盜版

播到第四個星期,收視擺咗眼前,以為終於可以畀到教訓一班自以為走在最前但其實已經out咗嘅高層?冇咁簡單。傳聞大台高層之間討論過《溏心3》低收視嘅原因,結論係因為內地網站盜版猖獗,觀眾因為太好睇等唔切,所以去咗呢啲網站度搶先睇,搞到內地平台點擊率冇預期咁高,同時拉低咗香港嘅收視。劇中演員黃宗澤、阮兆祥都喺微博以差唔多同樣嘅文字發過帖,話好多人偷步睇咗。係咪為咗低收視而統一口徑就等各位自行判斷。不過呢兩段微博都由劉家豪嘅太太、同樣係無綫戲劇製作(合拍)總監嘅梅小青轉發過。

諗一諗都知,大台嘅合拍片一直都面對住「大陸網搶先播咗影響香港收視」嘅問題。睇返今年喺周一至五2130檔期播嘅合拍片《使徒行者2》都唔見收視低成咁,因為「反應熱烈,所以香港有好多粉絲上一些不知名網站找超前播出的集數狂追溏心3!」以致收視差,係咪主要原因就真係顯而易見。

金禧台慶劇收視咁低真係好肉酸。(《溏心風暴3》劇照)

革新派係時候乘勢反擊

可惜傳聞一眾高層都(表面上?)認同呢個講法……到底係深信不疑,定自欺欺人?抑或已經好多人睇穿咗但冇人敢講個真相出嚟?冇人知。我淨係知道金禧台慶劇收視咁低真係好肉酸,仲要為咗呢套劇而推遲咗個頒獎禮,令到台慶月嘅戰線拉長咗但就慘淡收場,氣勢都蝕埋,呢套劇都算係罪魁禍首。

做觀眾嘅好被動,喺《溏心3》播到1月19日之前,最多只係可以熄咗部電視佢,或者轉台。想要有好節目睇?除非今次《溏心3》繼續破底,先可令到一班瞓緊,或者扮瞓緊嘅人面對現實。我相信大台已經有好多人醒咗伺機而動,希望今次《溏心3》可以成為佢哋絕地反擊嘅最強武器,咁就不枉大氣電波被浪費嘅呢兩個月時間。

(文章純屬作者意見,不代表香港01立場。)