【X你的世界末日．劇評】兩個細路，幫你做晒想做又唔敢做嘅事
《X你的世界末日》（The End of the F***ing World）講一個自認 psychopath 的 17 歲青年，同一個喺屋企得唔到愛嘅少女，組成一對孤獨苦命鴛鴦離家出走嘅故事。兩個細路竟然因為無聊無比的小原因，闖出一個大禍。欠一條神經的少男同太神經的少女，對世界所有嘢都不滿，卻又對世界上所有嘢都無能為力，佢哋只不過係世界裏面的其中一條毛，但佢哋有勇氣去 fuck the world，令感到生活苦悶、返工抑壓到爆的觀眾打了一支強心針，睇完正能量 get。
厭世少男和反叛少女用消極態度去對抗萬惡嘅世界，用雞蛋丟高牆喎，觀眾一邊睇一邊化身雞蛋一齊做 back up。有乜嘢可以開心得過 fuck the world？就係齊齊 fuck the world。
順帶一提，裏面小菲最鍾意就係《Walking All Day》嗰支歌仔，係 Blur 樂團嘅 Graham Coxon 啊，聽聲就已經興奮。
【編按：以下內容含劇透，逃生門在此。】
Stage 1：首先，你要搵人同你 fuck the world
我本來想一個人富貴，但原來兩個人共患難先係最難能可貴。隨同呢個叫人瘋狂的 fucking world 而來的，只係無數對世界的厭惡和憎恨。James 喺 6 歲時目擊母親自殺，老竇內斂地愛但又唔識開解，Alyssa 親生父親出走，老母再嫁再生，繼父當自己冇到。兩個人一直在考慮應該點去拯救自己，男嘅打算殺人試下可唔可以搵得返啲感覺，女嘅想出走尋求另一個依靠（親生老竇）得以將自己從呢個討厭又無趣嘅生活裏面拯救出來。一開始兩個人都不過在追求「對自己嚟講」更好嘅生活，但出走嘅過程裏面慢慢發現到，原來有個人可以一齊共患難，先係最高無上。呢啲咪係跌咗個橙，唔覺意執返舊柑囉。
Teen dramas 畀到你嘅嘢係普通大人世界裏面無嘅嘢——一份天真，徹底扭轉局面嘅希望，同埋改變世界嘅力量。呢啲嘢通通都好難喺真實世界上演，所以大家先會睇得咁開心咁咬牙切齒；因為你哋想做又唔敢做嘅事，由少條根嘅 James 同又怕事又要試嘅 Alyssa 一次過幫你做晒。
Stage 2：搵到個伴了，就管他媽的世界如何，用力 fuck the world！
想喺瘋狂的世界裏面做正常人，定係想係正常嘅世界做瘋子？對佢哋嚟講兩樣嘢根本無分別，佢哋只不過想 rule 自己的人生。一次過做晒所有正常青少年少女做完會畀人鬧嘅事，做埋正常人唔會做嘅事（係人都經歷過的反叛期）——一拳打落老竇度，離家出走，搶銀包，擅闖民宅，隨街搵人去上床，殺人，潛逃，入油唔畀錢，持械行劫……所有唔畀做嘅嘢通通一次過做晒。有個伴了，就夠膽 fuck the world。如是者，觀眾如你如小菲，睇住電視代入 James 同 Alyssa，同套劇一齊 fuck the world。
愈墜落愈快樂？Who cares！再講一次：想喺瘋狂的世界裏面做正常人，定係想係正常嘅世界做瘋子？唔好話對 James 同 Alyssa，就算對你對小菲都無分別。我哋只想自己嘅人生自己話事。
Stage 3：X 下 X 下通常都會動搖，但係要記住對自己嘅信心要拿穩
劇裏面好幾次提到 Alyssa 對性着迷，這裏所講的唔係青少年對性嘅好奇。Alyssa 想透過同人發生性行為去證明自己長大，可以掌管自己命運，可以決定自己人生。事實上好多女仔都係咁，大家都清楚好多女仔（或者男仔都係）想要用性嚟證明愛真係存在（或者存在過）。更普通的就係好多男人都會利用性或是性相關的行為來引發其他對方的妒忌。講到尾，Alyssa 喺缺愛之下的情況成長，面對救生艇（James）就好想用力抓住；而且佢覺得如果佢唔主動，好可能就會失去。
呢份進擊同盲目都可以放落 Alyssa 見完親生老竇之後，發現老竇到頭來都只不過係爛人一個，但 Alyssa 選擇隻眼開隻眼閉乜都睇唔到，無非係因為佢咩都唔想理，事旦抓住啲嘢去證明一份屬於自己嘅愛實實在在咁出現過。
做人嘅嘢又大膽又心虛好平常。心虛嘅時候開始唔信自己，好多人呢個時候就會搵啲嘢去開始「迷信」。因為小菲同你一樣，都試過口不對心，都試過以為世界無希望，都試過事旦想搵啲嘢做寄託。愛一個唔愛你嘅人，打一份唔鍾意嘅工，往往因為無自信心所以唔敢跳出新局面。Alyssa 在迷失的時候身邊好在有 James，我哋在迷惘的時候好在有《X 你的世界末日》；走出去就係差你夠唔夠膽行嗰一步……
Stage 4：坎坷過後有艇搭——明明只想救自己，但我竟然end 咗個 fucking world 兼學識了愛？
本身我哋只係 stage 1 想弱弱地想喺呢個好令人討厭嘅 fucking world 裏面尋找拯救自己的方法，但係竟然喺呢個 drive us nuts 嘅世界裏面用瘋狂嚟成就愛。James 本來只想透過殺人令自己 feel somthing，扮住 fall in love with her 等時機，盲目順應 Alyass 嘅要求（對佢自己嚟講亦都冇乜話所謂不所謂）令自己嘅目的可以順利發生，但佢冇諗過容忍 Alyssa 對世界嘅胡鬧，其實係源自自己對佢嘅（溺）愛。
1,000 種陰差陽錯嘅情況發生，兩小無猜就離家出走；大家都想要從而家最唔滿意的生活裏面 upgrade 到另一個合心意的版本。點知世界就係咁，你想 upgrade 本身嘅生活咩？結果就 downgrade 畀你睇，你無錢、你炒車、你唔小心殺咗人、你連底衫褲都冇，你冇油錢，你乜都冇！但呢個時候，你發現乜都冇嘅你有嘅係對方！
呢場公路旅程裏面嘅重重奇遇翻開咗 James 目擊母親自殺的傷口。Alyass 喺尋找老竇的過程中證實老竇係個切頭切尾嘅 shit person，唯一幻想都親手砸碎埋，人生跌得比先前還要低，乜都冇曬但竟然得到一個永遠將保護她（嘅未來同安全）放喺最優先嘅 James。
原來到最後，你唔覺意升咗 level，你以為如開初所講終於搵到個人可以同你一齊去 fuck the world 就係最好？你最後竟然同呢個人一齊上咗神枱。升咗 level 後你發現生命裏面出現一個可以令人重新感受生命嘅人先係最重要；然後憑住 fuck the world 的勇氣，用自己方式逃離（end）呢個 fucking world 先係 happily ever after！
後記：要記住，並不是每個人都會將你勇敢地揹上身，所以珍惜你所擁有的
James 同 Alyssa 喺加油站遇到同病相憐的男孩，一個在小店裏面被打壓得不得了的可憐蟲。因為佢哋兩個半成功的出走，激發起男孩的反抗精神，反過來幫手困住老闆娘，諗住執包袱加入同佢哋一齊浪跡天涯。但係你要明白，唔係你想一齊玩，我就要侵你玩，好似繼父都冇當 Alyssa 係家人。可憐嘅係親生老竇若干年係可以同你以 friend mode 聚頭，但係講到「責任」就免了，仲隨時會出賣你換通輯獎金呀。
（文章純屬作者意見，不代表香港01立場。）