【藝評．非常林奕華】「神劇」是如何誕生的？

近年來，《福爾摩斯》成為一股熱潮，電視劇、電影，以至其副產品，以「電視劇為研究對象」的「解迷書」等等，全部大受歡迎。
早前有本地劇團都趕上呢股潮流，以《福爾摩斯》為題推出全新作品。

作為一個標準「福迷」，嚴格來講，其實係BBC加班尼狄．甘巴貝治（Benedict Cumberbatch）創造的福爾摩斯的擁躉，加上一直追開呢位劇作家的創作，實在係無唔入場的理由。

新劇講福爾摩斯會唔會如舊作難明？

其中一個期待位係劇作家一向擅長用全新角度，去理解、去演繹傳統經典，以往就有《紅樓夢》、《梁祝》等等，絕對唔係正正經經咁將原著人物放上台，根據本身故事脈絡「視覺化」加「聽覺化」咁「做」一次就算，所以你會見到一個又一個賈寶玉並置台上，自己同自己對話交流；權傾榮國府的王熙鳳，甚至陰陽互換，由女變男等等。

背後的動機諗法，未必個個可以領會接受，不過就提供了另一種切入角度俾人思考。

好期待之外，同時免不了一份擔憂，擔憂主要因為呢位劇作家同時出名「難明」（雖則佢本尊呢幾年不停講，睇佢的作品，以至其實係任何藝術作品，根本唔應該用「明同唔明」做準則）。

難明不是問題　致命是無乜新視野

唔同人講唔同嘢，本身已有唔同意義，然後對象唔同，又有其他含意，就咁講兩句，都已經想像到個挑戰有幾大，特別係對一向睇開人物角色明確、故事發展清晰的觀眾來講，加上作品篇幅往往偏長，三粒鐘已經係基本，今次作品更加係足足四粒鐘，加加埋埋咁多特質，真係唔講得笑。

帶住期待、帶住擔憂，入場之後又係點樣？四粒鐘入面，手法上未見到太多的革新，例如全台演員，你我他她，人人都係福爾摩斯、華生、莫里亞蒂，以及哈德森太太等等，都唔緊要，反正藝術創作，都唔係純粹無間追求技法上的炫目，手法無變唔死得人，致命的，反而係睇唔到劇作家今次為舊經典注入了太多新視野。

作品有個小題：「有一種關係叫華生與福爾摩斯」，入面承載住乜嘢呢？嘗試抽取個別片段闡釋一下。

其中一幕，福爾摩斯（或是莫里亞蒂，無錯，人物角色之間繼續頻密轉換）將華生當作寵物一樣餵養，當中喻意不說自明；其他單元入面，福爾摩斯、華生，以及莫里亞蒂三人之間，大概就係一種「你中有我、我中有你」的互相依存，就算唔講原著作者柯南道爾（Arthur Conan Doyle）的設計刻劃，只係稍為留意近年大熱的電視劇同電影，呢種狀態已經有好多不同形式的探討同展示。

個別作品的好唔好睇，可能都係一次半次的見仁見智，但係隨之發生的一個神奇（離奇？）現象，或者更加值得注意。

乜嘢比難明的劇更難明？觀眾的自責

睇完每個作品，特別係令人失望（或者興奮）的作品，慣性我都會搵人傾下分享下，今次前後問過至少七個唔同圈子的朋友，劇齡有長有短，所謂「對藝術的涉獵」亦有唔同程度，不過普遍反應都好一致：首先並無任何一個覺得「好睇」。

我明，放在一個嚴謹學術討論上面，包括「咩係好睇？」、「藝術一定要『好睇』咩？」等等問題，隨時都可以另外寫幾千字，所以非科學化探討事先真係要講明。

全年「唔好睇」的節目真係多到不得了，反而有趣的，係 7 個人入面，至少一半都係歸咎自己「悟性唔高」，就算睇到瞓著，都仍然不出惡言，只會慚愧地話自己「狀態唔好」，引起了我一種好奇，到底節目有咩特質先會令人求諸於己，覺得問題出在自己身上，唔係出於作者？同時入面可能仲有唔少都係回頭客，「難明」又「唔好睇」之後都要繼續……

呢個年代、呢個社會，總係節目太多、時間太少，點解有人明明覺得「伏味」濃郁，仍然一心一意買飛入場、一次一次測試底線？有咩力量令人覺得終有一日，在一份一份「難明」入面，你會悟出一個一個道理？乜嘢人物可以一步一步走上呢個高台，受到一班一班粉絲熱烈追捧？

呢位劇作家創造的特殊現象，就好似佢部分的作品一樣，一樣咁「難明」，我嘗試一邊拎住《心之偵探》的劇本、一邊拎住《聖經》，梅花間竹對讀，睇下從中會唔會得到少少啟示。

（本文純屬作者意見，不代表香港01立場。）